Read Hadiyya Ermiyaas Kitaaba 10 Bible Online

Ermiyaas Kitaaba 10 - Hadiyya bible

Ermiyaas Kitaaba 10

¹Isra'ee'l minaadaba, oono'o, Waa'i ki'nnuwwina wocoo sagara macceessehe.

²Waa'i «Mulli minaadaphpheka googo awwontakkotte; ixxuwwi iimanenne mulli mare'e moo'llo'i ammane dambaqqamo; ihukkaarem ki'nnuwwi eehannonne dambaqqakkotte.

³Ee mulli minaadaphphek losa'n amma'nnat awwaad bee'ane; haqqichcho doo'm woriinsi murakkamo; anga lachchi manchim heedinne cabbarookko.

⁴Birinnee worqinnee wereeggisakkamo; uboobee'isam musmaarinnee madooshinnee aphphisakka'a mat issakkamo.

⁵Oo misilluwwi dabaqu'l kaashshi lambe'enne cii'a baddisona kaasakko'i luwwisa; wocimma xantamoyyo; taakke'immam xantambee'i bikkina manni iyyookko; hawwodoo luwwam ihukko awwaadoo luwwa baximma xantambee'i bikkina hore'em badditakkotte» yukko.

⁶Waa'a! Keese labookkok ayyim bee'e; at malaayyaamo. Ki summi lophphaakkoohanee baddisoohanee.

⁷Uulli minaadabina hundinam Adil ikki bikkina keese baddoobee'ek ayyette? uulli minaadaphphi qoolluwwi lambe'ennee adilluwwi lambe'ennee keese labookkok ayyim bee'i bikkina kiina lombi hasisookko.

⁸Ixxuwwi hundim qawwuwwaa ceemmaalluwwaa ikko'i bikkinatte bagaan eraadu haqqinne baxakko'i misiliinsi mah losano siiddam luwwi hee'aate?

⁹Misilluwwoom Tarseesiinsi eebakko'i kin birinnee Uufaaziinsi eebakko'i worqinnee goolabamakkoohane; anga lachchi mannim wereeggisso'ookko; eddechcha daddam anga qoor manni daddo'i diqaasa laboohaanninnee kashar eddechchinnee ifiisamaakko.

¹⁰Ihukkaarem Waa'a, at hanqo'i Waa'a; at hee'lloo Waa'aa heer heeraxxi adila; at quuqqoo ammane uulli heekke'ookko; uulli minaadabim ki quunqa iyyaqqaa xanooyyo.

¹¹Qophpha'n waa'uwwina otossitam minaadabina hundinam «Uullaa iimanee qooccitobee'i qophpha'n waa'uwwi uulliinsi bi'llona» yitakka'a kullehe.

¹²Waa'i ixxi malaayyinne uulla baxukko; ixxi qooroominnem uulla qooccukko; ixxi qoossimminnem iimane biddiqaa'ukko.

¹³Ixxi saga'llek gug macceesamoohaare iimanenne yoo wo'i heekke'ookko; ixxi duuba uulli tochchiinsi iim firoo'isa issookko; xee'n ammanem banqi gugoo'isa issookko; hafachcham dissoo miniinsi firoo'isa issookko.

¹⁴Eekka moo'llota'nnim qawwuwwaa lachchi hanqataakkoo keenoo ikkamo; worqa bukkookkok baxu misilannem otossitamo; foor bee'i qophphanaanchi ihu bikkinam baxamu misilanne tuuttamo.

¹⁵Ku qophpha'n waa'uwwi awwaad bee'i keenoo lelli mu'uttuwwaa; Waa'i ixxuwwa guzumo'eena waaroo ammane ixxuwwi bi'llamo.

¹⁶Ihukkaarem Yaaqoob Waa'i eekee'nnisayyo; ixxi hundem luwwinam qooccaancho; Isra'eela ixxi minaadab ihoo'isina doo'llaakko; ixxi summim gogoxxi Moollanni Waa'a.

¹⁷Yerusaalee'm minaadaba, oono'o, ki'nnuwwi diina'inne kibbantakko'oo bikkina yoo beyyiinsi ki'nnuwwi amaxxa qaqqissakka'a wixxaa'llehe.

¹⁸Waa'i «Ka uullanne hee'llam manna xoqolaa fissoommo; ixxuwwam u'nnisaa qeefadantamisa issoommo» yoolla.

¹⁹Yerusaalee'm minaadab laattu'uuyyi «Lobakata iiqammummi bikkina aayye! ni omar fayye'oobee'ane; ihukkaarem neese ka hawwo hundam iyyaqqina xannoommoka labinsaa hee'nnummo.

²⁰Ni dukkaannuwwi gindamaakko; tollakkam usseewwim muramaakko. Ni oos hundim qeefadamaa maru bikkina ni dukkaannuwwa dabaraa kaasookkokii du'm eddechcham saqalookkokii matim gatukkoyyo» yitamo.

²¹Anim dabaraa «Ni awwonsaan qawwuwwi ihimmiinsi ki'isaa Waa'iinsi hara'mmato xa'mmito'oyyo; ee bikkina ixxuwwi ubbo'o; minaadabim binnito'o.

²²Wi'llo macceessehe; hanaa'n qarinne yoo uulliinsi malaayyaam dambaq waaroolla; Yihuxxi uulli beero'uwwam udma'aa wengereelli garoo beyyoo issookko» yummo.

²³Waa'a! Mannik foor ixxi angannette ihubee'isaa maroo googom ixxi gaginne xabbaa'aa awwonseenaa xanoobee'isaa la'oommo.

²⁴Waa'a! Ee bikkina neese ki minaadaba guzumo'e; ihukkaaremdu ki quunqinne beeddinaa bi'nnoommisina moggitte.

²⁵Ki quunqa keese laqqambee'i minaadabannee ki summa weeshshambee'i keenonnee dilliise; ixxuwwi ki minaadaba guullito'ookko; neese hundam guullita'a bi'issa'a ni uullam bi'isso'ookko.