Read Hadiyya Ermiyaas Kitaaba 12 Bible Online

Ermiyaas Kitaaba 12 - Hadiyya bible

Ermiyaas Kitaaba 12

¹Waa'a! An kiinninne fitamumta'n at hundi ammanem hanqo'an ikkaa siidantootto; ihukkaarem hanqo'i oogaxxi bikkina keese xa'mmimmi hasisookko; baaxiilaan kee'n heechchi xabbookkok mahinatte? Qawwiissam keenindu hundem luwwim xabbookkok mahinatte?

²At ixxuwwa kaassi bikkina xapha kaasso'ookko; li'lla'atim misha mishshamuulla; keese suuminne lonsitamo; ihukkaarem ixxuwwik wodan kiinniinsi qee'llaakkoohane.

³I Moollanni Waa'a! Ihukkaarem at eese laqqootto; maha baxoomda'ee i wodaniinsim ki'isaa keese hinkaa'nna iittoomda'ee moo'llaatto; ku baaxiilaan manni durakkam gereebbisa gosaasantamisa isse; durakkam balli afeebe'em ixxuwwa annanni issitaa disse.

⁴«Neese banxoommoka hundam Waa'i moo'ooyyo» yitam ni minaadaphphi jolliinsi ki'ukkok ni uulla billi aphphisukkisa hee'ookkokii allaachchi biir hundannem yoo hix gogukkisa hee'ookkokii hinki balli afeebe'e? Ee mashka'inne fooraam diinatii ammarii hundim beeddita'a bi'llo'o.

⁵Waa'i iina «Ermiyaase, lokkinne geettam keeninne xoreexxancha hooggoohan ihulas faradaaninne maqire xoreexxantaa hinkid xantootto? Biir uullanne qoxxitaa uullimma xantibeelas Yoordaanoos doo'm woronne hinkid uullitaa xantootto?

⁶Kiyyabbaayyuwwii kiina hincixxi qarmannii keese laggo'ookko; ixxuwwim kiinninne uullixxanteena ki'llo'ookko; ee bikkina ki illagenne ki bikkina eroomma woccota'nnim amma'nnititte» yukko.

⁷Waa'i «Isra'eela uraammo; an doo'llummi i minaadabam ixxuwwi diina'ina higisaa uwwaammo.

⁸An doo'llummi i minaadab eesenne diina'i ikka'a ki'llo'o; doo'm wo'l hobbichchisam eesenne korooxxa'a ki'llo'i bikkina an ixxuwwa sabaammo.

⁹An doo'llummi i minaadab hundem kollinnem cingiraallinne kibbamu ciikkichchisa ikko'ookko; ee bikkina bii'l moochchi waaraa ixxuwwika maara itaa liiramoo'isina weeshshehe.

¹⁰Lobakat awwonsaan i woyi'n kaashshi beyyo bi'isso'ookko; i abuulli beyyuwwam hancaacansito'ookko; mishisoo i uullam udma'i uulli issito'ookko.

¹¹Udma'i uulli issito'i bikkinam i illagenne diih ihaakko; uulli hundim udma'i uullanne daba'llaakko; eehanni bikkinam sawwoo manchi matim bee'e.

¹²Udma'i ihu mahim bee'i duunnuwwiinsi bi'issam manni waattamo; iikki bisa'i uullooma tochchiinsi tochchi afeebe'e bi'isoo bikkina ayyim xumminne hee'eena xanooyyo.

¹³I minaadab arasa wixxa'a hallutta wixxaa'llo'o; baxonne lobakata qondoodda'a matem tirfam siiddo'oyyo; i malaayyaam quunqiinsi ki'ukkok ixxuwwik atoot hundim bi'ukko» yukko.

¹⁴Waa'i «I minaadab ikko'i Isra'eelina uwwummi uulla bi'isso'i Isra'ee'l olla'ina wocoommi luwwi yookko; ee boqqi minaadaba ixxuwwi uulliinsi hundiinsim xoqolaa massoommo; Yihuxxi minaadabam ixxuwwi angiinsi gatisoommo.

¹⁵Ihukkaarem ixxuwwa uulliinsi fissaa lasonne dabaraa ixxuwwina qishixxato issoommo; minaadaba annannichchom ixxi gaqqi uullaa ixxi gaqqi gulummi uulli yoo beyyoo dabaraa woroommo.

¹⁶I minaadaphpheka amma'nnato wo'm wodaninne aa'lla'a ixxuwwi kanniinsi illageen i minaadaba Ba'aal yakkam qophpha'n waa'i summinne hide'llamisa losisso'isam ‹‹Hee'oo Waa'i›› summinne› yita'a hide'llaman ihulas i minaadaphphi lambe'enne hee'llamisa issoommo.

¹⁷Ixxuwwi lambe'enne iina ijaajamoobee'ek hee'ulas xoqolaa bi'issoommo; an Waa'i kaka wocaammo» yukko.