Read Hadiyya Ermiyaas Kitaaba 18 Bible Online

Ermiyaas Kitaaba 18 - Hadiyya bible

Ermiyaas Kitaaba 18

²«Ki'llaa buchchi mu'uta baxoo manchi mine dille; eekke'enne an kiina i asso kuroommo» yukko.

³Anim ee beyyo maraa buchchi mu'uta baxoo manchi shafe'e laboo luwwanne dora issaa baxukkuuyyi moo'ummo.

⁴Buchchi mu'utim ixxi anganne bi'u ammanenne harooma dabaraa qufisaa ixxi hasukkisanne issaa mulli mu'uta baxukko.

⁵Ee ammane Waa'i iina

⁶«Isra'ee'l minaadaba, buchchi mu'uta baxoo manchi hara hasukkisa issaa baxoohaannisam anim ki'nnuwwanne hasummi luwwa isseena xanoommoyyonnihe? Har buchchi mu'uta baxoo manchi anganne hee'oohaannisam ki'nnuwwim i angannette.

⁷An mat uulli minaadaba te'im mat adi'l uulla ‹Xoqoloommo; te'im iiqaa bi'isoommo› yaa wocummi ammane

⁸ee uulli minaadab saxxita'a jolliinsi daba'llitolas eeboommoo yaa sawwummi jor luwwa ixxuwwanne issoommoyyo.

⁹Mullisinne odim an mat uulli minaadaba te'im mat adi'l uulla ‹Baxoommo; te'im kaasoommo› yaa wocummaa'lleensi

¹⁰oo minaadab iina ijaajantambee'anee jor baxo baxxamanee ikka'a siidantolas issoommo yaa sawwummi eroomma issoommoyyo.

¹¹Ee bikkina an ixxuwwa guzumo'eenaa ixxuwwanne jor luwwa isseenaa sawwummisa Yihuxxaanninaa Yerusaalee'm minaadabinaa kure; ixxuwwi baaxiilo baximma uttamisinaa ixxuwwi taakkoo ixxuwwi baxoo hundam xabbaa'llamisinaa soge.

¹²Ihukkaarem ixxuwwi ‹Mahina neese eekka issinoommo? Hore'em xiiqqinnee boqqoominnee ni sawwixxesanne taakke'nnoommo› yita'a dabattamo» yukko.

¹³Ee bikkina Waa'i «Kido'i luwwi kanniinsi illageen ihaada'e mulli minaadaba xa'mmehe; hanqo'isam baajaamotte hee'llo'i Isra'eela shigigaa'oo baxo baxxo'ookko.

¹⁴Liibaanoos kinaam duun baradinne ifiisamubee'i amman yoohonnihe? Duuniinsi dilloo siggaalli wo'i bu'uwwi gogaa la'oohonnihe?

¹⁵Ihukkaarem i minaadab eese xaddo'ookko; awwaad bee'i waa'uwwinam aduruusa wiriistamuulla; oo awwaad bee'i waa'uwwim i minaadab laqqambee'i googonne mattamisa issito'ookko; qolanta'atim gaassi googo utto'ookko.

¹⁶Ixxuwwi uulli heer heerina gadamaakkoohanee udma'aa ihookko; gadaninne higookkok hundim gadimminne horoore heekkeesookko; maalalaatim horoore heekkeesookko.

¹⁷Dir eelliinchi firoo kolli hafachchinne binnoohaannisa i minaadaba ixxuwwi diina'i illagenne binnaa'oommo; iikkam illi kollo ixxuwwiinsi dabaraa afare daba'lloommo; bichchi ixxuwwanne afoo ammanem hore'em hara'mmoommoyyo» yoolla.

¹⁸Minaadabim «Ermiyaasanne mat luwwa issinona; seera losissam qeessuwwi, sogitano uwwitam qoolluwwii hiraago woccam hiraagaanii hundi ammanem ni lambe'enne yo'i bikkina Ermiyaasika woshsha macceesimmiinsi ixxi wocoo woshshinne ixxom kasansona» yito'o.

¹⁹Ee bikkina an «Waa'a! I uunxato macceese; i maso'i eesenne woccam jor a'llancha macceese.

²⁰Eehannah er baxik bitoom jor luwwa issimmannihe? At ixxuwwanne quuqqoobee'isa an ki illagenne uullaa ixxuwwi bikkina keese uunxummisa sawwihe; ihukkaarem oono'o, ixxuwwi an uboommi bare hinto'ookko.

²¹Ihukkaarem kaba Waa'a! Ixxuwwik oos sibaarinne beedditamisaa ixxuwwi gagim bisa'inne ubbamisaa isse; ixxuwwik meenti goonaa oosoo hooggona; goon jabbinne lettona; harde'uwwim oranne beedditona.

²²Ixxuwwanne weeraroo manna dangonne asse'e; ixxuwwi minenne laachchi macceesamona; ixxuwwi iina uboommi bare hinto'ookko; an amadamoommi qaashsham gudisso'ookko.

²³Waa'a! Ixxuwwi eese shiteena a'llanto'isa laqqootto; ee bikkina ixxuwwika jolla uraammo yititte; ixxuwwi baaxiilim shiinshamoo'isa issititte; malaayyaam ki quunqinne kaa'anta'a ubbamisa isse» yaa Waa'a uunxummo.