Read Hadiyya Qeessuwwi Kitaaba 26 Bible Online

Qeessuwwi Kitaaba 26 - Hadiyya bible

Qeessuwwi Kitaaba 26

¹« ‹Ki'nnuwwi ee keenina otossitakkeena qophpha'n waa'i misila baxxakkotte; misila te'im soodda te'im shobamaakkoo ki'n utuba ki'nnuwwi uullissakkotte; an Waa'i ki'nnuwwina Moollanna.

²Iikka usheexxaxxi ayyaammuwwa egellehe; i Keesammi beyyom lonsehe; an Waa'a.

³« ‹I seera awwontakkolasii i ijaaj hundam egettakkolasii

⁴ki'nnuwwik uulli hurbaatinne, haqqim mishinne wo'mmaakkoohane ihoo'isina xeena ammaninne ga'nnisoommo.

⁵Ki'nnuwwik hurbaat lophphaakkoohane ihukkaanniinsi ki'aa hurbaata muttakka'a wixxaa'llakka'a guullitakkoo'nnim woyi'n misha feettakkam amman afookko. Woyi'n misha feettakka'a guullitakkoo'nnim wix hurbaata wixxakkam amman afookko; hurbaata godditakka'a ittakkamo. Xumminne ki'nnuwwi uullanne hee'llakkamo.

⁶« ‹Ki'nnuwwi uullina xumma uwwoommo; ayyem badditakkoo'n matem baachchi bee'em iinse'llakkamo; jor moochcham ki'nnuwwi uulliinsi bi'isoommo; ka lasage ki'nnuwwi uullanne or hee'ooyyo.

⁷Ki'nnuwwi diina'a hollitakkamo; ki'nnuwwi illagennem orinne beedditamo.

⁸Ki'nnuwwik onti ki'nnuwwi diina'ika xibbe kaa'llamo; ki'nnuwwik xibbi odim ki'nnuwwi diina'ika tommi kuma kaa'llamo; ki'nnuwwik diina'i orinne ki'nnuwwi illagenne beedditamo.

⁹I illem uratinne ki'nnuwwi kollonne dabaroommo; ki'nnuwwi shumo'om fikkaannisoommo; ki'nnuwwinne aagummi i hidi'l sagaram qoxxisoommo.

¹⁰Ittakku'uuyyi yoo ludmaaraqqi hurbaat sechchiinsi beeddoo'nnim kamaaraqqi hurbaatina beyyo fatakissiissakkamo.

¹¹Anim i heechchi beyyo ki'nnuwwi lambe'enne issoommo; ki'nnuwwam shigigoommoyyo.

¹²An ki'nnuwwinne maqire maroommo; ki'nnuwwinam Waa'i ihoommo; ki'nnuwwim i minaadab ikkakkamo.

¹³Gibxi uulli mannina agid ikkakkambee'isa Gibxi uulliinsi fissummi ki'nnuwwi Moollanni Waa'i anette. Ki'nnuwwanne iyyiisamaa hee'u agidda'n gaanjaqqa iiqaa xabbitakka'a mattakkamisa issaammo.

¹⁴«Ihukkaarem eese macceessakkobeelas, ka ijaajom egettakkobeelas,

¹⁵iikka gatti ogora egettakkobeelas, i seeram gaddakkolasii i ijaajo hundam egerimma hoogimminne i hidi'l sagara ginditakkolasii

¹⁶anim ka keeno ki'nnuwwanne eboommo. Dangonne muggitakkamisa, qasaa ki'nnuwwi ille bi'isookkokaa lobakata jiissoo iibbaa ki'nnuwwanne fatakoommo. Wixxakkam hurbaat ki'nnuwwina awwaadooyyo. Mashka'oomim eekka itookkok ki'nnuwwi diina'a.

¹⁷Quuqimminne i ille ki'nnuwwanne dabaroommo; ki'nnuwwi diina'im ki'nnuwwa kaa'ookko; ki'nnuwwa saboo keenim ki'nnuwwa gassookko; ayyim holloo'n gibbakkamo.

¹⁸« ‹Kuk hundim ki'nnenne afaa lasagem iina ijaajantakkambee'an ihulas ki'nnuwwi baaxii'l bikkina ki'nnuwwanne eeboommi guzumo'o illagee'nnaanniinsi lamar kore lophphoo'isa issoommo.

¹⁹Ki'nnuwwi daba'llitakkambee'isa issoo bolxooma bi'isoommo. Iimane xaa'llisa qoxxisaa xeen ga'nnoobee'isa issoommo; uullim gogaa naas xaa'llisa ihoo'isa issoommo.

²⁰Ki'nnuwwik uulli hurbaata haqqim misha uwwoobee'i bikkina kora'am badattakkamo.

²¹« ‹Eesenne moo'issakkam boqooma uttakkobeelasii eesem macceessakkambee'an ihulasii ki'nnuwwik baaxiil lophphukkisanne illagee'nnaanniinsi lamar kore lophphoo boobana ki'nnuwwanne eeboommo.

²²Ki'nnuwwina moochcha asse'oommo; oo moochchi hundim ki'nnuwwi ooso shookko; ki'nnuwwi mi'n fooraam diinatem shookko; ki'nnuwwiinsi xale'i hofqax mannim gatoo bikkina ki'nnuwwi bobba'i hundim dihookko.

²³« ‹Oo guzumo'i hundim ki'nnuwwanne afaa lasage eese macceessakkobeelasii eese sabimmannem qoxxitakka'a uullitakkolasii

²⁴anim ki'nnuwwina diinakkichchi ihoommo; ki'nnuwwi baaxii'l bikkinam illagee'nnaanniinsi lamar kore lophphaakkoo'isinne ki'nnuwwa guzumo'oommo.

²⁵Iinninne aaggakko'i hidi'l sagara ginditakko'i bikkina ki'nnuwwika baado miqiseena ki'nnuwwanne ora eeboommo; ki'nnuwwi beero'uwwannem wixxitakkolas fayye'llakkeena xantakkambee'i jabbinne ki'nnuwwa aphphisoommo; diina'inam ki'nnuwwi anga uwwitakkamo.

²⁶Hurbaat bee'oo'isa issoommi ammane tommi meentichcho mat mixaadanne hinjeera sattamo. Ee hinjeeram qoodda'a uwwitamo; ki'nnuwwim ittakkamo; ihukkaarem godditakkamoyyo.

²⁷« ‹Oo luwwi hundim ki'nnuwwanne ihaa lasage iina ijaajantakkobeelasii boqqitakkolasii

²⁸ki'nnuwwanne quunqinne ki'oommo; ki'nnuwwi baaxii'l bikkina ki'nnuwwanne eeboommi guzumo'om illagee'nnaanniinsi lamar kore edoommo.

²⁹Ee bikkina sibaar lophphimmiinsi ki'ukkaaninne ki'nnuwwi ooso ittakkamo.

³⁰Duunnuwwanne yoo otossakkam beyyi hundam bi'isoommo; aduruusa kitimtakkam beyyi hundam gindansoommo; ki'nnuwwi leesham leeshisa ubu otossitakkam ki'nnuwwi waa'uwwanne ubbuusoommo; ki'nnuwwa hore'em shigigoommo.

³¹Ki'nnuwwi beero'uwwam guullaa bi'isoommo; ki'nnuwwi otossitakkam beyyi hundam gindansoommo; ki'nnuwwika enje'oo kitima aa'oommoyyo.

³²Ee uullanne hee'oo ki'nnuwwi diina'i maalalteebe'e ee uulla guullaa bi'isoommo.

³³Ki'nnuwwanne ora ki'isaa hanqo'i Waa'a laqqambee'l minaadaphphi uullanne hundannem binnaa'oomo; bisa'am ki'nnuwwanne ki'isiisoommo; ki'nnuwwi uullim manni bee'ane ihookko; ki'nnuwwi beero'uwwim diihookko.

³⁴Ki'nnuwwi, ki'nnuwwi diina'i uullanne hee'llakkam hundem hiinchonnem ki'nnuwwi uulli ma'llichchim bee'an ihoo bikkina usheexxaxxi hiinchuwwa lonsookko; ee lasage uulli usheexxaa usheexxaxxi ayyaammuwwanne usheexxaa liiramookko.

³⁵Uulloom ki'nnuwwi hee'llakko'i ammane usheexxixxi ammanenne siidubee'i usheexxato kaba manni bee'i ammanenne usheexxaakko.

³⁶« ‹Ki'nnuwwiinsi foorinne diina'i uullanne gatto'i keen muggitamisa issoommo. Hafachchi buyya heekkeesoo ammane ee sagara macceessa'a bobatta'a gibbamo; ixxuwwa hollookkok hee'oo'nnim oriinsi giboo mannisa gibbamo; qolanta'ahim ubbamo.

³⁷Ayyim ki'nnuwwa holloo'n oriinsi gibbakkaman ikkakka'a mat mullaanni hanenne qolantakka'a ubbakkamo; ki'nnuwwi diina'inne ayyennem uullixxantakka'a qasantakkeena xantakkamoyyo.

³⁸Hanqo'i Waa'a laqqambee'i minaadaphphi lambe'enne bi'llakkamo; ki'nnuwwi diina'i uullannem xuuxantakka'a gattakkamo.

³⁹Ki'nnuwwina diina'i uullanne lehiinsi gattakko'i keen ki'nnuwwi baaxii'l mashka'innee ki'nnuwwi anno'i baaxii'l mashka'innee mat mat ikkakku'uuyyi beedditakkamo.

⁴⁰Ihukkaarem ki'nnuwwi shumo'i iina amma'nnancha hooggo'i ixxuwwi baaxiilo, eesenne boqqito'i ixxuwwi baaxiiloo ixxuwwi anno'i baaxiiloo biiraa yitolas

⁴¹oohim an ixxuwwina diinakkichchi ihoommisinaa ixxuwwi diina'i ikko'i manni uulla mattamisa issoommisinaa issu ixxuwwi baaxiilo biiraa yitolas ixxuwwik duud wodan iiqamaa ixxuwwi baaxii'l bikkina laboo guzumo'o aa'llolas

⁴²Yaaqoobinne, Yisaaqinnee Abraaminnee aagummi hidi'l sagara sawwoommo; ee uullam i minaadabina uwweena aagummi neeyyaxxi sagara areesoommo.

⁴³Uulloom ixxuwwi utta'a matto'i bikkina diihookko. Ixxuwwi bee'i ammane udma'i ihaa usheexxukkisam usheexxaa liiramookko; ixxuwwim i seera sholliisso'i bikkinaa gatti ogoram gaddo'i bikkinaa ixxuwwi baxxo'i baaxii'l mashka'inne guzumo'antamo.

⁴⁴Ihona bagaan ixxuwwi diina'i uullanne hee'llu'uuyya guullaa saboommoyyo te'im guullaa bi'isoommoyyo; ookki ihukkan ihulasa'e ixxuwwinne maqire aagummi hidi'l sagara lasaanchi afeebe'e egerummoyyi hee'ummo; an Waa'i ixxuwwina Moollanna.

⁴⁵Ihukkaarem ixxuwwina Waa'i ihoommisina mulli minaadab moo'llo'uuyyim Gibxi uulliinsi fissaa ixxuwwi anno'inne aagummi hidi'l sagara sawwoommo. An Waa'a› yihe» yukko.

⁴⁶Waa'i ixxi lambe'ennee Isra'ee'l minaadaphphi lambe'ennee Muse'enne ihaa Siina'i duunanne uullisu gatti ogorii seerii ka keeno.