Read Hadiyya Qeessuwwi Kitaaba 7 Bible Online

Qeessuwwi Kitaaba 7 - Hadiyya bible

Qeessuwwi Kitaaba 7

¹« ‹Hore'em keesammi ihu bikkina hawwojji bikkina hincoo kiti'm seer kane.

²Shokkiisakka'a hincaa'akkam kiti'm diinate durakkam beyyonne hawwojji kitimina hincoo diinatim duramona; ee kiti'm xiigim kiti'm beyyi kululleetanne wixamona.

³Di'ir hundim feeramaa oohim sheeri'mmek, godaphphi mu'uta ifiisookkok,

⁴lamem mur, lamem muronnee midaadonnee yoo di'irii afare ifiisoo illaanchi'nnoo di'irii kitimina hiincihona.

⁵Qeessichchim shokkiisakka'a iina hincaa'akkam kitim ihona kiti'm beyyonne shokkiisona; oohim hawwojji bikkina hincoo kitima.

⁶Qeessuwwi moolliinsi goon hundim ee kiti'mmeka maara ittona; ihukkaarem oo kitim hore'em keesammi ihu bikkina keesamaakkoo beyyonne ittona.

⁷« ‹Baaxii'l haafitina hincoo kitiminaa hawwojji haafitina hincoo kitiminaa laminam ihoo mat seer yookko; oohim ee kitimmuwwina hincoo diinaxxi maar kitimmuwwa hincaa'oo qeessichchina uwwamona.

⁸Ayyi manchim shokkiisakka'a hincaa'akkam kitimina hincaa'u diinaxxik omachchi kitima hincaa'u qeessichchina uwwamona.

⁹Giiranne saramu hurbaaxxi kitim hundim qure'enne te'im mixaadanne sarakko'ok hundimii kitima hincaa'u qeessichchina uwwamona.

¹⁰Ihukkaarem zaytinne cukkammi te'im qaquulli hurbaaxxi kitim hundim Aaroon shumo'i ikko'i qeessuwwina uwwamona; eeham gudaanchonne baxxantona.

¹¹« ‹Iina mateeyyoo'm kitim hincoo seer kane.

¹²« ‹Mat manchi kido'i kitima iina galaxxi kitim issaa hincaa'eena hasulas kitimina hincu diinatinne maqirem wee'l zaytinne cukkamaa saramaakkoo ursho'i bee'i qorosho'o, caraqisakka'a sarakko'oo zayti labamaakkoo ursho'i bee'i qorosho'oo zaytinne cukkakka'a danaam qaminne sarakko'oo qorosho'oo edaa hincaa'ona.

¹³Galatina ihoo mateeyyoo'm kitima hincaa'oo ammane ursho'inne saramaakkoo daabbo'o hincaa'ona.

¹⁴Ee kitim hundiinsim mat mato iina annanni kitim issaa hincaa'ona; oohim mateeyoo'm kitimina hincu diinaxxi xiiga kiti'm beyyi midaadonne wixu qeessichchan ihona.

¹⁵Galatina ihoo mateeyyoo'm kiti'm maara ee ballam itimma bagaan ixxeensi mahim garimmi hasisooyyo.

¹⁶« ‹Mat manchi hincaa'oo mateeyyoo'm kitim aagu uga'i wo'mmu bikkina te'im ixxi gaqqi doo'llinne uwwoohan ihulas ee ballam itakkona; eehanniinsi gatukkoka odim la'm dara itakkona.

¹⁷Ihukkaarem ee kiti'm maariinsi gataa saxxi balla afulas hundim giirinne shokkona.

¹⁸Ee mateeyyoo'm kiti'm maariinsi saxxi ballanne ayyim itulas ee kitima an aa'oommoyyo; kitimoomim hincukkaannisa xigamooyyo. Hore'em haashaarammi ihaa xigamookko; eehanniinsi itu manchim baaxiilaanchi ihookko.

¹⁹« ‹Ee maara haashaarammi luwwi mahim nakkulas shokkona bagaan itimmi hasisooyyo. Muccur ihu manchi ee maara itona.

²⁰Ihukkaarem mat manchi muccur ihoo'n mateeyyoo'm kiti'm maariinsi itulas i minaadabiinsi annanni ihaa bi'ona.

²¹Ayyi manchim manniinsi te'im diinatiinsi firoo haashaarammi luwwa te'im haashaarammi luwwa maham nakkaa ka mateeyyoo'm kiti'm maariinsi itulas oo manchi i minaadabiinsi annanni ihaa bi'ona› yihe» yukko.

²²Waa'im Muse'ena

²³«Isra'ee'l minaadabina ‹La'lleka, gereebbikaa fella'ikaa di'ira ittakkotte.

²⁴Baytika te'im moochchi shu diinaxxeka di'ira mulluwwina awwaaxxehe bagaan ittakkotte.

²⁵Shokkiisakka'a iina hincaa'akkam kiti'm diinaxxeka di'ira itoo manchi i minaadabiinsi annanni ihaa bi'ona.

²⁶Isra'ee'l minaadab hannonnem hee'llota'n hee'llam beyyi hundannem cii'anem ihukko mulli fooraam diinaxxeka xiiga ittoone.

²⁷Ayyi manchim xiiga itulas i minaadabiinsi annanni ihaa bi'ona› yihe» yukko.

²⁸Waa'i odim Muse'ena

²⁹«Isra'ee'l minaadabina ‹Ayyi manchim mateeyyoo'm kitima hincaa'oo ammane eehanniinsi baxxansaa iina annanni kitim issaa hincaa'ona.

³⁰Ixxom shokkoo kitim issaa iina hincaa'ona; ee diinaxxi di'iram eeddiraasinne maqirem wonceesukkuuyyi annanni kitim issaa iina hincaa'ona.

³¹Qeessichchim di'irooma kiti'm beyyonne shokkiisona; ihukkaarem eeddiraas Aarooninaa ixxi oosinaa uwwamona.

³²Odim mateeyyoo'm kiti'mmek makki kolli hayyi qeessichchina sharad ihaa uwwamona.

³³Mateeyyoo'm kitimina xiigaa di'iraa hincaa'u Aaroon beetina makki kolli hayyi sharada.

³⁴Isra'ee'l minaadaphphi mateeyyoo'm kitimiinsi wonciwoncaa'akkam eeddiraasoo makki lokkoo Isra'eeliinsi qeessichchi Aarooninaa ixxi oosinaa hundi ammanem ihoo sharad issaa uwwaammo› yihe» yukko.

³⁵Oohim Waa'i Aaroonaa ixxi oosoo qeessuwwi issaa doo'llu balla shokkiisakka'a ixxena hincaa'akkam kitimiinsi qeessuwwina annanni issu sharada.

³⁶Ee balla Waa'i oo baxxanchi qeessuwwina uwwamona Isra'ee'l minaadaba ijaajukko; oohim waaroo doollenne hundannem qeessuwwina sharad ihoo'isina qoodaakko.

³⁷Shokkiisakka'a hincaa'akkam kiti'mmek, hurbaaxxi kiti'mmek, baaxiilin hincoo kiti'mmek, hawwojji bikkinaa hincoo kiti'mmek, qeessoomanina doo'llanchi kiti'mmekii mateeyyoo'm kiti'mmekii seer eehane.

³⁸Udma'i uulli Siina'i duunanne Isra'ee'l minaadab kitima hincaa'llona ijaaju balla Waa'i Muse'ena ka ijaajjuwwa uwwukko.