Read Hadiyya Ermiyaas Kitaaba 24 Bible Online

Ermiyaas Kitaaba 24 - Hadiyya bible

Ermiyaas Kitaaba 24

¹Baabiloo'n adil Nabukadanaxoor Iyoo'aaqeem beet hee'u Yihuxxi adila Ikkooniyaana, Yihuxxi minaadaphphi awwonsaano, ee'isam anga lachchi mannaa woqqaaccaa Yerusaaleemiinsi qeefadaa Baabiloona massaa lasonne oda'i mishika lam sananna Keesammi Mi'n illagenne Waa'i moo'isukko.

²Luxxi sananni mulli keeniinsi gaassaa mishu danaam oda'i misha amadaakkoohane; la'm sananni odim itisoobee'i bi'aakkoo oda'i mish yoohane.

³Waa'im «Ermiyaasa, ku moo'lloo luwwi maruwwa?» yukko. Anim «Oono'o, oda'i misha moo'oommuulla; danaam mish lobakata mishisoohane; ihukkaarem bi'u mish lobakat jor ihu bikkina itakkeena awwaadoobee'ane» yummo.

⁴Ee bikkina Waa'i

⁵«Isra'ee'l Moollanni ihummi Waa'i Baabiloo'n uulla mattamisa issummi minaadaba ka danaam oda'i mishisa moo'oommo; eroomminnem sawwoommo.

⁶Ixxuwwi heechchi bikkinam sawwaa ka uulla daba'llitamisa issoommo; an ixxuwwa baxoommo bagaan gindoommoyyo; kaasoommo bagaan xoqoloommoyyo.

⁷An Waa'i ihummisam laqqamisa issoommo; ee lasage wo'm wodaninne i kollonne daba'llitam bikkina ixxuwwi i minaadab ikkamo; anim ixxuwwina Waa'i ihoommo.

⁸«Ihukkaarem Yihuxxi adila Sedeeqiyaasaa ixxi kululleetanne yo'i ixxi gassaanoo, ee'isam ka uullanne gatto'i Yerusaalee'm mannaa Gibxi uulla matto'i mannaa hundam itakkambee'isa ihaa lobakata bi'u jor oda'i mishisa sawwoommo.

⁹Qeefadanta'a binnitamisa issummi uulli minaadaphphi illagenne hundannem sabanto'oohane, game'llakkamane, ixxuwwi bikkina wocakkamane, gadakkamanee duumanto'oohanee ikkamisa issoommo.

¹⁰Ixxuwwinaa gaassi ixxuwwi anno'inaa uwwummi ka uullanne matem manchim gatoobee'isa orinne, sibaarinnee jabbinnee beedditamisa issoommo» yukko.