Read Hadiyya Ermiyaas Kitaaba 13 Bible Online

Ermiyaas Kitaaba 13 - Hadiyya bible

Ermiyaas Kitaaba 13

¹Waa'i iina «Talbi fatirinne dadamaakkoo sabbata bitaa'llaa lade'e; ihukkaarem ixxonne wo'i afoone» yukko.

²Ee bikkina Waa'i ijaajukkisannem sabbata bitaa'aa lade'ummo.

³Waa'i edaatim iina

⁴«Efiraaxiis daajji kolli mattaa sabbatooma ki'n bonqoq woronne maaxe» yukko.

⁵Ee bikkina Waa'i ijaajukkisannem maraa Efiraaxiis daajji gammalanne ee sabbata maaxummo.

⁶Lobakat balliinsi lasonne Waa'i «Efiraaxiis daajje daba'llitaa mattaa ee sabbata maaxxitti beyyiinsi aa'e» yukko.

⁷Anim maraa sabbata maaxummi beyyo siidummo; sabbata siidaa lasonne sabbatoom bi'aa awwaadoobee'isa ihaa hee'ukko.

⁸Ee lasage Waa'i iina

⁹«Yihuxxi manni bolxoomaa Yerusaalee'm manni biranchaa ka'isa issaa bi'isoommo.

¹⁰Ku jollinne wo'mmito'oo minaadab iina ijaajancha sabbo'ookko; hinki ammaniinsim lobokata xiiqqaammuwwi ikko'ookko; qophpha'n waa'uwwina otossitu'uuyyi awwaaddamuulla; eehanniinsi ki'ukkok ixxuwwi awwaad bee'an ihaa gatu ka bi'u sabbaxxisa ikkamo.

¹¹Sabbat lamadonne xishshaa xaaxamaa hee'oo'isam Yihuxxi minaadabii Isra'ee'l minaadabii iinninne maqire xembeqita'a hee'llamisina sawwaa hee'ummo; kakam issummok i minaadab ikkamisinaa iina galataa lombaa uwwitamisinattee hee'ukko; ihukkaarem ixxuwwi iina ijaajanto'oyyo» yukko.

¹²Moollanni Waa'i iina «Ermiyaase, ‹Jaalo'onne hundannem woyi'n diqaas wo'mmookko› yitaa Isra'ee'l minaadabina kure; ee ammane ixxuwwi Jaalo'i woyi'n diqaasinne wo'mmoo'isa neese lanqoombee'eka labissaatennihe?» yitamo.

¹³Ee lasage an Waa'i ka uullanne hee'llam manna hundim dimbiteebe'i afeebe'e woyi'n diqaasa aggamisa isseena sawwummisa kure; ee ammane Daawiit adilla'n barcumanne afuuttam adilluwwa, qeessuwwa, hiraagaanoo Yerusaaleemanne hee'llam mannaa hundim woyi'n diqaasinne dimbitamisa issoommo.

¹⁴Ee ammane anno'oo ixxuwwi oosoo hundam jaalo'isa ixxuwwana'i ixxuwwam qoccansoommo; matem mishan, qishixxatii biijoomii bee'ekam ixxuwwa bi'isoommo» yukko.

¹⁵Isra'ee'l minaadaba, Waa'i wocaakkoo bikkina ki'nnuwwika bolxooma uttakka'a ixxi woshsha macceessehe; qoossitakka'a macceessehe.

¹⁶Ixxi tuunso eeboo'n ee tuunsoo duunnuwwannem ki'nnuwwi lokki qolamoo'n illageen neeyyato issitakko'i caakkim gambabbi tuunsonne daba'lloo'n ki'nnuwwi Moollanni Waa'ina lomba uwwehe.

¹⁷Ihukkaarem macceensoommoyyomdu yitakkolas Ki'nnuwwi bolxoo'm bikkina maaxamaa wi'lloomo; Waa'i minaadab qeefadanta'a marimmanne mushmushaa wi'lloommo; i indiiddim uroobee'isa daadookko.

¹⁸Waa'i iina «Lombi yoo adilla'n mare'i ixxuwwi horooriinsi ubu bikkina adilii adi'l amaa adilla'n barcumiinsi dillitamisina kure.

¹⁹Woroo'n qarinne yoo beero'uwwi diina'inne kibbamu bikkina ayyim ee beyyo mareena xanooyyo; minaadab hundim qeefadanta'a matto'ookko» yukko.

²⁰Yerusaaleema, hanaa'n qarinne waaroo ki diina'a moo'e; abooyyittuuyyi hee'llittokii kiina bakki ihaa hee'u minaadabii hannonne yookkahe?

²¹Iina beshshuwwa yitoo keen hundim keesenne weerattam keenoo keese gassitam gassaanoo ikka'a moo'antu'uuyyi at mayyitoottahe? Qattam meentichchosa keese xuuchchi amadooyyonnihe?

²²«Ku hundim eesenne afukkok mahinatte? I eddechchi dereeramaa maxaramummok mahinatte?» yitaa xa'mmitta'n ku hundim keesenne afukkok ki baaxiil lophphimmiinsi ki'ukkan ihukkisa la'e.

²³Tophphe'i uulli manchi ixxeka hagara kabeechchim ixxi gadarooma dabasseena xanooyyo; ee'isam ki'nnuwwim jor baxo baximma lossakko'oo bikkina er baxo baxxakka'a xantakkamoyyo.

²⁴Ihukkaarem kaba udma'i uulli hafachchi fii'aa massoo bura'isa Waa'i ki'nnuwwa binnaa'ookko.

²⁵Ki'nnuwwik sharad kan ihoo'isa Waa'i wocaakko; ixxo xaddakka'a qophpha'n waa'uwwanne amma'nnantakko'i bikkina ki'nnuwwanne kaka isseena murte'aakko.

²⁶Waa'i ixxi gagim ki'nnuwwika eddechcha maxaraa ki'nnuwwik tuulli orachchi moo'amoo'isa issookko.

²⁷Mashka'oomim ixxi saboo luwwa baxxakku'uuyyi moo'aakko; ixxi beshichchi mi'n amanne saa'eena mixoo manchisaa gannichchonne maagula'eena hasoo farashshisaa ki'nnuwwi hanqo'i Waa'a laqqambee'i manni waa'uwwa laseessakka'a duunnuwwi ludonnee biir uullannee hundannem jallitakku'uuyyi moo'aakko; Yerusaalee'm minaadaba, aayye! Muccuttakkeena xantakkamok hinki balla?