Read Hadiyya Ermiyaas Kitaaba 14 Bible Online

Ermiyaas Kitaaba 14 - Hadiyya bible

Ermiyaas Kitaaba 14

¹Hanenne waaroo qaanne'i bikkina Waa'i

²«Yihuxxi minaadab kichchechchannette; beero'i mannim leheena wotta'amoolla; minaadabim kichchechchi mashka'inne uullanne afuutta'a wi'llitamuulla; Yerusaalee'm mannim hara'mmato siiddeena laattamuulla.

³Goddaan wo'o siiddeena ixxuwwi baxaano asse'llamo; ixxuwwim wo'i bare mattamo; ihukkaarem wo'ika ma'lluwwam siiddambee'i bikkina harachcho iyyita'a kora'am daba'llitamo; neeyyato mutta'a duduqitam bikkina tuullinne ixxuwwika horoore gunguu'llitamo.

⁴Xeen bee'immiinsi ki'ukkok uulli gogookko; abuullaanim neeyyato mutta'a tuullinne ixxuwwika horoore gunguu'llitamo.

⁵Hix bee'immiinsi ki'ukkok gaallichchi qarukkisam wotarooma biir uullanne uunjaa marookko.

⁶Bii'l hallim wo'i xeebiinsi ki'ukkok duu'n lud hundannem uullita'a wengereellisa enjeessu'uuyyi hassamo; ittam luwwa siiddambee'i bikkinam illi jaamookko.

⁷I minaadab ‹Maham ni baaxiil neesenne dutaa naqqasuta'nnim Waa'a, ki neeyyaxxi saga'llisanne niina at hara'mme; lobakat ammane kiinniinsi qee'llinaammo; keesem hawwondaammo.

⁸Isra'ee'llek neeyyat xale'i atette; boobaniinsi neese gatissoottokim atette; eehannah ni uullanne koyyiinchisaa mat balla garoo araatichchisaa ikkittok mahinatte?

⁹Muggaa agaagimma hoogu o'l manchisa ikkittok mahinatte? Waa'a, at niinninne yoonto; neesem ki summinne weeshammaammoo minaadaba; ee bikkina at neese uttitte› yita'a i kolli laattamo» yukko.

¹⁰Waa'i ka minaadaphphi bikkina «Iinniinsi qee'llita'a gibimma iittitamo; ixxuwwi gaga ege'llitamoyyo; ee bikkina an ixxuwwanne liiramoommoyyo; baxxo'i baaxiil hundam sawwaa ixxuwwi baaxii'l bikkina guzumo'oommo» yukko.

¹¹Waa'i iina «Ka minaadaba hara'mmoommisina eese uunxititte.

¹²Hara'mmoommisina soommantu'uuyyi uunxitota'nnim macceesoommoyyo; shokkiisakkam kitimaa hurbaaxxi kitimaa hincaa'llota'nnim ee keenonne an liiramoommoyyo; hore'oomam orinne, sibaarinnee weeraroo jabbinnee beedditamisa issoommo» yukko.

¹³Anim «I Moollanni Waa'a! hiraagaan ‹Orii sibaarii hee'ooyyo› yitu'uuyyi minaadabina woccamuulla; ‹Ni uullanne xale'i xummi ihoo'isa Waa'i wocaakko› yitamuulla» yummo.

¹⁴Waa'im dabaraa «Hiraagaan i summinne qophphano woccamuulla; an ixxuwwa asse'ummoyyo; ijaajom uwwummoyyo; matem sagaram ihuta'n ixxuwwina kurummoyyo; ‹Moo'nnaammo› yitam kaalti hundim iinniinsi ihaakkoohaneyyo; ixxuwwik hiraag hundim qophpha'n kaalta, gennimma, qophpha'n waa'uwwina otossimmaa ixxuwwi sawwitiinsi ki'aakkoo awwaad bee'i woshshisaa.

¹⁵An asse'oo'nnim ‹Ni uullanne sibaarim ihuta'n bagad waarooyyo› yitu'uuyyi i summinne hiraago woccam ka hiraagaano an Waa'i ixxuwwa orinnee sibaarinnee letamisa issoommo.

¹⁶Ku hiraag wocamu minaadab hundim orinnee sibaarinnee letamo; ixxuwwi leeshim Yerusaalee'm googguwwanne hundannem ubookko. Ixxuwwa waammookkokim hee'ooyyo; oohim ixxuwwi meentonne, goo'n oosonnee landannee hundannem ihookko; ixxuwwi hawwojjisinnem laboo guzumo'o uwwoommo» yukko.

¹⁷Ee bikkina Waa'i ixxi minaadabina «‹I minaadab lobakata omaraakko; jorisam hawwodamaakko; ee bikkina hiimoo ballaa i illiinsi indiiddi dunamoolla; uroo'nnim wi'lloommuulla.

¹⁸Hax uulla firumta'n oranne leto'i mannik leesh ubaa moo'oommo; beero'i lambe'e aagumta'n sibaarinne leheena hincaakkoo manna moo'oommo. Hiraagaanii qeessuwwii ixxuwwi quuxo laseessamuulla; ihukkaarem issitam luwwa laqqamoyyo› yihe» yaa ijaajukko.

¹⁹Waa'a, Yihuxxi minaadaba hore'oomam uunjiteenannihe? Xiyoo'n minaadabdu sabbittisam utteenannihe? Fayye'nnoombee'i qaxa kaa'nna hawwodammoommisa issittok mahinatte? Xumma siindoommo yinaa neeyyato issinaa hee'nnummo; ihukkaarem matem er luwwim ihukkoyyo; fayya'ooma siindoommo yinaa neeyyato issinaa hee'nnummo; ihukkaarem dambaq exxukkuuyyi marukko.

²⁰Waa'a! Neese keese hawwondaammo; ee bikkina ni gaqqekaa gaassi niyyanno'ikkaa baaxiilo ki illagenne biiraa yinoommo.

²¹Ki neeyyaxxi sagara sawwitaa neese gadditte; ki nuur moo'amoo ki lombi adilla'n barcum hee'oo Yerusaaleema sholle'nnanne uunjititte; niinninne maqire aaggitti hidi'l sagara gindititte.

²²Waa'a laqqambee'i minaadaphphi waa'uwwiinsi matim xeena ga'nniseena xanooyyo; iimanim ixxi doo'llinne xeen kifoo'isa issooyyo; Ni Moollanni Waa'a! Ka hundam issitoottok atette ikki bikkina neese neeyyato issinoommok keesennette.