Read Hadiyya Qeessuwwi Kitaaba 23 Bible Online

Qeessuwwi Kitaaba 23 - Hadiyya bible

Qeessuwwi Kitaaba 23

¹Waa'i Muse'ena

²«Isra'ee'l oosina ‹Keesamaakkoo keeno yitakka'a alallaattakkam i ugudduwwi ka keeno.

³Baxo baxxakkam loh balli ki'nnuwwina yookko; ihukkaarem lama'l balli ki'nnuwwina Usheexxaxxi balla. Ee balla iina otossitakkeena wixxi'llehe bagaan maham baxxakkotte; hee'llakkam uulli hundannem Usheexxaxxi balli iina keesamaakkoohane.

⁴Qoodamaakkoo ammanenne «Waa'i ugudduwwa» yitakku'uuyyi alallaattakkam keesammi ugudduwwi ka keeno.

⁵« ‹Luxxi agan aagu tommonnee soo'l balli eelliinchi aagganne Waa'ik Higimmi Ugud asheerookko.

⁶Tommonnee o'onti ballannee odim Qorosho'i Ugud asheerookko; ee taabo lamar balli afeebe'e xale'i urshobee'i qorosho'o ittehe.

⁷Ee saanti luxxi ballanne otossitakkeena wixxi'llehe. Ee balla maham baxxakkotte.

⁸Lamar balli afeebe'e shokkiisakka'a hincaa'akkam kitima iina hincaa'llehe; lama'l ballanne odim ki'nnuwwi baxo hundam uttakka'a otossitakkeena wixxi'llehe› yitaa kure» yukko.

⁹Waa'i Muse'ena

¹⁰«Isra'ee'l oosina ‹An ki'nnuwwina uwwoommi uulla aaggakka'a hurbaata muttakkam ammane luxxi farshima qeessichchina uwwehe.

¹¹Ookki eese liiransoo'isina qeessichchi ee farshima i illagenne wonciwoncaa'ukkuuyyi iina annanni kitim issaa hincaa'ona. Eeham Usheexxaxxi balliinsi awwonaa yoo ballanne issona.

¹²Ee hurbaaxxi kitima hincaa'llakko'i ballannem miiqakkam luwwi bee'i mat hiinchi gereechchi ambula shokkiisakka'a hincaa'akkam kitim issitakka'a iina hincaa'llehe.

¹³Eehanninne maqirem wee'l zaytinne cukkakko'oo lam kiilo'i danaam qama hurbaaxxi kitim issitakka'a hincaa'llehe; eehanni enjim eese liiransoo shokkoo kitim ihookko. Ixxennem mat liitira ihoo woyi'n diqaasa hincaa'llehe.

¹⁴Ka kitima hincaa'immiinsi gaassitakka'a haareechchi hurbaaxxeka qaquulla te'im inqalo te'im qorosho'o sattakka'a ittakkotte. Ku seer waaroo doollenne hundannem ki'nnuwwi oos oos afeebe'ina ihoo seera.

¹⁵« ‹Hurbaaxxeka luxxi farshima iin wonceessakka'a hincaa'llakko'i Usheexxaxxi balli la'm dariinsi ki'isaa lamar saanta xiggehe.

¹⁶Lama'l Usheexxaxxi balliinsi lasage ontayyi ballanne odim haareechchi hurbaaxxeka kitima iina hincaa'llehe.

¹⁷Abaroos abaroosinne lam daabbo'o wonceesimminne annanni kitim issitakka'a iina hincaa'llehe; oo daabbo'i ursho'i exxaakkoo lam kiilo'i danaam qaminne saramaa haareechcho murakka'a wixxoo hurbaaxxi bikkina iina kitim ihaa hincoo hurbaaxxi wona.

¹⁸Ee daabbo'inne maqire miiqakkam luwwi bee'i mat hiinchi gereebbi geexxuwwika lamara, mat labeenaa lam gereebbi ambulluwwaa ebbona. Oo keenim hurbaaxxaanninnee woyi'n diqaas kitiminnee shokkiisakka'a Waa'ina hincaa'akkam hurbaaxxi kitim ihookko. Giirinne hincoo ee kiti'mmek enji eese liiransoohan ihookko.

¹⁹Ee lasage baaxii'l haafixxi kiti'm bikkina mat fellakkichchi ambulaa mateeyyoo'm kitimina mat hiincho ihaakkoo lam gereebbi ambulluwwaa hiincaa'llehe.

²⁰Qeessichchim ee hurbaaxxi wona lamem geexxuwwinnem wonciwoncaa'aa iina annanni kitim issaa hincaa'ookko; oohim qeessichchina sharad ihookko; oo uwwamaa hincu luwwim keesamaakkoohane.

²¹Ee ballanne iina otossakkam dummichchi ihoo'isina alallaattakkamo; matem baxom baxxakkotte; kuk ki'nnuwwi hee'llakkam uullanne hundannem ki'nnuwwi oos oos afeebe'e heer heerina ihoo seera.

²²« ‹Ki'nnuwwi uulliinsi hurbaata muttakka'a wixaa'llakkam ammane ki'nnuwwi uulli gabalanne yookkoka muttakkotte; hurbaata muttakko'i beyyiinsim qiima feettakkeena laso daba'llitakkotte; eekka buxinaa waaraninaa uullehe. An Waa'i ki'nnuwwina Moollanna› yihe» yukko.

²³Waa'i Muse'ena

²⁴«Isra'ee'l minaadabina ‹Lama'l agananne oo agan aagu luxxi ayyaa'm xurumbinne alallaatamaakkoo iina otossimminne tiittakkam Usheexxaxxi balli ihona.

²⁵Ee ayyaamonne shokkiisakkam kitima iina hincaa'llehe bagaan mah baxom baxxakkotte› yihe» yukko.

²⁶Waa'i Muse'ena «Lama'l aga'nnaa'nnonne tommi balli minaadaphphi baaxiilo haafissiisimmina ihoo balli ihu bikkina ee balla iina heeshimminam wixxi'llehe; ee balla maham ittakkotte; shokkiisakkam kitimam iina hincaa'llehe.

²⁸Ki'nnuwwi Moollanni Waa'i illagenne minaadaphphi baaxiilo bi'isoommi ogor ihoo ayyaam ihu bikkina ee balla mah baxom baxxakkotte.

²⁹Ee balla ixxi gaga heeshaa'oobee'ek minaadabiinsi annanni ihaa bi'ona.

³⁰Ee ayyaamonne baxo baxoo manchi ayyim hee'uta'n minaadabiinsi annanni issaa bi'isoommo.

³¹Ee bikkina ee ayyaamonne ma'lluchchom baxxakkambee'isina ku seer hee'llakkam beyyonne hundannem ki'nnuwwi shumo'ina egeramaa afuurookko.

³²Oo agan aagu honsi ayyaa'm eelliinchi aagoo ammaniinsi ki'isaa tommi ayyaa'm eelliinchi aagoo amman afeebe'e baaxiilo biiraa yimmina ki'nnuwwi gaga heeshaa'llehe; ee ayyaamo annanni Usheexxaxxi balli issitakka'a egellehe» yukko.

³³Waa'i Muse'ena «Isra'ee'l minaadabina ‹Lama'l agananne tommiinsii onti balliinsii ki'isaa lamar balli afeebe'e eese lonsakkam Daas Ugud ihookko.

³⁵Ee balluwwiinsi luxxi ayyaamonne iina otossitakkam ugud ihona bagaan maham baxxakkotte.

³⁶Ee lamarem ballannem ballina ballina shokkiisakka'a hincaa'akkam kitima iina hincaa'llakkamo; sadeenti ballina keesamaakkoo dummichcha issitakkamo; iinam shokkiisakka'a hincaa'akkam kitima hincaa'llehe; oohim dummichcha guullitakkam balli ihu bikkina maham baxxakkotte.

³⁷« ‹Shokkiisakka'a hincaa'akkam kitima, wix hurbaaxxi kitima, kitimaa aggi kitimaa qoodamu ayyaammuwwanne iina hincaa'llakkeena ki'nnuwwi alallatakkam keesammi i ugudduwwi ka keeno.

³⁸Ku ugudduwwim i Usheexxaxxi ayyaammuwwinne maqirem edakka'a lonsakkam ugudduwwa; ka ugudduwwanne hincoo luwwi iina uwwitakkam luwwinne, uga'a uwwimmina yitakko'i luwwi wo'mmoohaare uwwitakkam luwwinnee gaqqi doo'llinne hincaa'llakkam luwwinnee exxaa hincoo keeno.

³⁹« ‹Ki'nnuwwi uullika hurbaata wixxaa'llakka'a lasage lama'l agan aagu tommiinsii onti balliinsii ki'isaa lamar balli afeebe'e ka i uguda lonsehe; luxxi ayyaamii sadeenti ayyaamii annanni ihaakkoo usheexxaxxi ayyaammuwwi ihookko.

⁴⁰Ee luxxi ayyaamonne ki'nnuwwi uulli haqqiinsi er misha, dinbaaphphi buyya, buyyaam haqqi caafaa daajji gammalanne mutoo «Ahaayyaa» yakkam haqqichchoo amaddakka'a ki'nnuwwi Moollanni ihummi i illagenne liirantakku'uuyya lamar balli afeebe'e uguda issehe.

⁴¹Ka ugudam hiinchina hiinchina lama'l agananne lamar ballina i ugud issitakka'a lonsehe; kukim ki'nnuwwi shumo'ina hundinam heer heerina uwwamu seera.

⁴²Lamar ballina Isra'ee'l minaadab hundim daassuwwanne afuuttamo.

⁴³Ee bikkina An Waa'i Isra'ee'l minaadaba Gibxiinsi fissummi ammane daasa baxxu'uuyya afuuttamisa issummisa ki'nnuwwi shumo'i hundim laqqakkamo. An Waa'i ki'nnuwwina Moollanna› yihe» yukko.

⁴⁴Muse'e ka'isinne Waa'ika doo'llamu ugudduwwa Isra'ee'l oos egettona la'isukko.