Read Hadiyya Ermiyaas Kitaaba 1 Bible Online

Ermiyaas Kitaaba 1 - Hadiyya bible

Ermiyaas Kitaaba 1

¹Biinyaam sulli yoo uullanne Anaatoota yakkam hegeegonne hee'oo qeessuwwiinsi mat ihu Hilqiy beet Ermiyaas wocu sagar kane.

²Amoon beet hee'u Iyyoosiyaas Yihuxxi uullanne adil ihu tommaannonnee saxxi hiinchonnee Waa'ik sagar Ermiyaas beyyo waarukko.

³Ee'isam Iyyoosiyaas beet hee'u Iyyoo'aaqeem adil ihu doollennee ee lasage odim Iyyoosiyaas beet hee'u Sedeeqiyaas adil ihaa tommoo mat hiinchoo iheebe'i afeebe'e oohim ee hiinchonne onti agananne Yerusaalee'm minaadab qeefadamaa maru amman afeebe'e Waa'i sagar Ermiyaasinnetti ihaa kuramukko.

⁵«Keese kiyyummi godabonne baxoo'n illageenim la'aammo; qaranteena illageenim keesaammo; minaadabina hiraagaanchi ikkoo'isinam doo'llaammo» yukko.

⁶Anim dabaraa «Aayye! I Moollanni Waa'a! An ooshshichchi ihummi bikkina hinkid wocimmi hasisooda'e la'oommoyyo» yummo.

⁷Ihukkaarem Waa'i « ‹An ooshshichcho› yititte; an asse'ummi beyyi hundam mattaa ijaajummi luwwi hundam woccootto.

⁸Anim kiinninne maqir ihaa keese gatisoommi bikkina ixxuwwa hore'em baddititte; kaka wocummi Waa'i anette» yukko.

⁹Ee lasage Waa'i ixxi anga biddiqaa'aa i suume nakkaa «At woccoo sagara an kiina uwwaammo.

¹⁰Oono'o, xoqoltoo'isinaa ginditoo'isinaa, bi'issoo'isinaa hamaaransitoo'isinaa, baxxoo'isinaa kaassoo'isinaa an kaballa minaadabannee minaadaphphi adillanonnee kiina daannooma uwwaammo» yukko.

¹¹Waa'im «Ermiyaasa, Moo'lloo luwwi maha?» yaa xa'mmukko. Anim «Lawuza[1] yakkam haqqichchika caafa moo'oommuulla» yaa dabarummo.

¹²Ee lasage odim Waa'i iina «Hanqo'isa moo'llaatto; anim ee'isam i sagar hinkid baxonne hosooda'e erisa egeroommo» yukko.

¹³Odim Waa'i «Mullek moo'lloo luwwi maha?» yaa xa'mmukko. Anim «Fecfecoo qure'e moo'oommuulla; ixxim hanaa'n qariinsi ka kollonne hooraa ubeena boqqaakko» yaa dabarummo.

¹⁴Waa'im «Hanaa'n qariinsi ka uullanne hee'oo mannanne hundannem dangonnem bala'i dillookko.

¹⁵Mashka'oomim hanaa'n qaranne hee'llam minaadab hundim ka beyyo waattamisina weeshaammo; ixxuwwik adilluwwi Yerusaalee'm beero'i goocanne, ooxxi kululleetannee ee'isam uulli beero'uwwi kululleetannee adilla'n barcuma dissita'a afuuttamo.

¹⁶I minaadab baaxiilo baxxo'i bikkina guzumo'oommo; ixxuwwi eese utta'a qophpha'n waa'uwwina kitima hincaa'llamuulla; misilluwwam baxxa'a ee misilluwwina otossitamuulla.

¹⁷Ee bikkina Ermiyaasa, an keese ijaajoommoka hundam ixxuwwina kutteena ixxuwwi beyyo matteena gude; oono'o, at ixxuwwa hore'em baddititte; oobeelas ixxuwwi illagenne lobakata badditoo'isa issoommo.

¹⁸Oono'o, an kaballa keese uulli hundannem oohim uulli adilluwwanne, daannuwwanne, qeessuwwannee uulli minaadabannee hundannem girbamu beero'isa, xaa'l utuphphisaa naas xaarinne baxamu ooxxisaa keese qoxxaalli issaammo.

¹⁹Ixxuwwi kiinninne qaxxantamo; ihukkaarem an keese gatiseena kiinninne maqire yoommi bikkina kaa'llamoyyo; kaka wocummi Waa'i anette» yukko.