Read Hadiyya Ermiyaas Kitaaba 23 Bible Online

Ermiyaas Kitaaba 23 - Hadiyya bible

Ermiyaas Kitaaba 23

¹Waa'ina allaachchi ihu ixxi minaadaba binnaa'llam keeninaa bi'issam awwonsaaninaa aayye!

²Isra'ee'l Moollanni Waa'i ixxi minaadaba egettam awwonsaanina «I minaadaba laboo'isinne egettakko'oyyo; baasam hollitakka'a binnaa'llakko'o; ee bikkina baxxakko'i jollina hundinam ki'nnuwwa guzumo'oommo.

³Gatto'i i minaadaba binnaa'ummi uulliinsi hundiinsim wixxaa'aa ixxuwwi gaqqi uulla dabaroommo; eekke'em lobakat ooso qattam bikkinam fikkaannita'a dut ikkamo.

⁴Ixxuwwa egettam awwonsaano doo'lloommo; i minaadab kanniinsi eehid baddimmii muggimmii bee'eka hee'llamo; anim la'mmaagge ixxuwwa guzumo'oommoyyo; ixxuwwiinsi matim xa'ooyyo; an Waa'i kaka wocaammo» yoolla.

⁵Waa'im «Oono'o, Daawiit shumo'iinsi muccur ihaakkookkoka adillanina doo'lloommi amman waarookko; oo adilim qooroominne gassookko; uullanne hundannem hanqo'i oogatoo xabbee'n baxoo baxookko.

⁶Ixxi adilla'n doollenne minaadab gatimma siixxitamo; Isra'ee'l minaadabim xummanne hee'llamo; ixxi summim ‹Waa'i niina muccurooma› yamamookko.

⁷«Ee bikkina manni ‹Isra'ee'l minaadaba Gibxi uulliinsi fissu Waa'i la'e› yaa hide'oobee'i amman waarookko.

⁸Ihukkaarem eehanni bikkenne ‹Isra'ee'l minaadaba hanaa'n qarinne yoo uulliinsee binnita'a hee'llam mulli uulluwwiinsee fissu hee'oo Waa'i la'e› yita'a i summinne hide'llamo; ee lasage ixxuwwi gaqqi uullanne hee'llamo» yukko.

⁹Hiraagaa'n bikkina sawwoommi ammane i wodan kichche'ookko; i miqim huxe'ookko; Waa'i bikkinaa ixxi keesammi saga'l bikkinaa woyi'n diqaasa agaa dimbu manchisa ihaammo.

¹⁰Uulloom Waa'a laggo'oo saalmaachchitam keeninne wo'mmaakko; hiraagaanim ixxuwwika malaayye seerbee'isa awwaaxxitamo; jolli googom awwontamo; Waa'i duunchiinsi ki'ukkok uulli wi'llokko; allaachchi biirim gogaakko.

¹¹Waa'i «Hiraagaa'nnekii qeessuwwikii heechchi muccuroo'm googiinsi firaakko; mullek gataa keesamaakkoo I Minenne ixxuwwika jor baxo moo'aammo.

¹²Ee bikkina ixxuwwik goog luxuunxisoo uullisa ihookko; tuunsonne taakke'llam ammane googo huushanta'a ubbamo; guzumo'antam ammane jor luwwa ixxuwwanne eeboommo; an Waa'i kaka wocaammo.

¹³Samaare'i hiraagaan baxxo'oo shigigaa'oo luwwa moo'aammo; ixxuwwi Baa'ool summinne woccu'uuyyi i minaadab Isra'eela huushissamuulla.

¹⁴Ihukkaarem Yerusaaleemanne yo'i hiraagaanim kanniinsi baas jollem baxxu'uuyyi moo'aammo; ixxuwwi saa'llamo; qophphanom woccamo; manna jor baxina bootaassitamo; eehanniinsi ki'ukkok minaadab jor baxiinsi daba'llitamoyyo; ee bikkina ixxuwwi i illagenne Soddo'm minaadabiinsii Gomo'l minaadabiinsii loboka jor keeno.

¹⁵«Eehannah an gogoxxi Moollanni Waa'i Yerusaalee'm hiraagaanina; ‹Uullanne hundannem lagimmi lophphoo'isa issito'i bikkina qaraaroo buyya ittamisinaa shoo qaraare aggamisinaa issoommo› yoolla» yukko.

¹⁶Gogoxxi Moollanni Waa'i Yerusaalee'm minaadabina «Ku hiraagaan woccam woshsha macceessakkotte; ixxuwwi qophpha'n neeyyaxxi sagarinne ki'nnuwwina woccamo; woccamokim ixxuwwi sawwixxane bagaan an wocummaneyyo.

¹⁷I sagara macceesseena hassobee'i minaadabina ‹Hawwi bee'e; ki'nnuwwina xummi ihookko› yitamo; xiiqqamoohaannina hundinam ‹Hawwi bee'e; booban keesenne afooyyo› yitamo» yukko.

¹⁸Ixxuwwi lambe'iinsi Waa'i illagenne uullaa ixxi sagara macceesukkokii ee sagarinam beyyo uwwaa ijaajamukkokii ayyette?

¹⁹Oono'o, Waa'ik quunqi boqquwwi kee'n horoorenne wiisho'aam xee'nnisaa qoxxaalli hambu'llamisaa dillukkuuyyi moo'e.

²⁰Waa'ik quunqi Waa'i sawwixxeka hundam wonshoo'n hore'em daba'llooyyo; minaadabim ee hundam ka lasage erisa laqqamo.

²¹Waa'i «Ku hiraagaan ixxuwwi doo'llinnem qaqqissa'a matto'o bagaan an asse'ummoyyo; ihukkaarem ixxuwwi woccamisina an uwwumbee'i hiraaqqi sagaram i summinne woccamuulla.

²²I sogitano aa'llo'oota'n i sagara minaadabina kuttam hee'llo'o; boqqi googiinsii ixxuwwi jor baxiinsii daba'llitamisina issimma xantam hee'llo'o.

²³«An hundem beyyonnem hee'oommi abbis Waa'a bagaan qee'l Waa'ayyo.

²⁴An iimanennee uullannee yoommaneyyonnihe? manni daphphanne maaxamuta'n an moo'oommoyyonnihe?

²⁵I summinne qophphano woccam hiraagaan yitam luwwa macceesummo; ixxuwwim ‹haqaawwo haqaawwe'aammo; haqaawwo haqaawwe'aammo› yitu'uuyyi laattamo.

²⁶Oo hiraagaan ixxuwwi gagim qooccito'i qophpha'n sagarinne i minaadaba huushissamok hinki balli afeebe'e?

²⁷Ixxuwwi anno'i eese xaddo'isaa Ba'aala yakkam qophpha'n waa'ina otossito'isaa ixxuwwi kuttam haqaawwinne i minaadab eese xadoo'isa issitamoka labisso'ookko.

²⁸Haqaawwo haqaawwe'u hiraagaanchi yoolas xale'i ee haqaawwooma kurona; ihukkaarem i sagara macceesu hiraagaanchi amma'nnanchinne xale'i ee sagara kurona; bura'ina arasinne maqire mah mateeyyoom hee'aate?

²⁹I sagar gii'llisaa kina iiqoo fanxiisisaa yoohane.

³⁰Ee bikkina mat mullaanniinsi sagara game'aa ‹Kuk Waa'i sagara› yikkuuyyi wocoo hiraagaano an saboommo.

³¹Ee'isam ixxuwwi sawwitiinsi ki'issa'a ‹Kuk Waa'i sagara› yitu'uuyyi woccam hiraagaano saboommo.

³²Oono'o, an Waa'i wocoommi woshsha macceessehe; ixxuwwika qophpha'n haqaawwo an saboommo; ee haqaawwo woccu'uuyyii qophphaninne birantu'uuyyii i minaadaba hanqo'i googiinsi huushissamo; an ‹Mallehe› yaa asse'ummoyyo; minaadabinam awwaadoo luwwa uwwito'oyyo. An Waa'i kaka wocaammo» yoolla.

³³Waa'i iina «Ermiyaasa, hiraagaanchi te'im qeessichchi te'im i minaadabiinsi matoom ‹Waa'ik iyyi maruwwa?› yaa keese xa'mmuta'n ‹Waa'ik iyyi ki'nnuwwa; ee bikkina ki'nnuwwa ixxi illagiinsi hooreenatte› yitaa kure.

³⁴Hiraagaanchi te'im qeessichchi te'im i minaadabiinsi matoom ‹Kuk Waa'i iyyo› yaa woculas ixxoo ixxi abaroosaa guzumo'oommo.

³⁵Ee bikkenne annannichchim ‹Waa'ik dabachchi maruwwa? Waa'i wocukkok maha?› yaa ixxi beshaa ixxi qarmannaa xa'mmimmi hasisookko.

³⁶Ihukkaarem kanniinsi eehid ayyi manchim ‹Kuk Waa'i iyyo› yaa wocimmi hasisooyyo; Waa'ik sagar hinkid iyyi iheena xanookko? Ihukkaarem ki'nnuwwi gogoxxi Moollanni Waa'ika hee'oo sagara boqqissakkamuulla.

³⁷Ermiyaasa, hiraagaanchina ‹Waa'i kiina mah dabachcha uwwukko? madu wocukko?› yitaa xa'mme.

³⁸Ihukkaarem i ijaajo gindita'a ‹Kuk Waa'i iyyo› yita'a woccaman ihulas ‹Kuk Waa'i iyyo yitakkotte› yaa asse'ummaarem ixxuwwi ‹Kuk Waa'i iyyo› yito'i bikkina

³⁹ixxuwwaa ixxuwwi anno'ina uwwummi beero'oo uunjoommisaa i illagiinsi bi'isoommisaa kure.

⁴⁰Hore'em xadamoobee'i heer heeraxxi tuullaa sholle'nnaa ixxuwwanne eeboommo» yukko.