Read Hadiyya Qeessuwwi Kitaaba 9 Bible Online

Qeessuwwi Kitaaba 9 - Hadiyya bible

Qeessuwwi Kitaaba 9

¹Sadeenti ballanne Muse'e Aaroona, Aaroon oosoo Isra'ee'l awwonsaanoo weeshukko.

²Aarooninam «Miiqakkam luwwi mahim bee'i mat labeena baaxii'l haafixxi kitimina, mat gereechchi ambula odim shokkiisakka'a hincaa'akkam kitimina ihona Waa'ina hincaa'e.

³Ee lasage Isra'ee'l minaadab baaxii'l haafixxi kitimina mat fella'ichchi ambula, shokkiisakka'a hincaa'akkam kitiminam miiqakkam luwwi mahim bee'i mat hiinchi wee'ichchoo mat hiinchi gereechchi ambulaa hincaa'llona kure.

⁴Ee'isam mat labeenaa mat gereechchi ambulaa mateeyyoo'm kitimina eebbona; ee keenom zaytinne cukkamaakkoo hurbaaxxi kitiminne maqirem Waa'ina kitim issita'a hincaa'llona. Waa'i kaballa ixxuwwina caakkaa moo'amoo bikkina ee hundam issitona» yukko.

⁵Ixxuwwim Muse'e ijaaju luwwi hundam Keesammi Dukkaa'n illagenne hincaa'llo'o; minaadab hundim hincaa Waa'i illagenne uullukko.

⁶Muse'em ixxuwwina «Waa'ik lombi ki'nnuwwina caakkaa moo'amoo bikkina ka hundam issitakkona ixxi ki'nnuwwa ijaajaakko» yukko.

⁷Ee lasage Muse'e Aaroonina «Kiti'm beyyonne hincitaa ki baaxiilii minaadaphphi baaxiilii haafamoo'isina hincoo baaxii'l haafixxi kitimaa shokkiisakka'a hincaa'akkam kitimaa hincaa'e. Waa'i ijaajukkisannem ka hundem kitimam hincaa'llaa minaadaphphi baaxiilo haafissiise» yukko.

⁸Aaroon kiti'm beyyonne hincaa ixxi gaqqi baaxii'l haafixxi kitimina hincu labeena durukko.

⁹Ixxi oosim eehanni xiiga ixxi beyyo eebbo'o; ixxim ee xiiganne maxxaara cefukkuuyyi kiti'm beyyi buudduwwanne labukko; gatu xiigam kiti'm beyyi lugumonne dunukko.

¹⁰Ee lasage ee baaxii'l haafixxi kiti'mmeka di'ira, lamem muroo afare ifiisoo illaanci'nnoo di'iraa Waa'i Muse'e ijaajukkisannem kiti'm beyyonne shokkiisukko.

¹¹Ihukkaarem maaraa omachchoo wiidda'n beyyiinsi haxonne fissaa shokkiisukko.

¹²Aaroon odim shokkiisakka'a hincaa'akkam kitimina hincu diinate durukko; ixxi oosim eehanni xiiga ixxi beyyo eebbo'o. Ixxim ee xiiga kiti'm beyyi soorem kululleetannem wixukko.

¹³Ee kiti'm maara qaamafeetinne muransita'a horoorinne maqirem ixxi beyyo eebbo'o. Aaroonim ee hundam kiti'm beyyonne shokkiisukko.

¹⁴Ee lasage gadaphphi mu'uta lokkinne maqirem wo'inne aanshaa kiti'm beyyonne yoo shokkoo kiti'm hanenne issaa shokkiisukko.

¹⁵Ee lasage minaadaphphi kitima hincaa'ukko; minaadaphphi baaxii'l haafitina hincu fellakkichchi ambula durukko. Eeham ixxi baaxii'l haafitina hincaa'u kiti'mmisam hincaa'ukko.

¹⁶Shokkiisakka'a hincaa'akkam kitimina hincu diinatem see'llisanne kitimukko.

¹⁷Hurbaatiinsim kitima eebaa mat foocci qama massaa kiti'm beyyonne shokkiisukko. Oohim dar dara shokkiisakka'a hincaa'akkam kitimiinsi mullane.

¹⁸Aaroon labeenaa gereechchi ambulaa duraa minaadaphphi bikkina mateeyyoo'm kitim issaa hincaa'ukko; ixxi oosim xiiga eebbo'o; ixxim ee xiiga aa'aa kiti'm beyyi soorem midaadonnem wixukko.

¹⁹Ee labee'nnekaa gereechchi ambu'llekaa di'ira hundam oohim sheerimo, godaphphi mu'uta ifiisoo dira, lamem muroo illaanchi'nno'i afare ifiisoo di'iraa hincaa'llo'o.

²⁰Eeham eeddiraas hanenne dissito'o; Aaroonim ee di'ira kiti'm beyyonne shokkiisukko.

²¹Ee labee'nnekaa gereechchi ambu'llekaa eeddiraasoo makki kolli gubeedoo Muse'e ijaajukkisanne Waa'ina annanni kitim issaa wonciwoncaa'ukko.

²²Aaroon baaxii'l haafixxi kitima, shokkiisakka'a hincaa'akkam kitimaa mateeyyoo'm kitimaa hundam kitimukko. Ixxi angam biddiqaa'aa minaadaba maasse'aa lasage dillukko.

²³Ee lasage Muse'ee Aaroonii Keesammi Dukkaa'n woronne aaggo'o; ee dukkaaniinsi fitta'ahim minaadaba maasse'llo'o. Waa'ikim lombi minaadab hundinam caakkukko.

²⁴Waa'i dangonnem ixxi giira asse'ukko; oo giirim kiti'm beyyonne yoo kitimaa di'iraa hundam itukko. Minaadab hundim eekka moo'aa ililukko; uullannem aad heeshaa otossukko.