Read Hadiyya Ermiyaas Kitaaba 19 Bible Online

Ermiyaas Kitaaba 19 - Hadiyya bible

Ermiyaas Kitaaba 19

¹Waa'i iina «Minaadaphphi lambe'iinsii qeessuwwi lambe'iinsii lob keeno doo'llitaa kiinninne maqirem amaddaa mattaa buchchi mu'uta baxoo manchi miniinsi harachcho bitaa'e.

²Buchchi mu'uxxeka gala'a uunjakkam Gooc kollinne aa'llaa Hiinoo'm beet Cebba mare; eekke'ennem an kuroommi luwwa

³«Adilluwwii Yerusaalee'm minaadabii hundim Isra'ee'l Waa'i ihummi gogoxxi Moollanni Waa'i ki'nnuwwina kuroommi woshsha macceessehe; macceesoo manni maccina shigigaa'oo jor boobana ka beyyonne eeboommo.

⁴Mashka'oomim ku minaadab eese uraa qophpha'n waa'uwwina kitima hincaa'imminne ka beyyo haashaassito'i bikkinatte; ixxuwwi, ixxuwwi anno'ii Yihuxxi adilluwwii ee waa'uwwi bikkina laqqam luwwi bee'e; odim ixxuwwi ka beyyonne muccur mannik xiig dunamoo'isa issito'ookko.

⁵Ixxuwwi oosom kitim issita'a shokkiisseena Baa'aala yakkam qophpha'n waa'ina kiti'm beyyo baxxo'ookko; eehid issitamisina an ijaajummoyyo; hore'em ka woshshi bikkina sawwummoyyo.

⁶Ee bikkina ku beyyi Toofeeta te'im Heenoo'm Cebba yimmi gataa Duranchi Cebba yakkam amman waarookko.

⁷Yihuxxekii Yerusaalee'm minaadabii sawwito'i luwwi hundim ka beyyonne wo'mmoobee'isa issoommo; ixxuwwi diina'i illagenne kaa'antamisaa ixxuwwi foore shiteena hassam kee'n angannem ubbamisaa issoommo; ixxuwwi leesham iima'n ammarii uulli moochchii itoo'isa issoommo.

⁸Ka beero'onne kee'mmaalli hawwo asse'aa bi'isoommo; ee bikkina higookkok hundim afu bichchanne maalalaa hoola ixxena yookko.

⁹Diina'i beero'ooma kibbita'a minaadaba shiteena u'nnissamo; beero'oom lobakatisa kibbamaakkoo bikkina woronne yo'i manni hundim ixxuwwina'i ixxuwwim itantamo; ixxuwwi gaqqi oosom ihuta'n ittamo» yukko.

¹⁰Ee lasage iinninne maqire matto'i manni illagenne ee harachcho iiqoommisina ijaajukko.

¹¹Gogoxxi Moollanni Waa'i ixxuwwina kuroommisina «Ku iiqamu harachchi daba'llaa somameena xanamoobee'isam ku minaadabii ku beero'ii ee'isam iiqamookko; manni lehu leesha waammitam beyyo hoogga'a Toofeeta yakkam beyyonne waammitamo.

¹²Ka beero'oo ka beero'i woronne hee'llam mannaa hundam Toofeetanne issummisam issoommo.

¹³Yerusaalee'm minaadabii adilluwwii hee'llam minneewwi ee'isam mi'n illichchonne iima'n qooccanchuwwina aduruusa wiriissakkam beyyoo qophpha'n waa'uwwina woyi'n diqaasa dunakkam minneewwaa hundam Toofeetisa haashaarammi beyyi ihoo'isa issoommo› yoolla yitaa kure» yaa ijaajukko.

¹⁴Ee lasage Waa'i ixxi sagara kuroommisina ijaaju Toofeeta yakkam beyyiinsi daba'llaa waarummo; Keesammi Minenne manni wixxoo beyyonne uullaa minaadab hundinam

¹⁵«Gogoxxi Moollanni, Isra'ee'l Waa'i ‹Ka beero'annee kululleetanne yoo gattuwwannee hundannem waarookko yaa kurummi boobana eeboommo; mashka'oomim ixxuwwi xiiqqanta'a i sagarina ijaajanto'oyyo› yoolla» yaa kurummo.