Read Hadiyya Ermiyaas Kitaaba 11 Bible Online

Ermiyaas Kitaaba 11 - Hadiyya bible

Ermiyaas Kitaaba 11

¹Waa'i beyyiinsi Ermiyaas beyyo waaru sagar

²«Ka hidi'l sagara qoossitaa macceessaa Yihuxxi minaadabinaa Yerusaalee'm beero'onne hee'llam manninaa kure.

³Ka hidi'l sagarina ijaajamoobee'ek hundim duumamaakkoohan ihona.

⁴Ku ijaajim gaassi ki'nnuwwi anno'o xaara bukkoo gii'l midachchi'nnooi Gibxi uulliinsi fiissummi ammane ixxuwwina uwwummane; iina ijaajantamisinaa ixxuwwina kuroommi luwwa issitamisinaa kurummo; ijaajantolasim ixxuwwi i minaadab ikkamisaa anim ixxuwwina Waa'i ihoommisaa caakkisaa kurummo.

⁵Eehid ihulas kaba yo'i adii marabii wo'mmaakkoo harish uulla gaassi ixxuwwi anno'i lago aa'llamisina issummi ammane ixxuwwina uwwummi neeyyaxxi sagara wonshoommo» yoohane hee'ukko. Anim «Ihona Moollanna!» yummo.

⁶Ee lasage Waa'i iina «Beero'uwwaa Yerusaalee'm googguwwaa mattaa i hidi'l sagara macceessamisinaa i ijaajo egettamisinaa tiissiissittuuyyi i sagara alallaate.

⁷Gaassi ixxuwwi anno'o Gibxi uulliinsi fissummi ammane iina ijaajantamisina edaa edaa qoxxisummo; minaadabam kaballi afeebe'em ihuta'n qoxxisimma urummoyyo.

⁸Ihukkaarem ixxuwwi iina ijaajanteenaa i woshsham macceesseenaa hasso'oyyo; ee bikkenne annannichchim hinki ammaniinsim loboka xiiqqaammuwwaa jor keenoo ikko'o; i hidi'l sagara wonshitamisina ijaajummo; ihukkaarem ixxuwwi sabbo'o; ee bikkina i hidi'l sagaranne kitaabamu boobana hundam ixxuwwanne eebummo» yukko.

⁹Eehanniinsi lasonne odim Waa'i iina «Yihuxxekii Yerusaalee'm minaadabii eesenne jorinne a'llanto'ookko.

¹⁰I sagara macceesimma sabbo'i ixxuwwi anno'i baxxo'i baaxiilo baxxamuulla; qophpha'n waa'uwwinam otossitamuulla; Yihuxxekii Yerusaalee'm minaadabii gaassi ixxuwwi anno'inne aagummi hidi'l sagara gindito'ookko.

¹¹Ee bikkina oono'o, an Waa'i ixxuwwanne xotteena xantambee'i bichcha eeboommo; iinniinsi hara'mmato hassa'a laattota'nnim an macceesoommoyyo.

¹²Ee ammane Yihuxxekii Yerusaalee'm minaadabii kitima hincaa'llam qophpha'n waa'uwwi kolli matta'a hara'mmitona laattamo; ihukkaarem qophpha'n waa'uwwi ku bichchi waaroo ammane ixxuwwa gatisseena xantamoyyo.

¹³Minaadabina ixxuwwi beero'i qaxam lobakat qophpha'n waa'uwwi yookko; Yerusaalee'm minaadabim beero'i woronne yoo googguwwi qaxam Ba'aal yakkam shigigaa'oo qophpha'n waa'ina beero'i hincaa'akkam lobakat beyyuwwa baxxo'ookko.

¹⁴Ermiyaase, ka minaadabina lambe'i manchi ikkaa eese uunxititte; ixxuwwi hawwita'a hara'mmato siiddeena i kollonne laattam ammane an macceesoommoyyo» yukko.

¹⁵Waa'i «Ku an iittoommi minaadab jor baxo baxxamuulla; eehannah ixxuwwi keesamaakkoo i minenne siidanchi hasisoohonnihe? Awwaad bee'i neeyyato uwwimminnee fooraam diinaxxi kitima hincaa'imminnee bichchi ixxuwwanne afoobee'isa issimma xantamoka labissa'atennihe? Eehid issimmi ixxuwwa hinkid liiranseena xanookko?

¹⁶Ki'nnuwwi mat ammane mishisoo er mish yoo wee'l haqqichchisa hee'llakko'o; ihukkaarem abbis ammanenne banqisa gugoo sagara macceesisimminne buyyooma giirinne shokkiisoommo; caaffuwwam iiqansoommo.

¹⁷«An gogoxxi Moollanni Waa'a; ki'nnuwwi Isra'ee'l minaadabii Yihuxxi minaadabii an kaasummi haqqichchisa; ihukkaarem Ba'aala yakkam qophpha'n waa'ina kitima hincaa'imminne eese quuqissakko'i bikkina kaba an ki'nnuwwanne bichcha eeboommo› yaakko yitaa kure» yaa ijaajukko.

¹⁸I maso'i eesenne hanenne jora a'llantamisa Waa'i iina moo'isaakko.

¹⁹Anim durakkeena ushe'akkam gereechchisa ihaa hee'ummo; ixxuwwim «Ixxi summi la'mmeka tiiramoobee'isa ka haqqichcho mishinne maqirem mullona; foorinne hee'oo manni uulliinsim bi'insona» yita'a eesenne jor a'llancha a'llanto'isa la'ummoyyo hee'ukko.

²⁰Anim «Gogoxxi Moollanni Waa'a! Mannika wodanoo tiiroo saarayyitoo hanqo'i oogataancho; oono'o, i hawwo kiina kuroommo; ee bikkina ka minaadabanne dabattoo baado mo'oommisa isse» yaa Waa'a uunxummo.

²¹Anaatootanne yo'i manni eese shiteena hasso'o; hore'em «Waa'i summinne hiraago wocimma uttoobee'an ihulas neese gagim shinoommo» yito'ookko.

²²Ee bikkina gogoxxi Moollanni Waa'i «An gagim ixxuwwa guzumo'oommo; harde'i keen bisa'inne beedditamo; ixxuwwik goonii landii sibaarinne letamo.

²³Anaatoot minaadabanne boobana eeboommi ammane qoodaammo; oo doolli afoo ammane ixxuwwi lambe'iinsi matem manchim gatooyyo» yukko.