Read Hadiyya Qeessuwwi Kitaaba 25 Bible Online

Qeessuwwi Kitaaba 25 - Hadiyya bible

Qeessuwwi Kitaaba 25

²«Isra'ee'l oosina ‹An ki'nnuwwina uwwoommi uulla aaggakkam ammane uulli gagim i usheexxato lonsona.

³Loh hiincho abuullitakka'a wixxehe; ki'nnuwwi woyinam ballachchehe; misham wixxaa'llehe.

⁴Ihukkaarem lama'l hiinchonne uulli usheexxona; oohim iina Waa'ina usheexxaxxi hiincho. Ee hiincho ki'nnuwwi uullanne wixxakkotte; woyinam ballachchitakkotte.

⁵Wixakkoo'n mutu hurbaata muttakkotte; ballachchakka'a axisakkobee'i woyiniinsim misha wixxaa'llakkotte; oo hiinchi uulli usheexxoo hiinchi ihona.

⁶Ee usheexxaxxi hiincho uulli uwwoo mish hundim ki'nnuwwina, ki'nnuwwi agidina gooninaa meentinaa, miqqakku'uuyyi ki'nnuwwina baxoo baxaaninaa ki'nnuwwinne maqire yo'i waaraaninaa hurbaaxxi misha uwwookko.

⁷Ee'isam ki'nnuwwi mi'n fooraam diinatinaa bii'l moochchinaa uulliinsi firoo luwwi hundim hurbaat ihona.

⁸« ‹Lamar usheexxaxxi hiinchuwwa xige; lamarem usheexxaxxi hiinchuwwam lamarinne fikkaannissoohaare soree honsi hiinchoo ihookko.

⁹Ee lasage hiinchi aagu tommi ayyaamonne ihoo baaxii'l haafixxi ballanne uullanne hundannem xurumba fuggu'uuyyi alallaattam manna asse'llakkamo.

¹⁰Ontayyi hiincho ee'isinne annanni issitakka'a uullanne hee'llam keenina hundinam wolabbano alallaattakkamo. Ka illageen biteesamu uulli hundim anchinam te'im ixxi shumo'ina daba'llona; agiddanina biteesamu manchim ixxi mi'n abaroos beyyo daba'llona.

¹¹Ontayyi hiinchi haafixxi hiinchi ihu bikkina ki'nnuwwi uullanne hurbaata wixxakkamoyyo. Wixxakkoo'n mutu hurbaataa ballachchamubee'i woyi'n mishaa wixxaa'llakkotte.

¹²Oo hiinchi haafixxi hiinchi ihu bikkina ki'nnuwwina keesamaakkoohan ihookko; ki'nnuwwi uullanne ixxi anginnem mutukkoka xale'e ittakkamo.

¹³« ‹Ka illageen biteesamu uulli hundim ka haafixxi hiinchonne annichchinam daba'llookko.

¹⁴Ee bikkina ki moolliinsi Isra'eelchina uulla biteessaattoolas te'im ixxeensi bitaa'llaattoolas dufdufaa'llitte.

¹⁵Haafixxi hiinchi lasage yoo hiinchuwwi xigo shooho'i issitaa ki moolliinsi bitaa'llootto; ixxim hurbaata wixxaa'akkam hiinchuwwa shooho'i issimminne kiina biteesookko.

¹⁶Lobakat hiinchi ihulas bit edookko; hofqax hiinchi ihulas bit hoffe'ookko; mashka'oomim biteesamoo bit issamookkok uulli uwwoo hurbaaxxisannette.

¹⁷Mat mulleka qawwiisoone; ihukkaarem ki'nnuwwi Moollanna baddehe. An Waa'i ki'nnuwwina Moollanna.

¹⁸« ‹Uullanne xumminne hee'llakkeena iikka seeraa gatti ogoraa hundam lonsehe.

¹⁹Uullim lobakat misha uwwoo bikkina ittakkam luwwi hundam siiddakka'a makkixxitakka'a xumminne hee'llakkamo.

²⁰Ihukkaarem ki'nnuwwi «Lama'l hiinchonne sire'e winxumbeelasii atoota wixxaa'nnumbeelasii maha intoommo» yitakka'a xa'mmitakkolas

²¹Loh hiinchonne an uulla maasse'oommo; ee bikkina sas hiinchina ihoo misha uwwookko.

²²Sadeenti hiinchonne sire'e wixxakko'aarem ittakkamok illageen wixxa'llakko'i hurbaatiinsetti ihookko. Honsi hiinchika hurbaata wixaa'llakkeebe'em ee illagee'n hurbaatiinsim ittakkamo.

²³« ‹Uulloom miq biteesamoone; mashka'im oo uulli ihane bagaan ki'nnuwwaneyyo; ki'nnuwwim ee uullanne waaraa'nnisaa koyyisaa afuuttakkona uwwaammo.

²⁴Uulli biteesamoo ammane illagee'n ee uulli annichchi dabaraa bita'eena xanoohan ihukkis la'anchi hasisookko.

²⁵Mat Isra'eelchi buximmiinsi ki'ukkok uulla biteesulas ixxena abbis qarmanchi ee uulla dabaraa ixxena aa'immi hasisookko.

²⁶Ihukkaarem ee uulla ixxena dabaraa bitaa'eena xanoo hincixxi qarmanchi bee'ulas ixxi amaxxa siidoo ammane bitaa'eena xanookko.

²⁷Eekka isseena xanoo ammane biteesu ammaniinsi ki'isaa awwonaa yoo amaxxa dabarakkam hiinchi afeebe'e yoo ammane xigaa bito aa'u manchina diinate dabaraa lasage hosixxeena xanookko.

²⁸Ihukkaarem ee uulla dabaraa bitaa'eena xansiisoo diinat hee'ubeelas hanenne waaroo haafixxi hiinchi afeebe'e ee bitaa'u manchi anganne hee'eena xanookko. Ihukkaarem ee haafixxi hiinchonne uulloom annichchinam daba'llookko; uulli annichchim ixxi gaqqi uullanne daba'llookko.

²⁹« ‹Mat manchi, kululleet kininne ootamaakkoo beero'onne hee'oo ixxi mine biteesuta'n ee biteesamu ammaniinsi yoo mat hiinchi woronne dabaraa hosixximmi hanqi yookko.

³⁰Ihukkaarem ee hiinchi woronne ee mine dabaraa hosixxeena xanubeelas od dabaraa hosixxeena xanooyyo; oo min ee bitaa'u manchina te'im ixxi shumo'ina gaqqi amaxxi ihookko. Haafixxi hiinchonnem biteesu manchina daba'llooyyo.

³¹Kululleet kininne ootamubee'i gattuwwanne hee'oo minneewwa biteesseena xantamok abuulli uulli biteesamoo'isannette ihookko; ee minneewwa annichchi dabaraa bitaa'eena xanookko; haafixxi hiinchonnem annichchina daba'llimmi hasisookko.

³²Ihukkaarem Leewi'i oos ixxuwwina uwwamu beero'uwwanne yoo min hundam ayyi ammanem dabatta'a bitaa'lleena xantamo.

³³Leewi'i oos ixxuwwi beero'onne baxxo'i minneewwa biteessa'a dabatta'a bitaa'lleena xantobeelas haafixxi hiinchonne ixxuwwina daba'llona. Mashka'oomim Leewi'i oos beeroo'uwwanne hee'oo minneewwi Isra'ee'l minaadaphphi lambe'enne hee'llam Leewi'i oosina amaxxa.

³⁴Ihukkaarem Leewi'i oos beero'uwwi kululleetanne yoo diinat hixe allaa'lloo uulli hundim hore'em biteesamooyyo; oo uulli ixxuwwi gaqqi uulli ihaa heer heerina hee'ookko.

³⁵« ‹Kiina moolli ihu Isra'eeliinsi mat buxaa ixxi gaga xanimma hooguta'n kiinninne hee'oo waaraanchina te'im koyyiinchina hara'mmitoo'isam hara'mme.

³⁶Kiina moolli ihu Isra'eelchi kiinninne hee'ona cawwihe; qaro'o eddaa miqissitte. Eese Waa'a badde.

³⁷ Liqaayye uwwitoo diinatiinsi qaro'o hassitte; ixxena biteessitti hurbaatiinsim exxo'o xa'mmititte.

³⁸Kana'aa'n uulla ki'nnuwwina uwweenaa ki'nnuwwina Waa'a iheenaa Gibxi uulliinsi ki'nnuwwa fissummi Moollanni Waa'i anette.

³⁹« ‹Kiina hincitenne hee'oo ki moolli ihu Isra'eelchi buxoomiinsi ki'ukkok agishshi ihaa kiina baxeena ixxi gaga biteesulas agid baxoo bax hundam baxoo'isa issititte.

⁴⁰Hanenne waaroo haafixxi hiinchi afeebe'e qaxxarakko'i awwaadaanchisa kiina awwaadukkuuyyi waaraa'nnisa kiinninne maqire hee'ona.

⁴¹Ee lasage ixxim ixxi oosinne maqirem kiinniinsi annanni ihaa ixxi qarmanni beyyoo ixxi anno'i amaxxi yoo beyyoo daba'llona.

⁴²Isra'ee'l minaadab An Gibxi uulliinsi wolabbanonne fissummi i awwaadaan ikko'i bikkina agid ikka'a biteesanchi hasisooyyo.

⁴³Ixxuwwa u'nnissittuuyyi gassititte; ihukkaarem eese ki Waa'a badde.

⁴⁴Kiina agid ihoo'isina hassootti goonaa meentoo ki kululleetanne yo'i mulli minaadabiinsi bitaa'lleena xantootto.

⁴⁵Ee'isam ki'nnuwwi lambe'enne hee'oo waaraaniinsii ixxuwwi oosiinsii agido bitaa'llehe; ixxuwwim ki'nnuwwina amaxxi ikkona.

⁴⁶Ixxuwwam ki'nnuwwi oosina lago aa'issehe; ixxuwwim ki'nnuwwi oosina hee'llam heechchi doollenne hundannem agid ikkamisa issehe. Ihukkaarem ki'nnuwwina moolli ihu Isra'ee'l minaadaba u'nnissakku'uuyyi gassitakkotte.

⁴⁷« ‹Ayla'ukko ki lambe'enne hee'oo mat waaraanchi te'im koyyiinchi goddaanchi ihaa ki moolli ihu Isra'eelchi buxaa ee waaraanchina te'im koyyiinchina te'im ixxi abaroosiinsi matina oo Isra'eelchi ixxi gaga biteesuta'n

⁴⁸ee lasage daba'llaa bitaa'ameena xanookko; ee bikkina ixxi abbaayyuwwiinsi mat dabaraa bitaa'ona.

⁴⁹Te'im ixxi anni abbaayyi te'im ixxena annabbaayyi beet te'im ixxena abbis qar ihoo keeniinsi mat dabaraa bitaa'eena xanookko; ihoo qax diinate hee'ulas ixxi wolabbano ixxim dabareena xanookko.

⁵⁰Ookki ihoo ammane bitaa'u manchinne atoorarona; ixxi gaga biteesu hiinchiinsi ki'isaa awwonaa yoo Iyyoobeeliyyu'i hiinchi afeebe'e doolle xigona; ixxo wolabbaninne geegeesimmi bit ee hiinchuwwanne diinatinne qaxxaramaa baxoo manchina miqakkamisanne qoodamona.

⁵¹Lobakat hiincho gatulas ixxuwwi xiqqisanne ee biteesamu bitiinsi gatukkoka dabarona.

⁵²Iyyoobeeliyyu'i hiinchi afeebe'e gatookkok hofqax hiinchi ihulas ee gatu hiinchi xiqqisanne wolabba'n diinate miqona.

⁵³Hiinchiinsi hiinchi afeebe'e qaxxaramu awwaadaanchisa ihaa hee'ona; moollannim ixxo u'nnisukkuuyyi gassoone.

⁵⁴Ka'isinne wolabbano siideena xanubeelas hanenne waaroo Iyyoobeeliyyu'i hiinchonne ixxoo ixxi oosoo kora'am fatakihona.

⁵⁵Isra'ee'l minaadab i awwaadaan ikko'i bikkina Isra'eeliinsetti ihu ayyi manchim heer heerina agishshi ihaa hee'immi hasisooyyo. Mashka'oomim Isra'ee'l minaadab an Gibxi uulli agiddaniinsi fissummi i awwaadaano; an ixxuwwina Moollanni Waa'a.