Read Hadiyya Ermiyaas Kitaaba 26 Bible Online

Ermiyaas Kitaaba 26 - Hadiyya bible

Ermiyaas Kitaaba 26

¹Iyyoosiyaas beet Iyyoo'aaqeem Yihuxxi uullanne adil ihukkisam

²Waa'i iina «Keesamaakkoo i Mi'nnaannonne manni wixxoo beyyonne uullitaa Yihuxxi beero'uwwiinsi otossiteena i mine waatto'i Yihuxxi minaadabina an ijaajummi sagariinsi matim gatoobee'isa hundam kure.

³Ayyi la'ukko minaadaboom ee sagara macceessa'a jor googiinsi daba'lliteena xantamo; daba'llitolas baxxo'i jolliinsi ki'ukkok bi'iseena sawwummi sawwitiinsi daba'lloommo» yukko.

⁴Waa'i minaadabina kuroommisina «Macceessakkobeelasii an uwwummi seera egettakkobeelasii

⁵edaa edaa ki'nnuwwi beyyo asse'ummi iina awwaaddam hiraagaa'n sagara macceessakkobeelasii

⁶ijaajantakkambee'an ihulasii Seelo'onne issummoka hundam ka keesamaakkoo Minennem issoommo; ka uulli minaadaphphi illagenne ka beero'o duumamaakkoohan issoommo» yukko.

⁷Qeessuwwi, hiraagaanii minaadabii hundim Keesammi Minenne ee sagara wocummuuyyi macceesso'ookko.

⁸Ihukkaarem wocoommisina ijaajukkoka hundam wocaa guullummisam qeessuwwi, hiraagaanii minaadabii hundim eese amadda'a «At lehimmi hasisookko.

⁹‹Ku Waa'ik Min Seelo'isa ihookko› yitaa Waa'i summinne hiraago woccittok mahinatte? Odim ‹Ku beero'im bi'ookko; woronnem hee'ookkok siidamooyyo› yittok mahinatte?» yita'a shuutto'o; eehanniinsi lasonne minaadab hundim wixxita'a kibbito'o.

¹⁰Yihuxxi awwonsaan ee woshsha macceesso'i ammanenne adi'l miniinsi fitta'a Waa'i Mi'n kolli waatto'o; Waa'i Mi'nnaannonne ‹Haareechchi gooca› yakkam goocanne afuutto'o.

¹¹Qeessuwwii hiraagaanii awwonsaaninaa minaadabinaa «Ku manchi wocu woshsha hundam ki'nnuwwi hundim macceessakko'ookko; Ni beero'onne jor hiraaqqi sagara wocu bikkina leh hasisookko» yito'o.

¹²An Ermiyaasim awwonsaaninaa minaadabinaa hundinam «Ka beero'onnee ka Waa'i Minennee ki'nnuwwi macceessakko'i sagara alallaatoommisina eese asse'ukkok Waa'a.

¹³Kabadem ki'nnuwwi hee'llakkam heechchaa baxxakkam baxoo axissakka'a Moollanni Waa'ina ijaajammehe; eehid issitakkolas Waa'i ki'nnuwwanne eebeena sawwu bichcha dabarookko.

¹⁴I bikkinatte ihulas oono'llehe ki'nnuwwi angannem yoommi bikkina ki'nnuwwina danaamoo erokaa labu luwwa hundam issehe.

¹⁵Ihukkaarem ka macceessakko'i sagara hundam ki'nnuwwina wocoommisina asse'ukkok hanqo'isam Waa'i ihu bikkina eese shitakko'aare muccur manchi xiiga duntakka'a ki'nnuwwi gagaa ka beero'oo woronne hee'llam mannaa baaxiilaan issitakkambee'isa egexxammehe» yaa qoxxisaa kurummo.

¹⁶Eehanniinsi lasonne awwonsaanii minaadabii «Ku manchi wocukkok ni Moollanni Waa'i summinnette ihu bikkina lehimmi hasisooyo» yita'a qeessuwwinaa hiraagaaninaa wocco'o.

¹⁷Odim lommanniinsi mat mat iimita'a wixxito'i minaadabina

¹⁸«Hizqiyaas Yihuxxi adil hee'u doollenne Mooresheexxi hiraagaanchi Mikkiyaas gogoxxi Moollanni Waa'i wocu hiraaqqi sagara minaadabina ‹Xiyoona abuulli uullisa abuullakkamo; Yerusaaleemim gindamu luwwina tuubbi ihookko; Keesammi min baxamu duunim haqqor ihookko› yaa alallaataa hee'ukko.

¹⁹Eehannah adil Hizqiyaasii Yihuxxi minaadabii Mikkiyaasa shito'onni'i Shito'oyyo? Hore'em adil Hizqiyaas Waa'a baddaa qishixxato issoo'isina Waa'a uunxukkoyyonnihe? Waa'im ixxuwwanne eebeena sawwu boobana urukkoyyonnihe? Ihukkaarem kaba neese kee'mmaalli hawwo ni gaganne eebaqqineena gundaammo» yita'a wocco'o.

²⁰Odim Qiiriyaatiyi'aariimanne hee'oo Shamaa'iy beet Uuriya yakkam mulli manchim hee'ukko; oo manchi Ermiyaasisam ka beero'onnee ka uullannee bichchi waaroo'isa Waa'i summinne hiraago wocaa hee'ukko.

²¹Adil Iyyoo'aaqeemii maqi'l daannuwwii gaaxxi awwonsaanii hundim Uuriy wocukkoka macceesso'i ammane Uuriya sheena adil hasukko; ihukkaarem Uuriy eekka macceesaa lobakata baddaa Gibxi uulla gibaa xorukko.

²²Ihukkaarem adil Iyyoo'aaqeem Akboor beet Eelanaataanii mulli mannii Gibxa dillita'a Uuriya wottamisina ijaajukko.

²³Ixxuwwim Uuriya Gibxiinsi wotta'a adil Iyyoo'aaqeem beyyo massito'o; ixxim bisa'inne shaa leeshooma kora'i manni waammamoo beyyonne uunjamoo'isa issukko.

²⁴Ihukkaarem Saafaan beet Ahiiqaam iina hara'mmaa i midaadinne uullaa hee'u bikkina eese shakkamisina minaadabina higisakka'a uwwakko'oyyo.