Read Hadiyya Qeessuwwi Kitaaba 4 Bible Online

Qeessuwwi Kitaaba 4 - Hadiyya bible

Qeessuwwi Kitaaba 4

¹Waa'i odim Muse'ena

²«Isra'ee'l oosina ‹Ki'nnuwwiinsi ayyim hushamaa baaxiilo baxulas te'im i ijaajiinsi mato la'oo'n gindulas

³ee'isam Hundiinsi lob qeessichchi minaadab hawwodukkaannisa issoo baaxiilo baxulas ee baaxii'l haafixxi bikkina miiqakkam luwwi bee'i mat labeena iina kitim issaa hincaa'ona.

⁴Ee labeenam Keesammi Dukkaa'n gooc illagenne hincaa'ona; labee'n horoorennem anga issaa i illagenne durona.

⁵Ee lasage oo doo'llamu qeessichchi ee labee'n xiigiinsi hofqaxam amadaa dukkaana aagona.

⁶Ixxim ee xiiganne maxxaara cefukkuuyyi du'm eddechchi miinsanne i illagenne lamar kore wixona.

⁷Ee'isam ee xiigiinsi Keesammi Dukkaa'n woronne aduruusa wiriissakkam beyyi lamejji buudduwwanne labona; ihukkaarem gatu xiiga hundam Keesammi Dukkaa'n goocanne kitima shokkiisakka'a hincaa'akkam kiti'm beyyi lugumonne dunona.

⁸Baaxii'l haafixxi kitimina hincu labee'nneka di'ira hundam annanni ssona. Oohim godaphphi mu'uta ifiisoo di'ira, godaphphi mu'utanne yoo di'ira,

⁹lamem muro, lamem muronnee midaadonnee yoo di'iraa afare ifiisoo illaanchi'nnoo'i di'iraa

¹⁰mateeyyoo'm kitimina hincu labee'nnaannisam hincaa'ona. qeessichchim shokkiisakka'a hincaa'akkam kiti'm beyyonne shokkiisona.

¹¹Ihukkaarem ee labee'nneka omachcho, maara hundam, horoore, lokko, goodaphphi mu'utaa cumaa

¹²wiidda'n beyyiinsi tochchonne gii'lbuchcha uunjakkam muccur beyyonne massaa haqqa wixxaa'aa giirinne shokkiisona.

¹³« ‹Lachchoonginne Isra'ee'l minaadab hundim baaxiilo baxulasii oo baaxiilim ixxuwwiinsi daphphaa an ijaajummi ijaajiinsi mato gindimminne ixxuwwa baaxiilaan issulasii

¹⁴oo baaxiil la'amukkisam minaadab baaxii'l haafixxi kitimina ihoo mat labeena eebbona; ee labeenam Keesammi Dukkaa'n illagenne hincaa'llona.

¹⁵Isra'ee'l awwonsaanim ixxuwwi anga ee labee'n horoorenne issitona; ee Keesammi Dukkaa'n illagennem duramona.

¹⁶Oo qeessichchim ee labee'n xiigiinsi hofqaxam amadaa Keesammi Dukkaa'n woro aagona.

¹⁷Ixxim ee xiiganne maxxaara cefukkuuyyi du'm eddechchi miinsanne i illagenne lamar kore wixona.

¹⁸Ee'isam ee xiigiinsi Keesammi Dukkaa'n woronne aduruusa wiriissakkam beyyi buudduwwanne labona; ihukkaarem gatu xiiga hundam Keesammi Dukkaa'n goocanne shokkiisakka'a hincaa'akkam kitima kitimakkam beyyi lugumonne dunona.

¹⁹Ee lasage odim ee labee'nneka di'ira hundam massaa kiti'm beyyonne shokkiisona.

²⁰Baaxii'l kitimina hincu labeenanne issu ogo'llisam ka labeenannem issona. Ee'isinne qeessichchi minaadaphphek baaxiil haafamoo'isa issookko; baaxiilim haafamookko.

²¹Ee lasage labeena wiidda'n beyyiinsi tochchonne fissaa ixxi baaxii'l haafixxi bikkina hincaa'u labeena shokkiisukkisam shokkiisona; oohim minaadaphphek baaxiil haafamoo'isa issoo kitima.

²²« ‹La'oo'n huushanchinne i ijaajiinsi mato gindimminne baaxiilo baxaa hawwodukkok minaadabina awwonsaanchi ihulas

²³baaxiilo baxukkisa la'ukkisam miiqakkam luwwi bee'i fellakkichchi ambula baaxii'l haafitina ihoo kitim issaa hincaa'ona.

²⁴Ixxeka anga fellakkichchi horoorenne issaa shokkoo kitimina hincoo fooraam diinat duramoo beyyonne i illagenne durona; oo kitimim baaxii'l haafitina ihookko.

²⁵Qeessichchim ee kiti'm xiiganne maxxaara cefaa shokkiisakka'a hincaa'akkam kitima kitimakkam beyyi soorem lamejji buudduwwannem labona; eehanniinsi gatukkoka odim ee kiti'm beyyi lugumonne dunona.

²⁶Mateeyyoo'm kitimina hincu diinaxxi di'ira shokkiisu ogo'llisam kannikam di'ira hundam kiti'm beyyonne shokkiisona. Ee'isinne qeessichchi minaadaphphi awwonsaanchika baaxiilo haafissiisookko; ee awwonsaanchi baaxiilim haafamookko.

²⁷« ‹Baaxiilo baxukkokii an ijaajummi ijaajjeewwiinsi mato la'oo'n gindaa baaxiilaanchi ihukkokii minaadabiinsetti ihulas

²⁸baaxiilo baxukkisa la'ukkisam miiqakkam luwwi bee'i meentichchi fellakkichcho baxu baaxii'l haafixxi bikkina kitim issaa hincaa'ona.

²⁹Ixxi angam ee fellakkichchi horoorenne issona; shokkiisakka'a hincaa'akkam kiti'm diinate durakkam beyyonnem baaxii'l haafixxi kitim issaa durona.

³⁰Qeessichchim ee fellakkichchi xiiganne maxxaara cefukkuuyyi shokkiisakka'a hincaa'akkam kiti'm beyyi soorem lamejjannem yoo buudduwwanne labona. Eehanniinsi gatu xiiga ee kiti'm beyyi lugumonnem dunona.

³¹Mateeyyoo'm kitimina hincoo diinaxxi di'ira feeraa issukkisam ka fellakkichchi di'iram feerona; enjim eese liiransoo kitim issaa kiti'm beyyonne shokkiison. Qeessichchi ee manchi baaxiilo ee'isinne haafissiisookko; ee manchi baaxiilim haafamookko.

³²« ‹Oo manchi ixxi baaxii'l haafixxi kitimina hincaa'eena hasukkok gereebbiinsetti ihulas miiqakkam luwwi bee'i meentichchi gereechchi ihona.

³³Ixxi angam ee gereechchi horoorenne issona; shokkiisakka'a hincaa'akkam kiti'm diinate durakkam beyyonnem baaxii'l haafitina kitim issaa durona.

³⁴Qeessichchim ee gereechchi xiiganne ixxi maxxaara cefukkuuyyi shokkiisakka'a hincaa'akkam kiti'm beyyi soorem lamejjanne yoo buudduwwanne labona. Gatu xiigam ee kiti'm beyyi lugumonnem dunona.

³⁵Ee lasage mateeyyoo'm kitimina hincu diinaxxi di'ira feeraa issukkisam ee gereechchi di'ira hundam feerona; kiti'm beyyonne iina giirinne hincaa'akkam kiti'mmisam shokkiisona. Qeessichchi ee manchi baaxiilo ee'isinne haafissiisookko; ee manchi baaxiilim haafamookko.