Read Hadiyya Qeessuwwi Kitaaba 27 Bible Online

Qeessuwwi Kitaaba 27 - Hadiyya bible

Qeessuwwi Kitaaba 27

¹Waa'im Muse'ena «Isra'ee'l minaadabina ka'isa yihe; mat manchi Waa'ina uga'a uwwoommo yukkoka wonshoohaare oo uga'a uwwoommo yukkokim manchi ihulas bitaa'oo at gooxxitisanne ihona; oohim

³Waa'a uunxaxxi minenne la'amaakkoo keenaanchonne umur lamiyyiinsi ki'isaa lohayyi afeebe'e ihoo goonchina loh xibbi giraama kee'mmoo kin bir ihona.

⁴Umur lamiyyiinsi ki'isaa lohayyi afeebe'e ihoo meentichchona sad kin bir ihona.

⁵Umur ontiinsi lamiyye ihoo goonchik lamiyyi kin bir ihona; umur ontiinsi lamiyye ihoo meentichchok tommi kin bir ihona.

⁶Umur mat aganiinsi ki'isaa onti hiinchi afeebe'e ihoo goo'nnek onti kin bir ihukkuuyyi ee umuranne yoo meentik sas kin bir ihona.

⁷Umur lohayyi hiinchiinsi hanaan ihu goonchik tommoo onti kin bir ihukkuuyyi ee umuranne yo'i meentichchok tommi kin bir ihona.

⁸«Uga'a uwwoommo yu manchi ee bito miqeena xanoobee'an ihulas ee uwweena sawwu mancho qeessichchi beyyo eebona; qeessichchim oo uga'a uwwoommo yu manchi miqeena xanoo'isanne bito murona.

⁹«Manchom uwwoommo yu uga'i Waa'ina kitim ihaa hincoo fooraam diinat ihulas eehanni bito miqooyyo; Waa'ina hincu kitim hundim Waa'ina annanni ihaakkoohan ihookko.

¹⁰Oo manchi mishisoo fooraam diinate mishisoobee'i fooraam diinatinne, dabaransoone; mato bikkoo'isina mulleka hincaa'ukkaarem lamim Waa'ina annanni ikko'oo keen ikkamo.

¹¹Oo kitimim Waa'ina kitim issakka'a hincaa'akkeena Waa'i aa'oobee'i muccuroombee'i fooraam diinat ihulas oo manchi ee fooraam diinate qeessichchi beyyo eebona.

¹²Qeessichchim oo fooraam diinat mishisoo'isaa mishisoobee'isaa moo'aa bito murona; oo bitim lasanchi bit ihookko.

¹³Ee fooraam diinaxxi annichchim dabaraa bitaa'eena hasulas eehanni bitonne xibbiinsi lamiyyi anga edona.

¹⁴«Mat manchi ixxi mine Waa'ina annanni issaa hincaa'ulas qeessichchi oo min jor ihukkisaa danaam ihukkisaa moo'aa bito murona; oo bitim lasaanchi bit ihookko.

¹⁵Ihukkaarem ee mi'n annichchi ee mine dabaraa bita'eena hasulas eehanni bitonne xibbiinsi lamiyyi anga edona.

¹⁶«Mat manchi ixxi gaqqi uulliinsi baxxansaa Waa'ina annanni issaa uwwulas ee uullanne wixakkam zerettisanne bit muramona; oohim mat mat kiilo'i so'o massoo uullina ontayyi kin bira miqona.

¹⁷Ee uulla haafixxi hiinchi higukkisam annanni issaa uwwulas eehanni bito hundam miqimmi hasisookko.

¹⁸Uullooma uwwookkok haafixxi hiinchi higaa lasagette ihulas waaroo haafixxi hiinchi afeebe'e yoo gatu amma'nneka xigimminne eehannik bit hoffe'oo'isa issona.

¹⁹Ee abuulli uulla uwwu manchi dabaraa bitaa'eena hasulas illagee'n bitaannonne xibbenne lamiyye edaa miqona; ee lasage ixxan ihookko.

²⁰Ihukkaarem ellageen ee uullina annichchi hee'u manchi Waa'ina uwwu ixxi gulummi issoo'nnim mulli manchina biteesaa siidamulas ee uulla dabaraa bitaa'oo hanqi hee'ooyyo.

²¹Illagee'n uulli annichchina dabarimmina xansiisoobee'i oo uulli hanenne waaroo haafixxi hiinchonne Waa'ina annanni ihaa hee'oo Waa'i amaxxi ihookko. Ookkim qeessichchi sharad ihookko.

²²«Mat manchi ixxi gulummi issaa lago aa'ubee'i uulla, ihukkaarem mulli manchiinsi bitaa'u abuulli uulla Waa'ina annanni issaa hincaa'ulas,

²³Qeessichchi eekka moo'aa waaroo haafixxi hiinchi afeebe'e yoo bito murona; oo manchim ee ayyaamoom eehanni bito miqona; oo diinatim Waa'ina keesamaakkoohan ihookko.

²⁴[3]Iyyoobeeliyyu'i hiinchonne oo abuulli uulli illageen biteesu manchina te'im ixxi shumo'ina gulummi ihaa daba'llona.

²⁵Eekee'nnek annannichchikim bit muramookkok Waa'i uunxaxxi «Saqil» yamamoo keennaanchonnette ihukkuuyyi mat saqil lamiyyi kiilo giraama.

²⁶«Fooraam diinatiinsi won Waa'an ihu bikkina ayyi manchim ixxi gaqqi doo'llinne uwwoohan issaa hincaa'eena xanooyyo; labeenam ihukko gereechchi geex te'im fellakkichchi geex illageenim Waa'ina annanni ihaakkoo keeno.

²⁷Ihukkaarem miiqakkam luwwi yoo fooraam diinaxxek won erisa la'amaakkoo bitonne xibbenne lamiyye edaa bitaa'eena xanookko; Ihukkaarem ee fooraam diinaxxi annichchi bitaa'oobee'an ihulas laboo bitina mulli mannina biteesamona.

²⁸Mat manchi, manchom ihukko fooraam diinate te'im uulla issaa lasage biteeseenam ihukko dabaraa bitaa'eena hore'em xanooyyo.

²⁹Lehoo'isina oogatakko'i manchi eekka dabaraa bitaa'eena xanooyyo; eehido'i manchi lehim hasisookko.

³⁰Uulliinsi siidamoo wix hurbaatiinsim ihukko mulli mishiinsi tommiinsi mat Waa'ina annanni ihaakkoohane.

³¹Ee tommiinsi mato uwwu luwwiinsi maham dabaraa bitaa'eena hasoo manchi erisa la'amaakkoo bitonne xibbenne lamiyye edaa bitaa'eena xanookko.

³²Mi'n fooraam diinatiinsi tommiinsi mat Waa'i sharada; oo fooraa diinat xigamoo ammanem tommiinsi mat Waa'ina keesamaakkoohane.

³³Ee diinaxxi annichchi ee fooraam diinate hagarinne hagarinne beyyo amadiisoo ammane miiqakkam luwwi yookkoka miiqakkam luwbee'aanniinsi annanni issoone; matinam mulleka masalo'i issoone; mat fooraam diinatina mulleka masalo'i issulas lamem fooraam diinatim Waa'ina keesamaakkoohan ihona; eekka la'mmage dabarakka'a bitaa'akkeena xanakkamoyyo» yukko.

³⁴Isra'ee'l minaadabina kuroo'isina Muse'e, Siina'i duunanne hee'u ammane Waa'i uwwu ijaaj hundim eekeeno.