Read Hadiyya Ermiyaas Kitaaba 20 Bible Online

Ermiyaas Kitaaba 20 - Hadiyya bible

Ermiyaas Kitaaba 20

¹Keesammi mi'n gassaanchi hee'u Iimeer beet Phaashihuur ka an wocummi woshsha macceesaa

²eese aphphisukko. Keesammi Minenne hanaa'n kollinne yoo Biiniyaam Gooca yakkam beyyonne i lokko gudeeranne aagisaa karukko.

³Daram Phaashihuur eese karatiinsi tirukko; ee lasage an ixxena «Kanniinsi eehid Waa'i ki summa Phaashihuur yaa weeshooyyo; kaba kiina fissu summi ‹Beyyi hundim Dambaqa› yoohane.

⁴Waa'i gagim ‹An keese ki gaginaa ki beshinaa dambaqa qooccitoohan isseenatte; ki illi moo'onam ki besh diina'i bisa'inne letamo; minaadaba hundam Baabiloo'n adi'l anganne higsaa uwwoommo; Baabiloo'n adilim kolli manna qeefadaa massookko; kolli manna odim keyyem shookko.

⁵Ee'isam ka beero'ika hora hundam diina'i bogga'a massitamisina, wixxaa'llakko'i horaa amaxxaa adilluwwika bito xee'aalli mu'utaa hundam guullita'a Baabiloona massitamisa issoommo.

⁶Phaashihuura, atii ki abaroosii hundim qeefadantakka'a Baabiloona mattakkamo; atii kiinninne maqire qophpha'n hiraago wocco'i ki beshii eekke'em letakka'a waammantakkamo› yoolla» yummo.

⁷Waa'a! At eese qawwiissitto; anim qawwiisamummo; at iinniinsi malaayyaamo; ki malaayyim eesenne lobakata lophphaakkoohane; manni hundim ballina ballina eesenne osarukkuuyyi naacukko.

⁸An wocoommi amman hundam «Dambaqaa! Bichchaa!» yummuuyyi laaroommo. Waa'a! At ijaajjitti hiraaqqi sagara wocummi bikkina game'llakkamanee gadakkamanee ihaammo.

⁹Ihukkaarem «Kanniinsi eehid Waa'ika summa ki'isoommoyyo; ixxi summinnem wocoommoyyo» yummita'n ki sagar i woronne gii'llisa aphphukko; i miq woronnem gii'l kasha'llisa ihukko; i woronne maaxoommo yumta'n ifiisaa caawweena xanoommoyyo.

¹⁰Lobakat manni baddita'a hashaashshitu'uuyyi ‹Kaba Ermiyaase kasasimmina danaam ammane› yitu'uuyyi macceesaammo; iina hincee'n beshim ikkota'n ‹Ermiyaas huushameena xanookko; eehidette ihulas neese ixxo amandaa baado miqinsoommo› yita'a an huushamoommisa egettamuulla.

¹¹Ihukkaarem wodaamoo malaayyaamoo ikkaattoo Waa'a! At iinninne maqire yoonto; ee bikkina eese hollitam keen hundim qolantamo; ixxuwwi sawwito'okim wo'mmooyyo; hundem luwwim wo'mmeena xanoobee'i bikkina heer heerinam sholle'llamo; ixxuwwikim sholle'n xadamoobee'an ihookko.

¹²Hundam xantoo Waa'a! Ihukkaarem at hundem luwwam xabbi saarayyitootto; ixxuwwi wodanonnee tiironnee maaxamu luwwa hundam laqqootto; i meto'om kiina kuraammoo bikkina i maso'ika baado fittittuuyyi i illinne moo'oommisa isse.

¹³Waa'ina zammallehe; Moollannam galaxxehe; ixxi u'nnanto'i keeno jor kee'n wodiinsi gatisookko.

¹⁴An qaramummi balli duumamaakkoohan ihona; iyyumma eese qatto'i balli maasse'amaakkoohan ihoone.

¹⁵Iyyannina «Kiina goonchi beet qaramaakko; liirame» yaa mishiraachcha kuru manchi duumamaakkoohan ihona.

¹⁶Oo manchi Waa'i qishixxoo'n bi'isu beero'uwwisa ihona; darinne jabbika laachcha macceesona; ballanne odim o'l dambaqa macceesona.

¹⁷Mashka'oomim ixxi eese an qaramoo'nnim shukkoyyo; iyyummi godabim iina waammi beyyi ihukkoyyo.

¹⁸Hawwoo kichchechchaa moo'eena i umu'l doollem sholle'nninne guulleena mahinam iyyummi godabiinsi firumda'e?