Read Hadiyya Ermiyaas Kitaaba 25 Bible Online

Ermiyaas Kitaaba 25 - Hadiyya bible

Ermiyaas Kitaaba 25

¹Yihuxxi adil hee'u Iyyoosiyaas beet Iyyoo'aaqeem adil ihu soo'l hiinchonnee Nabukadanaxoor Baabiloo'n uullanne adil ihu luxxi hiinchonnee Yihuxxi minaadabina hundinam Waa'ik sagar i beyyo waarukko.

²Ee bikkina Yihuxxi minaadabinaa Yerusaaleem beero'i manninaa

³«Amoon beet Iyyoosiyaas adil ihu tommiinsii sas hiinchiinsii ki'isaa kaballi afeebe'e lamiyyinaa sas hiinchinaa Waa'ik sagar i beyyo waaram hee'ukko; ixxi sagaram ki'nnuwwina edaa edaa wocimma urummoyyo; ihukkaarem ki'nnuwwi qoossitakka'a macceessakko'oyyo.

⁴Waa'i ixxena awwaaddam hiraagaano edaa edaa ki'nnuwwi beyyo asse'uta'nnim ki'nnuwwi qoossitakka'a macceessakko'oyyo.

⁵Ixxuwwim ‹Waa'i ki'nnuwwinaa ki'nnuwwi anno'inaa uwwu ka uullanne heer heerina hee'llakkeena xantakkamisina jor googiinsii jor baxiinsii daba'llehe.

⁶Qophpha'n waa'uwwam laseessakkotte; ixxuwwinam awwaaddakkottee otossitakkottee; ki'nnuwwi anginne baxxakko'i qophpha'n waa'uwwina otossitakka'atim Waa'a quuqissakkotte; ka ijaajom egettakkolas ixxi ki'nnuwwa guzumo'ooyyo› yito'o.

⁷Waa'im ‹I woshsha macceessakko'oyyo; ki'nnuwwi angiinne baxxakko'i qophpha'n waa'uwwinnem eese quuqissakko'ookko› yoolla.

⁸«Ixxi sagarina ijaajancha sabbakko'i bikkina gogoxxi Moollanni Waa'i

⁹‹Oono'o, hanaa'n qarinne yo'i minaadabaa i awwaadaanchi ihu Baabiloo'n adil Nabukadanaxooraa weeshoommo; Yihuxxi minaadabaa woronne hee'llam keenoo ee'isam gabalanne gatto'i minaadabaa bi'issamisina ixxuwwa woroommo; ka uulla gaba'l uullinne maqirem moo'akkeena baddisoohanee manni osaroohanee iheebe'i afeebe'e heer heerinam gindamaakkoo uulli ihoo'isa issoommo; an Waa'i kaka wocaammo.

¹⁰Liiranchik, ilillaaxxekii bollochcho'i kajji sagarii hee'oobee'isa issoommo; ayyi manchim hurbaata liitoobee'isa te'im hiimonne caakka caakkisoobee'isa issoommo.

¹¹Uulloom hundim gindamaakkoohanee udma'aa ihookko. Ku minaadabii ixxuwwi kululleetanne yo'i mulli minaadabii Baabiloo'n uulli adilina lamarayyi hiincho awwaadaan ikkamo.

¹²Ee lasage lamarayyi hiinchi beeddoohaare Baabiloo'n uulla, minaadabaa ixxuwwi adilaa ixxuwwi baaxii'l mashka'inne guzumo'oommo; Baabiloo'n uullim heer heerinam gindamaakkoohan ihoo'isa issoommo.

¹³An Ermiyaas kollinne ihaa minaadab hundannem eeboommo yummi ka kitaabanne kitaabamu booban hundam Baabiloo'n uullanne dilliisimminne guzumo'oommo.

¹⁴Baabiloo'n minaadab baxxo'i jollina hundinam guzumo'antamisa issoommo; dut minaadabii lob adilluwwii agiddano gassitamo› yoolla» yummo.

¹⁵Isra'ee'l Moollanni Waa'i iina «I quunqinne wo'mmaakkoo woyi'n diqaasika humbullo i angiinsi aa'e; an asse'oommi minaadaphphi beyyi hundam mattaa aggamisa isse.

¹⁶Ixxuwwi hanenne asse'oommi oriinsi ki'ukkok ka humbulliinsi aggam ammane ixxuwwi gaga huushsha'a tartaritamo» yukko.

¹⁷Ee bikkina humbullooma Waa'i angiinsi aa'aa ixxi asse'u minaadaphphi beyyo hundam maraa aggamisa issummo.

¹⁸Yerusaalee'mmekii Yihuxxi beero'ikii minaadab adilluwwinnee gassaaninnee maqire ka humbulliinsi aggamisa issakko'o; ee bikkina oo beyyuwwi kaballam moo'akkeena lobakata baddisoo'isam udma'a manni naacoohanee duunchi beyyoo ihukko.

¹⁹Gibxi uulli adil Faari'oona, ixxi gassaano, daannuwwa, minaadabii hundim,

²⁰eekke'enne hee'llam hamaarammi minaadaba, Oox uulli adilluwwa, Asqaloonanne, Gaaza'anne, Eeqiroonannee Ashdoodannee gatto'i Filisxee'm adilluwwa,

²¹Eedooma, Moo'aaba, Amoona,

²²Xiiroos adilluwwaa Siidoo'n adilluwwaa, hundam Meedeteraaniyaa'n dambalaq kululleetanne hee'oo uulli adilluwwaa

²³Daadaa'nnekaa, Teemaa'nnekaa Buuzikaa horoo'l saraata gundissa'a muttam minaadaba,

²⁴Araphphi uulli adilluwwaa uulli udma'anne hee'llam hamaarammi minaadaphphi adilluwwaa,

²⁵Zamiirika, Eelaa'mmekaa Meedoo'n adilluwwaa hundam

²⁶Qee'llonnee abbisonnee yo'i hanaa'n qarinne yo'i adilluwwa hundam tarinne tarinne uullanne yo'i minaadab hundinam ka humbulliinsi agisummo; lasaanchonnem Baabiloo'n uulli adil ka humbulliinsi agookko.

²⁷Ee lasage Waa'i iina «Isra'ee'l Waa'i ihummi gogoxxi Moollanni Waa'i ixxuwwanne eeboommi oriinsi ki'ukkok dimbita'a uwwe'lleebe'ee ubba'atim ki'imma hooggeebe'ee aggona ijaajoommisa minaadabina kure.

²⁸Humbullooma ki angiinsi aa'lla'a agimma sabbolas ‹Gogoxxi Moollanni Waa'i ka humbulliinsi aggakkamisina ijaajaakko› yitaa kure.

²⁹Bi'isimmooma i summinne weeshamu beero'inne asheeroommo; eehannah guzumo'anchiinsi xottamoka labissa'atennihe? An uullanne hee'llam minaadabanne hundannem ora eeboommi bikkina guzumo'anchiinsi gatookkok hore'em hee'ooyyo; an gogoxxi Moollanni Waa'i kaka wocaammo.

³⁰«Ermiyaasa, atim an kiina kurummi sagar hundam alallaatimmi hasisookko; ka minaadabina ‹Waa'i iimaninne lob sagara macceesisoolla; ixxaanniinsi keesammi heechchi beyyiinsi guga macceesisoolla; uullannem lob sagara macceesisoolla; woyi'n misha ciinsitam kee'nnisam lob sagarinne wocoolla; uullanne hee'llam keen hundannem lob sagara macceesisoolla.

³¹Ixxi sagarim uulli tochchi afeebe'e afookko; Waa'i minaadaba hundam kasasookko; oogaxxi beyyom ixxuwwa worookko; jor keenom lehinne guzumo'ookko. Waa'i kaka wocaakko› yihe» yukko.

³²Gogoxxi Moollanni Waa'i «Oono'o, uulli minaadab hundannem kor korinne booban waarookko; malaayyaam hambu'llam hafachchim uulli tochchiinsi ki'ookko.

³³Ee ammane Waa'i lehinne guzumo'oo mannik leesh uulli tochchiinsi tochchi afeebe'e binnookko; wi'llookkokii ki'isaa waammookkokii hee'ooyyo; ee bikkina haccisa uunjantamo.

³⁴«Ki'nnuwwi, awwonsaan wi'llehe; ki'nnuwwi minaadaphphi egeraan sagara iimaa'llakka'a ‹Aayye! Aayye!› yi'llehe. Gii'l buchchanne biqqiiqqitakku'uuyyi kichche'llehe; hundim durantakkam amman afaakko; bito xee'aalli buchchi mu'ut ubaa iiqamaa lasonne binnoohaannisa ki'nnuwwim binnitakkamo.

³⁵Awwonsaanina gibbam beyyi bee'e; minaadaphphi egeraanim xotteena xantamoyyo.

³⁶Allaaraanim laattamo; Waa'i allaachchi beyyo bi'isu bikkina diinaxxi anno'i qaraaraalli wi'llo wi'llitamo.

³⁷Malaayyaam Waa'i quunqiinsi ki'ukkok ixxuwwi xumminne hee'llam beyyi gindamaakko.

³⁸Wor amaddam kee'n bisa'innee malaayyaam Waa'i quunqinnee uulli diihoo ammane hobbichchi geex garoo beyyo uraa giboohaannisa ixxuwwim gibbamo» yoolla.