Read Hadiyya Qeessuwwi Kitaaba 6 Bible Online

Qeessuwwi Kitaaba 6 - Hadiyya bible

Qeessuwwi Kitaaba 6

¹Waa'i Muse'ena

²«Ayyi manchim baaxiilo baxulas, beshichchiinsi yabo te'im liqaayyo aa'u luwwa dabarimma sabaa eese hawwodulas te'im beshichchiinsi bogimminne, te'im qawwiisimminne,

³te'im bi'u luwwa siidaa moo'ummoyyo yaa qophphanaa hide'imminne, manni baxoo ka baaxiilluwwiinsi matinne hawwodulas

⁴ayyi manchim eehido'i hawwojjinne baaxiilaanchi ihulas bogimminne te'im qawwiisimminne massukkoka te'im yabo aa'ukkoka te'im bi'aa siidu luwwa dabarona.

⁵Te'im qophphaninne hide'ukkoka dabarona. Hawwojji kitima hincaa'oo ammane massu luwwi hundam ontiinsi mat suume edaa annichchina dabarona.

⁶Ee baaxii'l haafitina miiqakkam luwwi bee'i gereechchi ambula te'im Keesammi Mi'n keennaanchisanne qoodamu bito kitim issaa iina hincaa'ona. Eeham eebaa qeessichchina uwwona.

⁷Qeessichchim ee'isinne i illagenne haafissiisookko; ee manchi baaxiil hundim haafamookko» yukko.

⁸Waa'i Muse'ena

⁹«Aaroonaa ixxi ooso ‹Shokkiisakka'a hincaa'akkam kiti'm seer kane. Shokkiisakka'a hincaa'akkam kitim kiti'm beyyi haqqanne uulli soodeebe'e garona; giirim ee kiti'm beyyonne aphphukkuuyyi garona.

¹⁰Qeessichchim talbi fati'l qamisa edde'aahii sure'e lade'aahii shokkiisakka'a hincaa'akkam kitima giir itaa lasage gii'l buchchooma hogaa kiti'm beyyi gadanonne fincona.

¹¹Ee lasage oo qeessichchi ee eddechcha fissaa mulli eddechcha edde'ona; ee gii'l buchcham iyyaa wiidda'n beyyiinsi haxonne muccur beyyonne fincona.

¹²Kiti'm beyyi giir xoo'oo'n hiimoo ballaa hundi ammanem aphphukkuuyyi hee'ona; qeessichchim darina darina haqqa edona; ee haqqi hanennem shokkiisakkam kitima taaphansaa mateeyyoo'm kiti'mmeka di'ira shokkiisona.

¹³Kiti'm beyyonne giir hundi ammanem aphphona; hore'em xoo'oone.

¹⁴« ‹Wix hurbaaxxi kitima hincaa'akkam seer kane; Aaroon oos ee kitima kiti'm beyyi illagenne iina hincaa'llona.

¹⁵Ee lasage qeessichchi zaytinne cukkamaakkoo er qamika mat fooccaa wix hurbaaxxi kiti'm beyyonne yoo aduruusaa hundam ki'isaa iina hincaa'ukkisa la'iseena kiti'm beyyonne shokkiisona. Ee kiti'm enjim eese liiransoohan ihookko.

¹⁶Eehanniinsi gatukkoka Aaroonii ixxi oosii ittona; eekkam ursho'i exxubee'i qorosho'o satta'a keesammi beyyonne Keesammi Dukkaa'n kululleetanne yoo wixxixxi beyyonne ittona.

¹⁷Ookki ursho'i bee'em saramona; shokkiisakka'a hincaa'akkam kitimiinsi ixxuwwina sharad ihona uwwamoohanee baaxii'l kiti'mmisaa hawwojji kiti'mmisaa hore'em keesamaakkoohanee.

¹⁸Waaroo doolle hundannem Aaroon shumo'iinsette ihu goon iina hincoo kitimiinsi ixxena qoodamu sharada iteena xanookko. Ixxuwwa nakkookkok hundim keesammi ihookko[1]› yitaa ijaaje» yukko.

¹⁹Waa'i Muse'ena

²⁰«Aaroon shumo'iinsi qeessichchi doo'llamoo ammane ballina ballina hundi ammanem hincoo hurbaaxxi kitiminne gudaanchi ihu mat kiilo'i er qama iina kitim issaa hincaa'ona; oohim kollii darinne kollii hiiminne kitimina hincihona.

²¹Oohim zaytinne danaamisa cukkamaa gala'anne saramona; eeham enji eese liiraansoo hurbaaxxi kitim ihona iiqansaa iina hincaa'ona.

²²Aaroona bikkaa ixxi oosiinsi doo'llamoo qeessichchi eekka gudisona; oohim iina annanni ihaa qoodamaakkoo sharad ihu bikkina mahim gatoobee'isa hundim shokkona.

²³Oo qeessichchi hincaa'oo hurbaaxxi kitim hundim shokkona bagaan maham itimmi hasisooyyo» yukko.

²⁴Waa'i Muse'ena

²⁵«Aarooninaa ixxi oosina ‹Baaxii'l haafixxi bikkina hincoo kiti'm seer kane; baaxii'l haafitina kitim ihaa hincoo diinat shokkiisakka'a hincaa'akkam kiti'm diinat duramoo beyyonne i illagenne duramona. Oo kitimim hore'em keesamma.

²⁶Ee kitima hincaa'oo qeessichchi keesammi beyyonne Keesammi Dukkaa'n kululleetanne yoo wixxixxi beyyonne itona.

²⁷Maara nakkoo ayyim keesammi ihookko[2]. Ayyi eddechchannem ee diinaxxek xiig afulas keesammi beyyonne aanshakkona.

²⁸Oo maar saramukkok xaa'l mu'utannetti ihulas kotootakka'a wo'inne aanshakkona; buchchi mu'utannetti ihulasim ee mu'uta iiqakkona.

²⁹Qeessuwwi moolliinsetti ihu goon hundim ee kitima itona; oo kitim hore'em keesamaakkoohane.

³⁰Ihukkaarem baaxii'l haafitina ihoo see'llisinne xiigiinsi Keesammi Dukkaa'n keesammi beyyomdu aagaakkoohan ihulas ee maara hundam shokkiisakkona bagaan itimmi hasisooyyo.