Read Hadiyya Qeessuwwi Kitaaba 3 Bible Online

Qeessuwwi Kitaaba 3 - Hadiyya bible

Qeessuwwi Kitaaba 3

¹« ‹Ayyi manchim mateeyyoo'm kitimina lariinsi hincaa'oo ammane miiqakkam luwwi bee'i mat labeena te'im addichcho doo'llaa i illagenne hincaa'ona.

²Kitimina hincaa'oo diinaxxi horoorenne anga issona; Keesammi Dukkaa'n gooc gadanonnem durona; Aaroon shumo'i ikko'i qeessuwwim ee xiiga kiti'm beyyi midaadduwwanne wixxona.

³Mateeyyoo'm kitimiinsi iina giirinne shokkiisakka'a hincaa'akkam kitimina godaphphi mu'uta ifiisoo di'ira, godaphphi mu'utanne yoo di'ir hundam,

⁴lamem muro, lamem muronnee midaadonnee yoo di'iraa afare ifiisoo iillanchi'nnoo'i diraa ihimmi hasisookko.

⁵Aaroon shumo'i kiti'm beyyonne aphphoo haqqanne shokkiisakka'a hincaa'akkam kitiminne maqirem shokkiissona. Oohim giirinne shokkaa enji eese liiransoo kitim ihookko.

⁶« Mateeyyoo'm kitimina hincookkok gereebbiinsetti ihulas miiqakkam luwwi bee'i ambul te'im geex ihona.

⁷Ayyi manchim kitimina hincaa'ookkok gereechchi geex ihulas i illagenne hincaa'ona.

⁸Angam ee geex horoorenne issona; eeham Keesammi Dukkaa'n gooc illagenne durona. Aaroon shumo'i ikko'i qeessuwwim ee xiiga kiti'm beyyi midaadduwwanne wixxona.

⁹Mateeyyoo'm kitimiinsi di'ira, saassaa'l miq lugum afeebe'e murakka'a fissakko'i sheerimo, godaphphi mu'uta ifiisoo di'ira,

¹⁰lamem murom di'irinnemii afare ifiisu iillaanchi'nnoo'i di'irii shokkiisakka'a iina hincaa'akkam kitimina hincihona.

¹¹Qeessichchim ee hundam giirinne iina hincoo kiti'm hurbaat issaa kiti'm beyyonne shokkiisona.

¹²« ‹Kitimina hincaa'ookkok fellakkichchi ihulas i illagenne hincaa'ona.

¹³Angam fellakkichchi horoorenne issona; eeham Keesammi Dukkaa'n gooc illagenne durona. Aaroon shumo'i ikko'i qeessuwwim ee xiiga kiti'm beyyi midaadduwwanne wixxona.

¹⁴Ee hincaa'u kitimiinsi shokkiisakka'a iina hincaa'akkam kitimina godaphphi mu'uta ifiisoo di'ira, godaphphi mu'utanne yoo di'ira hundam,

¹⁵lamem muro, lamem muronnee midaadonnee yoo di'iraa afare ifiisoo illaanchi'nnoo'i diraa hincaa'ona.

¹⁶Qeessichchim ee hundam enji eese liiransoo kitim issaa kiti'm beyyonne shokkiisona; di'ir hundim iina annanni ihaakkoohan ihona.

¹⁷Isra'eeliinsi ayyim di'ira te'im xiiga ixxi heechchi doolli hundannem itoone; oohim heer heerina ki'nnuwwi oos oos afeebe'e hee'oo seera› yihe» yukko.