Read Hadiyya Qeessuwwi Kitaaba 8 Bible Online

Qeessuwwi Kitaaba 8 - Hadiyya bible

Qeessuwwi Kitaaba 8

¹Waa'i Muse'ena

²«Aaroona ixxi goo'n oosinne maqirem, qeessooma'n eddechcha, laphphakkam zayta, baaxii'l haafixxi kitimina hincoo labeena, lam gereebbi ambulluwwaa mat leemaat urshobee'i qorosho'oo amaddaa waare.

³Ee'isam Isra'ee'l minaadaba hundam Keesammi Dukkaa'n nafaranne wixxaa'e» yukko.

⁴Muse'em Waa'i ijaajukkisam issukko; minaadabim Keesammi Dukkaa'n nafaranne wixxukko.

⁵Muse'em minaadabina «Ihoo'isina Waa'i ijaaju luwwi kane» yukko.

⁶Muse'em Aaroonaa Aaroon oosoo hincaa'aa wo'inne aanshukko.

⁷Aarooninam qambiisa eddeesukko; sabbatam ladiisukko; qamisam eddeesukko; eefuudam hanenne edukko; eeham anginne wereeggisakka'a dadakko'oo sabbatinne ladiisukko.

⁸Ee eefuudanne biq kiisa gobaa Waa'i doo'lla la'isoo Uriimaa Tumiimaa dissukko.

⁹Aaroon horoorennem shaashsha xaaxukko; ee xaacci illagee'n kollinnem Waa'i Muse'e ijaajaa hee'ukkisanne worqinne wereeggisakka'a baxakko'oo adilla'nnaanninnoo'i keesammoo'm mare'e issukko.

¹⁰Ee lasage Muse'e ee zayta Keesammi Dukkaanannee woro yoo luwwannee hundannem labaa keesukko.

¹¹Kiti'm beyyonnem ee zaytiinsi lamar kore kifukko; ee'isam kiti'm beyyonnee ee beyyonne awwaaxxakkam mu'uttuwwannee hundannem aanshaqqakkam saahinannee saahina dissakkam mu'utannee labaa keesukko.

¹²Ee zaytiinsi Aaroon horoorennem dunaa qeessooma'n awwaadina annanni issukko.

¹³Ee lasage odim Waa'i ijaajukkisannem Muse'e Aaroonika goo'n ooso hincaa'aa qambiisa eddeesukko. Ixxuwwinam sabbata ladiisukko; horoorennem qoobe'e issukko.

¹⁴Ee lasage Muse'e baaxii'l haafixxi kitimina hincoo labeena eebukko; Aaroonii ixxi oosii ee labee'n horoorenne ixxuwwi anga issito'o.

¹⁵Muse'em ee labeena durukko; ee labee'n xiigiinsi hofqaxam aa'aa maxxaarinne cefukkuuyyi kiti'm beyyi soorem ejjannem yoo buudduwwanne labaa muccussaa keesoukk. Gatu xiigam kiti'm beyyi lugumonne dunukko; ee'isinne kiti'm beyyo Waa'ina annanni issaa muccussukko.

¹⁶Muse'e ee labee'n godaphphi mu'utanne yoo di'ira hundam, afare illaanchisa ifiisoo di'iraa lamem muro di'irinnemii kiti'm beyyonne shokkiisukko.

¹⁷Ee labeena, omachcho, maaraa cumaa Waa'i ixxo ijaajukkisannem wiidda'n beyyiinsi haxonne fissaa shokkiisukko.

¹⁸Ee lasage odim Muse'e shokkiisakka'a hincaa'akkam kitimina ihoo gereechchi ambula eebukko; Aaroonii ixxi oosii ee ambu'l horoorenne ixxuwwi anga issito'o.

¹⁹Muse'em ee ambula duraa xiigooma kiti'm beyyi kululleetanne wixukko.

²⁰Ee ambu'lleka maara qaamafeetinne annanni issaa murukko; horoore, ee qaamafeettuwwaa di'iraa shokkiisukko.

²¹Godophphi mu'utaa lokkuwwaa wo'inne aanshaa Waa'i ixxo ijaajukkisannem ee ambu'l maara hundoomam shokkiisakka'a hincaa'akkam kitim issaa kiti'm beyyonne shokkiisukko; oohim Waa'a liiraansoo enji hee'ukko.

²²Ee lasage Muse'e qeessoomaninne doo'llanchi bikkina hincoo la'm gereechchi ambula hincaa'ukko; Aaroonii ixxi oosii ee ambu'l horoorenne ixxuwwi anga issito'o.

²³Muse'e ee ambulam durukko; xiigiinsim hoffokam massaa Aaroon makki kolli macci ludonnee makki kolli angaannonnee lokkaannonnee lob maxxaalluwwannee labukko.

²⁴Ee lasage Aaroon ooso ixxi illagenne hincaa'aa ixxuwwi makki kolli macci ludonnee makki kolli angaannonnee lokkaannonnee lob maxxaalluwwannee labukko. Gatu xiigam kiti'm beyyi soorem midaadonnem wixukko.

²⁵Di'ira, sheerimo, godaphphi mu'uta ifiisoo di'ira hundam, afare ifiisoo illaanchi'nno'i di'ira, lamem muro di'irinnemii makki kolli gubeedoo massukko.

²⁶Waa'ina annanni ihaakkoo qorosho'i yoo leemaatiinsi mat qorosho'om massukko. Ee'isam zaytinne cukkakko'oo mat qorosho'oo mat caraq qorosho'oo massaa ee di'i'llaannonnee gubeexxi hanennee dissukko.

²⁷Muse'e ka hundam massaa Aaroonaannonnee ixxi oosaannonnee anganne amadiisukko; ixxuwwim Waa'ina annanni ihaakkoo kitim issita'a wonci woncaa'llo'o.

²⁸Ee lasage Muse'e eekka ixxuwwi angiinsi massukko; qeessoomaninne doo'llanchi bikkina kitim ihona shokkiisakka'a hincaa'akkam kitima kitimakkam beyyonne shokkiisukko. Eehanni enjim Waa'a liiransoo kitim hee'ukko.

²⁹Ee lasage Muse'e eeddiraaso Waa'ina annanni kitim issaa wonciwoncaa'ukko; qeessoomaninne doo'llanchi bikkina hincoo ambuliinsi Muse'ek sharad eehan hee'ukko.

³⁰Muse'e laphphakkam zaytiinsii kiti'm beyyonne yoo xiigiinsii hoffokam massaa Aaroonanne, ixxi oosonnee ixxuwwi eddechchannee hundannem wixukko. Ee'isinne Muse'e ixxuwwaa ixxuwwi eddechchaa annanni issaa Waa'ina keesukko.

³¹Muse'e Aarooninaa ixxi oosinaa «Maara Keesammi Dukkaa'n goocanne sallehe. Eeham Waa'i ‹Aaroonii ixxi oosii ittona› yaa eese ijaajukkisanne leemaatanne yoo keesammi qoroshsho'inne ittehe.

³²Maariinsim ihukko qorosho'iinsi gatu luwwi hee'ulas giirinne shokkiissehe.

³³Qeessuwwi ihimmi seer beeddeebe'e lamar balla massoo bikkina oo seer beeddoo lama'l balli afeebe'e Keesammi Dukkaa'n goociinsi mattakkotte.

³⁴Kaballa ihu ku seer ki'nnuwwik baaxiil haafamona Waa'i ijaajaakkoohane.

³⁵Ee bikkina Waa'i ijaaju ijaajo hundam wonshitakku'uuyya lamar balla hundam himoo ballaa Dukkaa'n goocanne afuullehe. Eehamdu issitakkobeelas letakkamo; ookki Waa'i eese ijaaju seera» yukko.

³⁶Ee bikkina Aaroonii ixxi oosii Waa'i Muse'enne ihaa ijaaju ijaajo hundam wonshito'o.