Read Hadiyya Ermiyaas Kitaaba 15 Bible Online

Ermiyaas Kitaaba 15 - Hadiyya bible

Ermiyaas Kitaaba 15

¹Ee lasage Waa'i «Muse'ee Saamu'eelii i illagenne uullita'a uunxitota'nnim ka minaadabina qishixxoommoyyo; ee bikkina i illagiinsi ekkid mattamisa isse.

²‹Eehannah hanno mallonatte?› yita'a keese xa'mmitolas kanniinsi illageen ‹Jabbinne letamisina oogatanto'i keen jabbinnem letamo; orinne letamisina oogatanto'i keen orinne letamo; sibaarinne letamisina oogatanto'i keen sibaarinne letamo; qeefadanta'a karantamisina oogatanto'i keen qeefadantamo› yaa kiina kurummoka tiissiise.

³An Waa'i soor jor luwwi ixxuwwanne afoo'isina murte'aammo; ee bikkina oranne letamo; ixxuwwi leesham wish gosaasookko; ammarim ixxuwwika maara itookko; gatu qaxa moochchi kankanookko.

⁴Hizqiyaas beet Minaase Yihudanne adil ihu ammane Yerusaaleemanne baxu jolli bikkina hundinam ixxuwwanne afoo luwwiinsi ki'ukkok uulli minaadab girgiroo'isa issoommo» yukko.

⁵Waa'i «Yerusaalee'm minaadaba, ki'nnuwwina ayyi qishixxookko? Ki'nnuwwina kichche'ookkokdu ayyette? Hofqax ammancho giphaa ki'nnuwwi duuha'a xa'mmookkok ayyette?

⁶Ki'nnuwwi eese uttakko'ookko; Ki'nnuwwi iinniinsi laso daba'llitakko'ookko; ka lasage an ki'nnuwwina qishixxoommoyyo; i angiinnem ki'nnuwwa xaansoommo.

⁷Bura'i hafachchanne binnoo'isam uullanne yoo beero'uwwi hundannem ki'nnuwwa binnaa'ummo; jor baxiinsi daba'llimma hoggakko'i bikkina i minaadab ikkakko'i ki'nnuwwa bi'isummo; ki'nnuwwikam ooso shakkamisa issummo.

⁸Ki'nnuwwi uullanne yo'i busar meentik xig uulli shashshariinsi hanaan ihaakko; harde'i oos umur afoo'nnim letamisinaa ixxuwwi ammo'onnem kee'mmaalli hawwi afoo'isinaa issoommo; dangonne afoo kichchechchinnee dambaqinnee ixxuwwa aphphisoommo.

⁹Lamar ooso hooggo'i ama lobakata neeyyato murimminne fooshshe'imma hoogga'a muddantamuulla; isena ballik caakki tuunsonne daba'llaakko; sholle'nnii tuullii isenne afaakko; foorinne yoontakke'i keenom diina'i shoo'isa issoommo; an Waa'i kaka wocaammo» yukko.

¹⁰An hinkido'i gada'a jora! Iyyumma eese qatto'i balli bi'e; uullanne yoo manninne hundinnem nunnuroommokii wocamoommokii mahinatte? An i diinate mannina liqaayyisummoyyo; te'im ayyeensim liqaayyo aa'ummoyyo; eehannah manni hundim eese mahina duumoolla?

¹¹Ee lasage Waa'i «Hanqoomam an keesenne er baxo baxeena keese gatisoommo; hawwi ammanee u'n ammanee ki diina'i keese qooxxaqqoo'isa issoommo.

¹²Minaadaba, naasinne hamaaramaakkoo xaara iiqqakkeena xantakkambee'isam hanaa'n qarinne ki'nnuwwanne xabbu diina'i ora kaa'llakkeena xantakkamoyyo» yukko.

¹³Odim Waa'i iina «Ki'nnuwwi uullanne hundannem baxxakko'i baaxii'l mashka'inne ki'nnuwwi horaa amaxxaa matem miqo'i bee'ekam massitamisina diina'ina higisaa uwwoommo.

¹⁴I quunqi xoo'oobee'i gii'llisa; ee bikkina manni uullanne ki'nnuwwi diina'ina awwaadaan ikkakkamisa issoommo.

¹⁵Anim ee lasage «Waa'a! At laqqootto; ha'i at sawwihee hara'mmee; eese hollitam kee'nneka baado fire bagaan iyyaqqitaa cawwimminne an bi'ona uttitte; ku game'llat eesenne afukkok ki mashka'innette.

¹⁶Gogoxxi Moollanni Waa'a! An ki summinne weeshamaammo; ki sagar i beyyo waaru ammane hundam aa'aammo; i wodanim liiranchinnee lobakat liiranchinnee wo'mmaakko.

¹⁷An daabbaroo manninne maqirem osarummuuyyii liiramummuuyyii iina yoo ammane kora'isanne bi'isummoyyo; ki quunqi eesenne ihu bikkina mullam afuurummo.

¹⁸Jabbi eesenne qoxxukkok mahinatte? Omar fayye'oo'n hee'oommokdu mahinatte? Billenne gogoo bu'isa neeyyato mussiisseenannihe?» yummo.

¹⁹Ee bikkina Waa'i dabaraa «I kollonne daba'llitlas keese iina awwaadaanchi ikkoo'isina dabaraatim uullisoommo; awwaad bee'i luwwa wocimma uttaa awwaad yoo woshsha kuttilas odim iina hiraagaanchi ikkootto; minaadab ki kollonne daba'llitamo bagaan at ixxuwwi kolli mattooyyo.

²⁰At ixxuwwinne uullixxanteena xantoo'isina an keese naasinne ootamu ooxxisa qoxxisoommo; kiina agaageenaa keese gatiseenaa kiinninne maqir ihummi bikkina kiinninne orantota'nnim kaa'lleena xantamoyyo.

²¹Jor kee'n angiinsi keese gatisoommo; mogaalli kee'n angiinsem keese gatisoommo; an Waa'i kaka wocaammo» yukko.