Read Hadiyya Qeessuwwi Kitaaba 5 Bible Online

Qeessuwwi Kitaaba 5 - Hadiyya bible

Qeessuwwi Kitaaba 5

¹« ‹Ayyi manchim moo'ukkoka te'im la'ukkoka xa'mmamaa naqqasimma sabulas ixxena baaxiil ihookko.

²« ‹Ayyi manchim haashaarammi luwwa oohim mi'n diinaxxeka bayta bii'l moochchikaa biqinne shuroo qooccanchuwwikaa leesha la'oo'n nakkulas eekka la'u ammaniinsi ki'isaa ixxena baaxiil ihookko.

³« ‹Ayyi manchim manni orachchiinsi daadoo haashaarammi luwwa la'oo'n nakkulas eekka la'u ammaniinsi ki'isaa ixxena baaxiil ihookko.

⁴« ‹Ayyi manchim eranem ihukko jor luwwa isseena qoossoo'nnim hide'ulas ookki huushanchi ihukkisa la'u ammaniinsi ki'isaa ixxena baaxiil ihookko.

⁵« ‹Ayyi manchim ka keeniinsi mato baaximminne baaxiilaanchi ihulas ee baaxiilo biiraa yihona.

⁶Oo manchi baxu baaxii'l haafixxi bikkina meentichchi gereechcho te'im fellakkichcho iina baaxii'l haafixxi kitim issaa hincaa'ona; qeessichchim ee baaxiilo haafissiisookko.

⁷« ‹Ayyim ixxi baaxii'l haafixxi bikkina gereechcho te'im fellakkichcho hincaa'eena xanubeelas lam handare'e te'im handare'i wotalla matoo baaxii'l haafixxi kitimina la'mmekaa shokkoo kitimina iina hincaa'ona.

⁸Ixxim ee keeno eebaa qeessichchina uwwona; qeessichchim ee keeniinsi matika horoore muroo'nnim gaanje booqaaqaa baaxii'l haafixxi kitimina hincaa'ona.

⁹Baaxii'l haafixxi kitimina hincu handarekkichchi xiigiinsi hofqaxam aa'aa kiti'm beyyi midaadduwwanne wixona; gatu xiigam kiti'm beyyi lugumonne dunona; oohim baaxii'l haafixxi kitimo.

¹⁰La'm handarekkichcho odim see'llisinne shokkiisakka'a hincaa'akkam kitim issaa hincaa'ona. Ee'isinne qeessichchi ee manchika baaxiilo haafissiisookko; ee manchi baaxiilim haafamookko.

¹¹« ‹Ayyi manchim lam handare'e te'im handare'i wotalla hincaa'eena xanubeelas mat kiilo'o ihoo er qama baaxii'l haafixxi kitim issaa hincaa'ona. Oohim baaxii'l haafixxi bikkina hincoo kitim ihu bikkina wee'l zayta te'im aduruusa edoone.

¹²Eeham eebaa qeessichchina uwwona; qeessichchim ee qamiinsi mat foocca aa'aa hundim iina hincukkan ihukkisa la'isimminne kiti'm beyyonne shokkiisona. Oohim baaxii'l haafitina ihoo kitima.

¹³Qeessichchim ee'isinne ee manchika baaxiilo haafissiisookko; ee manchi baaxiilim haafamookko. Gatu qam hurbaaxxi kiti'm see'llisinne qeessichchan ihona› yihe» yukko.

¹⁴Waa'i Muse'ena

¹⁵«Ayyi manchim hawwodulas iina keesamu luwwam xa'isimminne baaxiilo baxulas miiqakkam luwwi bee'i gereechchi ambula baaxii'l haafixxi kitimina hincaa'ona. Te'im Keesammi Mi'n keennaanchisanne miqona; oohim baaxii'l haafitina ihoo kitima.

¹⁶Ee xa'isu keesammi luwwinne maqire ontiinsi mat suume edaa miqona. Eeham eebaa qeessichchina uwwona; qeessichchim ee gereechcho ee manchi baaxiilina kitim issaa hincaa'ona; ee manchi baaxiilim haafamookko.

¹⁷« ‹Ayyi manchim laa'oo'n i ijaajjuwwiinsi mato gindulas baaxiilaanchi ihookko.

¹⁸Ee bikkina oo manchi ee baaxii'l haafixxi kitimina laboo miiqakkam luwwi bee'i mat gereechchi ambula eebaa qeessichchina uwwona. Eehanni bitim gudaanchi ihimmi hasisookko. Qeessichchim ee manchi baaxii'l haafixxi bikkina ee gereechcho kitim issaa hincaa'ona; ee manchi baaxiilim haafamookko.

¹⁹Oohim oo manchi eese hawwodu hawwojjina haafissiisoo kitima» yukko.