Read Hadiyya Ermiyaas Kitaaba 21 Bible Online

Ermiyaas Kitaaba 21 - Hadiyya bible

Ermiyaas Kitaaba 21

¹Adil Sedeeqiyaas Malkiy beet Phaashihuuraa Ma'iseey beet hee'u qeessichchi Safooniyaasaa i beyyo asse'aa

²«Baabiloo'n uulli adil Nabukadanaxoor ixxi gogotinne maqirem ni beero'o weeraraa amadeenatti ihu bikkina Waa'i illagee'nnisam aganna baxaa or waaroobee'isa issoo'isina qaqqissaa Waa'a uunxe» yaa xa'mmisukko.

³Ee ammane wocoommi sagara Waa'i kuraakkoo bikkina i beyyo asse'anta'a waatto'i manni Sedeeqiyaasina

⁴«Isra'ee'l Moollanni Waa'i, ‹Sedeeqiyaasa› ki beero'i ootiinsi biireen keese kibbito'i Baabiloo'n adilinnee ixxi gogotinnee orantootti o'l mu'ut hundim keesenne daba'llaa keesem qasoo'isa issoommo; oo o'l mu'utim beero'i lambe'enne tuubamoo'isa issommo.

⁵I malaayyee kee'mmaalli i quunqaa bala'aa moo'amoo'isa issaa an gagim kiinninne oramoommo.

⁶Ka beero'onne hee'oo mannaa fooraam diinatee aphphisoommo; kee'mmaalli jabbinnem letamo.

⁷Keesee ki gassaanoo sibaariinsi, oriinsii jabbiinsii gattam minaadabaa hundam adil Nabukadanaxooraannonnee keese shiteena hassam diina'i angannee higisaa uwwoommo; ixxim qishixxoo'n te'im mishoo'n shookko bagaan matom urooyyo; an Waa'i kaka wocaammo› yoolla yitakka'a kullehe» yummo.

⁸Ee lasage Waa'i ixxi minaadabina «Oono'o, macceessehe; an Waa'i heechchi kollonnnee leh kollonnee massoo googo ki'nnuwwi illagenne dissaammo; lamiinsim matooma doo'llehe

⁹Kaba ka beero'onne gatookkok hundim oriinsi gatukkaarem sibaarinne lehookko; sibaariinsi gatukkaarem jabbinne lehimma gatooyyo; ihukkaarem ka beero'o kibbita'a yo'i Baabiloo'n manni beyyo maraa anga uwwoo manchi ixxi lehooyyo; mulleka hoogukkaarem ixxi foochchooma gatixxookko.

¹⁰Ku beero'i bi'oo'isina murte'aammo; hore'em qishixxoommoyyo; Baabiloo'n uulli adilina higisaa uwwoommo; ixxim giirinne shokkiisookko; An Waa'i kaka wocaammo» yaa kuroommisina ijaajukko.

¹¹Daawiit shumo'i ikko'i adi'l abaroosina kuroommisina Waa'i iina uwwu sagar «An Waa'i ki'nnuwwina kuroommi sagara macceessehe; darina darina hanqi bi'oobee'isa issehe; mat mulleka bogaa hawwodoobee'isa egellehe; ihukkaarem eekka issitakkobeelas ki'nnuwwi baxxakkam jolliinsi ki'aa i quunqi gii'llisa aphphookko; xoo'iseena xanookkokim hee'ooyyo.

¹³Yerusaaleema, biir uullanne yoo geejji ki'nnesa cebbuwwiinsi hanaanim fittaa siidantoolla, ihukkaarem an kiinninne oramoommo; ayyim keese iggookkokaa girbam gindaa aagookkokaa labissittoyyo.

¹⁴Ihukkaarem at hawwodditti hawwojji hundinam an keese guzumo'oommo; ki adilla'n min giirinne shokkoo'isa issoommo; oo giirim ee kululleetanne hee'oo luwwa hundam itookko; an Waa'i kaka wocaammo» yoohane hee'ukko.