Read Hadiyya Qeessuwwi Kitaaba 21 Bible Online

Qeessuwwi Kitaaba 21 - Hadiyya bible

Qeessuwwi Kitaaba 21

¹Waa'i Muse'ena «Aaroon oos ikko'i qeessuwwiina ‹Ayyim ixxi minaadabiinsi lehu mannika leesha nakkaa ixxi gaga haashaassoone.

²Ihukkaarem ixxi abaroos ikko'i ixxi amaka, annika, beetika, ixxi landichchoka, abbaayyikaa

³mine issitoo'n ixxenne hee'llam aayyakaa nakkaa haashaareena xanookko.

⁴Ixxi balluwwanem ihukkaare nakkaa ixxi gaga haashaassoone.

⁵« ‹Qeessuwwi lehu mannina kichche'lla'a horoore hogoossitoone; ixxuwwi haareeddam gundissoone; xabanom kotooxxitoone.

⁶Shokkiisakka'a iina hincaa'akkam kitimaa hurbaaxxi kitimaa iina ixxuwwi Waa'ina hincaa'llam qeessuwwi iina annanni ikko'oo i summam haashaassitambee'i keen ihimmi hasisookko. Ee bikkina keesammuwwi ikkona.

⁷Qeessuwwi iina annanni ikka'a keesanto'oo keen ikko'i bikkina saa'aancho, buubbeesaancho te'im baajoomman bee'i landichcho eebboone.

⁸Qeessichchi keesamaakkoohan ihukkisa minaadab la'ona; ixxi ki'nnuwwi Waa'ina iina hurbaaxxi kitima hincaa'oohane; ki'nnuwwa keesoommi Waa'i an keesamma.

⁹Ayyi qeessichchikim landichcho saa'aanchotte ikkolas is anna sholliisso'ookko. Ee bikkina ise giirinne shokkitona.

¹⁰« ‹Hundiinsi lob qeessichchi ixxi abbaayyuwwi lambe'iinsi doo'llamaa ixxi horoorenne zayti labamaa qeessooma'n eddechcha edde'eena keesamu bikkina manni lehoo ammane ixxi horoore hogoossoone; ixxi eddechcham dereeroone.

¹¹Ayyi leeshim yoo mine aagoone; annaanninnem ihukko amaanninne haashaassoone.

¹²Iikki keesammi ixxi Waa'ik zayti ixxonne yoo bikkina i Keesammi Miniinsi firaa Keesammi Mine haashaassoone. An Waa'a.

¹³Ixxim meento eeboo ammane baajaamo eebona.

¹⁴Busara, bubbeesaancho te'im saa'aancho eeboone. Ihukkaarem ixxi minaadabiinsi baajaamo doo'llaa eebona.

¹⁵Eehid ihubeelas ixxi minaadaphphi lambe'enne ixxi oos haashaarammi ihookko. Ixxo keesummi Waa'i anette› yihe» yukko.

¹⁶Waa'i Muse'ena

¹⁷«Aaroonina ‹Ki shumo'iinsi orachchonne miiqakkam luwwi yoo ayyim iina ixxi Waa'ina hurbaaxxi kitima hincaa'immi hasisooyyo. Ku seer waaroo qaranchi hundannem egeranchi hasisookko.

¹⁸Qooq te'im dim te'im hagar te'im qoocci bi'aakkookkok

¹⁹anga te'im lokko iiqammi

²⁰quut te'im uulli gunchi te'im illi ciimfi te'im qosh te'im bacaro'i yookkok te'im muleessa'i hurbaaxxi kitima iina hincaa'oone.

²¹Qeessichchi Aaroon shumo'iinsi miiqakkam luwwi yoo ayyim shokkiisakka'a hincaa'akkamoka te'im hurbaaxxeka kitima iina ixxi Moollannina hincaa'oone.

²²Eehido'i manchi keesammaa hore'em keesammaa ihu hurbaaxxi kitima iteena xanookko.

²³Ihukkaarem ixxonne miiqakkam luwwi yoohan ihu bikkina keesammi du'm kolli te'im kiti'm beyyi kolli hincoone. Ee iina keesamu luwwa haashaassimmi hasisooyyo; ee keeno keesummok an Waa'a› yitaa kure» yukko.

²⁴Muse'e ee hundam Aaroonina, Aaroon oosinaa Isra'ee'l minaadabinaa hundinam kurukko.