Read Hadiyya Qeessuwwi Kitaaba 22 Bible Online

Qeessuwwi Kitaaba 22 - Hadiyya bible

Qeessuwwi Kitaaba 22

¹Waa'i Muse'ena

²«Aarooninaa ixxi oosinaa ‹Iikka keesammi summa haashaassitakkambee'isa Isra'ee'l oos iina annanni issita'a hincaa'llam kitima hundam aa'llakka'a keesammisa egellehe. An Waa'a.

³Ixxuwwi shumo'iinsi haashaarammi ihukkok ayyim Isra'ee'l oos iina annanni issita'a hincaa'llo'i keesammi kitimanne hinculas i illagiinsi bi'ookko. Ku seer waaroo qaranchi hundannem egeranchi hasisookko. An Waa'a.

⁴« ‹Aaroon shumo'iinsi ayyim shishir te'im orachchiinsi daadaa firoo luwwi yoohan ihulas eehanniinsi muccureebe'e keesammi kitimiinsi itoone. Ee'isam leeshinne haashaaramu luwwa te'im qansi firukkuuyyi yoo mancho nakkaa

⁵te'im biqinne shuroo haashaassoo luwwa te'im haashaassoo ayyi luwwinnem haashaaramu mancho nakkookkok

⁶ayyim ka keeno nakkulas hiim afeebe'e haashaarammi ihookko. Ixxi orachcho wo'inne aanshaqqubeelas keesammi kitimiinsi itoone.

⁷Ihukkaarem eelliinchi aagaa lasage muccuroo bikkina keesamaakkoo kiti'mmeka ixxi sharada iteena xanookko; ixxena hurbaatame.

⁸Bayta te'im moochchi shu diinaxxeka maara itoone; eekka itulas haashaaramookko. An Waa'a.

⁹« ‹Qeessuwwi i ijaajo gadda'a baaxiilo baximminne letambee'isa i ijaajo egettona. Ixxuwwa keesoommi Waa'i anette.

¹⁰« ‹Qeessichchi abaroosiinsi bagaan koyyiinchi te'im miqo'inne baxookkok ayyim itoone.

¹¹Ihukkaarem qeessichchi ixxi birinne bitaa'u te'im ixxi minenne qaramu ixxena awwaadaanchi ee qeessichchi sharadiinsi itona.

¹²Qeessichchi landichcho qeessichchi ihubee'i manchina ladiisantolas keesammi kitimiinsi ittoone.

¹³Ihukkaarem ooso qattobee'i is aro'i lehukkete te'im aro'i hollukkaare waatta'a is anni minenne hee'llam qeessichchi landichcho oosoomma'n amma'nnisam is anni sharadiinsi ittona. Ihukkaarem qeessichchi abaroosiinsi bagaan mulli manchi ee keesammi luwwiinsi itoone.

¹⁴« ‹Qeessuwwi abaroosiinsetti ihubee'ek ayyim keesammi kitimiinsi la'oo'n itulas ee kiti'm bitoo ontiinsi mat suumee edaa qeessichchina dabarona.

¹⁵Isra'ee'l oos iina hincaa'llam keesammi kitima qeessuwwi haashaassimmi hasisooyo.

¹⁶Ee keesammi kitima itimmi hasisoobee'i manchi itona cawwitolas ee manchina baaxiil ihaa oo manchi guzumo'amookko. Kitima keesoommok an Waa'a› yihe» yukko.

¹⁷Waa'i Muse'ena

¹⁸«Aaroonina, ixxi oosinaa Isra'ee'l minaadabinaa hundinam ‹Isra'ee'l minaadab te'im ixxuwwinne hee'oo waaraan uga'a te'im gaqqi doo'llinne uwwitam kitima shokkoo kitimina hincaa'llolas

¹⁹ookki eese liiransoo'isina miiqakkam luwwi mahimbee'i labeen te'im gereechchi ambul te'im fellakkichchi ambul ihona.

²⁰Ihukkaarem miiqakkam luwwi yoo ayyi fooraam diinatem hincaa'llolas eekka an aa'oommoyyo.

²¹Ayyi manchim aagu uga'ina te'im ixxi gaqqi doo'llinne uwweena lariinsi te'im gereebbiinsi te'im fella'iinsi mateeyyoo'm kitimina hincaa'oo ammane ookki eese liiransoo'isina miiqakkam luwwi mahim bee'an ihona.

²²Qooqa te'im iiqamma te'im muramma te'im orachchiinsi mar firookkoka te'im qosh te'im bacaro'i yookkoka iina hincaa'llakkotte. Eehido'i diinate kiti'm beyyonne shokkiisakka'a hincaa'akkam kitim issitakka'a iina hincaa'llakkotte.

²³Hore'em qeeraa'lla te'im uulli gunchi diinate gaqqi doo'llinne uwwitakkam kitimina iina hincaa'llakkeena xantakkamo. Ihukkaarem uga'a uwwoommoo yu manchi kitim issaa hincaa'eena xanooyyo.

²⁴Qoccamma te'im laarohoora te'im fenamma te'im muramma iina hinca'llakkotte; eehido'i keeno ki'nnuwwi uullannem kitimtakkotte.

²⁵« ‹Allaggi mannika diinate iina kitim issitakka'a hincaa'llakkotte; eehido'i diinat miiqakkam luwwi yoo diinaxxisa xigamoo bikkina an aa'oommoyyo› yoolla yihe» yukko.

²⁶Waa'i Muse'ena

²⁷«Labeen te'im gereechchik te'im fellakkichchi wotar qaramoo ammane lamar balli afeebe'e aminne hee'ona; ihukkaarem sadeenti balliinsi ki'isaa iina shokkiisakka'a hincaa'akkam kitim ihaa hinceena xanookko.

²⁸« ‹Saayya wee'ichchinne, gereechchom wotarinne maqire mat ballanne duttakkotte.

²⁹Iina galaxxi kitima hincaa'llakkam ammane ookki eese liiransoo'isanne hincaa'llehe.

³⁰Ee kitima ee ballam ittehe bagaan la'm ballina gassitakkotte. An Waa'a.

³¹«I ijaajo egellehe; wonsheheme. An Waa'a.

³²Iikka keesamaakkoo summa haashaassitakkotte; Isra'ee'l minaadab hundim an keesammi ihummisa laqqa'a lonsitona; ki'nnuwwa keesoommi Waa'i anette.

³³An ki'nnuwwina Moollanni iheena Gibxiinsi ki'nnuwwa fissummi Waa'i anette» yukko.