Read Hadiyya Ermiyaas Kitaaba 17 Bible Online

Ermiyaas Kitaaba 17 - Hadiyya bible

Ermiyaas Kitaaba 17

¹Waa'i «Yihuxxi minaadaba, ki'nnuwwi baaxiil xaa'l mu'utinne kitaabamaakko; almaaza yakkam bito xee'aalli mutur kininnem ki'nnuwwi wodanonnee kitimo hincaa'llakkam mu'uxxi buudonnee kitaabamaakko.

²Ki'nnuwwi oosim latu haqqi lugummuwwannee qeeraa'l duunnuwwi ludonnee yoo ixxuwwi kiti'm beyyuwwaa Asheer misilluwwaa sawwitamuulla.

³Moo'amoo duunnuwwanne kido'i baaxiilo baxxakkamuulla; uulli hundannem baxxakko'i jolli mashka'inne ki'nnuwwika horaa amaxxaa hundam ki'nnuwwi diina'i massitamisa issoommo; ee'isam kitima hincaa'llakkam mu'uttuwwa hundam ki'nnuwwi diina'i qeefadda'a massitamisa issoommo.

⁴Ki'nnuwwina uwwummi uulla fatakitakka'a mattakkamo; i quunqi heer heerinam gii'llisa aphphoo bikkina laqqakkambee'i uullanne ki'nnuwwi diina'ina awwaadaan ikkakkamisina issoommo» yukko.

⁵Waa'i «Eese uraa mannanne amma'nnookkok maara edde'u manchom ‹Iina malaayye› yaa bakke'ookkok duumamaakkoohan ihona.

⁶Eehido'i manchi ayyim hee'eena xanoobee'i sooqixxi uullannee gogaalli udma'i uullannee mutoo haqqichchisa ihookko. Ixxi hee'oo doollenne hundannem er luwwa moo'eena xanooyyo.

⁷«Ihukkaarem xale'i eesenne amma'nnaa hee'oo manchi maasse'amaakkoohane.

⁸Ixxi daadoo daajji gadanonne kaasamukkaannisa, wo'i woronnem xapha kaasukkaannisaa shokkiisoo eelliinchonnem quuboobee'aannisa, buyyim latoohaannisa, billi maaragem gogoobee'aannisa, hundi ammanem misha uwwoo haqqichchisaa ihookko» yukko.

⁹«Mannika sawwite ayyi la'eena xanookko? Mannik wodan hundi luwwiinsim loboka hantaaraanchoo boqqaa.

¹⁰Ihukkaarem an Waa'i mannika tiiroo woda'n sawwitee saarayyoommo; annannichchom baxu baxisinnee ixxi taakkisinnee guzumo'oommo» yukko.

¹¹Damiginne amaxxa wixxaa'oo manchi quunqe'ubee'i quunqam qaaphphaa bacoo heedoochchi'nnoohane; harde'oo'm doo'llenne hora hundam hoogookko; lasaanchonne ixxek qawwoom la'amookko.

¹²Ni Waa'i min baxamu beyyi gaassiinsim ki'isaa lombinne yoo adilla'n barcu'mmisa.

¹³Waa'a! Isra'eelina neeyyat atette; keese uttam keen hundim tuuttamo; heechchina wo'i bu'i ikkitti keese Waa'a utto'i bikkina ixxuwwik summi uullanne kitaabamookko.

¹⁴Waa'a! At eese fayyiise; anim fayye'oommo; at eese gatise; anim xumminne hee'oommo; hundi ammanem an keese galaxxoommo.

¹⁵Minaadab eese «Ermiyaase, Waa'i wocaakko yittoka niina kuttaa hee'llitto; eehannah kaba ihubee'ek mahinatte?» yita'a xa'mmitamo.

¹⁶Ihukkaarem Waa'a! An ixxuwwanne boobana dilliissona keese uunxummi amman bee'e; ixxuwwanne hawwi doolli afoo'isinam mixummoyyo; Waa'a! At kakaa an wocummokaa hundam laqqootto.

¹⁷At iina hawwi ammane maaxamoommi beyyi ikki bikkina muggissitte.

¹⁸Waa'a! Eese hollitam keenonne sholle'nna eebe; ihukkaarem at eese tuussiissitte; ixxuwwi dambaqqamisa isse bagaan eese muggissitte; iiqanta'a xaamteebee'e eddaa eddaa ixxuwwa bi'ise.

¹⁹Waa'i iina «Yihuxxi uulli adilluwwi beero'iinsi fitta'a aaggam minaadaphphi goocannee ee'isam Yerusaaleemanne yoo mulli gooccuwwannee mattaa uulle.

²⁰An kiina kuroommokam ‹adilluwwii minaadabii ee'isam ka ooxxi gooccuwwinne aaggakkam Yerusaalee'm mannii Waa'ika sagara macceessehe.

²¹Ki'nnuwwika foore gatixxitakkeena usheexxaxxi ballanne maham iyyitakka'a Yerusaalee'm gooccuwwinne aaggakkambee'isa ege'llehe.

²²Gaassi ki'nnuwwika anno'o ijaajummisam usheexxaxxi balla keessakka'a egellehe bagaan iyyo iyyitakka'a ki'nnuwwi miniinsi fittakkotte; usheexxaxxi ballanne maham baxxakkotte.

²³Gaassi ki'nnuwwi anno'i i sagara macceesso'oyyo; i ijaajom egetto'oyyo; hore'em xiiqqanta'a iina ijaajanta'a iinniinsi losano aa'imma sabbo'ookko.

²⁴«Eehannah i woshsha macceessamanemdu ihulas ku minaadab i ijaajo egettamisina kure; usheexxaxxi ballanne matem luwwam iyyita'a beero'i goocinne aaggoone; usheexxaxxi balla keesamaakkoohan issita'a lonsitona bagaan matem baxom baxxoone.

²⁵«Daawiit adilla'n barcumanne afuutto'i adilluwwi maqi'l daannuwwinne maqirem Yerusaaleem gooccuwwinne aaggamo; ixxuwwim Yihuxxaanninnee Yerusaalee'm minaadabinnee maqire faradonnee faraxxi gaare'ennee saa'llitamo; Yerusaalee'm beero'im hundi ammanem manni wo'mmaa hee'oohan ihookko.

²⁶Minaadab Yihuxxi beero'uwwiinsi, Yerusaalee'm kululleetanne yoo hoffi beero'uwwiinsi, Biiniyaam uulliinsi, qaala'iinsi, hansawwiinsii woroo'n qariinsii wixxaa waarookko. Ee lasage shokkiisakka'a hincaa'akkam kitimaa mulli kitima, hurbaaxxi kitimaa aduruusaa galaxxi kitiminne maqirem Keesammi i mine eebbamo.

²⁷Ihukkaarem iina ijaajanchii usheexxaxxi balla keessa'a egerimmii hasisookko; usheexxaxxi ballanne ma'lluwwam iyyita'a Yerusaalee'm ooxxi goocinne aagimmi hasisooyyo; ihukkaarem i ijaajo aa'imma sabba'a kaka issitolas Yerusaalee'm ooxxi gooccuwwii adi'l minneewwii giirinne shookkoo'isa issoommo; giirooma xoo'iseena xanookkok ayyim hee'ooyyo› yitaa kure» yukko.