Read Hadiyya Ermiyaas Kitaaba 27 Bible Online

Ermiyaas Kitaaba 27 - Hadiyya bible

Ermiyaas Kitaaba 27

¹Iyyoosiyaas beet Sedeeqiyaas Yihuxxi uullanne adil ihukkisam Waa'i iina

²«Haqqinne gaanjaqqa baxxaa qirqire'enne usa kattaa ki axonne iyye.

³Yerusaaleemanne hee'oo Yihuxxi adil Sedeeqiyaasa xa'mmiteena waatto'i asse'amaanonne Eedoo'm uullaa Moo'aaphphi uullaa Amoo'n uullaa ee'isam Xiiroosaa siidoonaa gassitam adilluwwi beyyoo asso asse'ukko.

⁴Ixxuwwi moollanno'ina afissamisina gogoxxi Moollanni ihummi Isra'ee'l Waa'ika asso kure.

⁵‹Iihaanninne lob malaayyinnee qoxxaalli wodinnee uullaa manni shumo'oo uullanne mikmikoo soko'oo hundam qooccummo; uulla gassimmikam daannooma an iittummaannina uwwoommo.

⁶Kabadem ka uulli minaadab hundam i awwaadaanchi Baabiloo'n adil Nabukadanaxoorina higisaa uwwaammo; doo'm wo'l moochchim ixxena ijaajamookko.

⁷Minaadab hundim ixxena awwaaddamo; ee'isam Baabiloo'n minaadab ixxi adillaniinsi dilleebe'e Nabukadanaxoor oosinaa oos oosinaa awwaadaan ikkamo; ee lasage ixxi minaadab odim korina mulli malaayyaam minaadabinaa adilluwwinaa awwaadaan ikkamo›.

⁸Ihukkaarem adil Nabukadanaxoorina ijaajamoobee'ek gaanjem heeshaa'aa ixxi gaanjaqqoronne aagoobee'ek hinki minaadabim te'im adil Nabukadanaxoor angiinne bi'iseembee'e orinne, sibaarinnee jabbinnee guzumo'antamisa issoommo.

⁹Ee bikkina ki'nnuwwi Baabiloo'n adilina ijaajantakkambee'isa soggam hiraagaano, gennaanoo haqaawwo moo'llam keeno, leto'i manna weeshsham keenoo karo'aanoo macceessakkotte.

¹⁰Ki'nnuwwika uulla fatakitakkona an holloommisinaa bi'isoommisinaa qophpha'n hiraago qawwiissu'uuyyi woccamo.

¹¹Ihukkaarem Baabiloo'n adi'l axaqqiinsi woroon ijaajamaa awwaadoo minaadab ixxi gaqqi uullanne abuullukkuuyyi hee'oo'isa issoommo; eekka an Waa'i gagim wocaammo» yukko.

¹²Yihuxxi adil Sedeeqiyaasina ee sagara «Baabiloo'n adilina gibittittaaree ixxenaa ixxi minaadabinaa awwaaddittaare foorinne hee'llootto.

¹³Atii ki minaadabii jabbinnee sibaarinnee orinnee mahina beedditakkamo? Baabiloo'n adilina ijaajamoobee'i ayyi minaadabannem afookko yaa Waa'i wocukkok eehaneme.

¹⁴‹Baabiloo'n adilina ijaajantakkotte› yitam qophpha'n hiraagaa'n sagara macceessakkotte; ixxuwwi woccamok qophpha'n hiraago.

¹⁵Ixxi asse'oo'nnim qophpha'n hiraago Waa'i summinne woccamisa Waa'i gagim ki'nnuwwina kuraakko; ee bikkina ki'nnuwwa ixxi hollookko; ki'nnuwwii qophphano wocco'i hiraagaanii bi'llakkamo» yaa kurummo.

¹⁶Ee lasage Waa'i ijaajukkoka hundam qeessuwwinaa minaadabinaa «‹Waa'i Mi'n mu'ut hundim Baabiloo'n uulliinsi qaqqisom daba'llaa waarookko› yitu'uuyyi ki'nnuwwa qawwiisseena woccam qophphanaan hiraagaa'n woshsha macceessakkotte.

¹⁷Ee bikkina ixxuwwi woccam woshsha macceesimma uttakka'a Baabiloo'n adilina ijaajantakkolas foorinne hee'llakkamo; ijaajancha hoonginne ku beero'i gindamookkok mahinatte?

¹⁸Ixxuwwi hanqo'i hiraagaan ikko'oolasii an uwwummi hiraaqqi sagarim ixxuwwi beyyonne yoolasii qeefadamaa marubee'i Waa'i Mi'n mu'utaa adi'l mu'utaa hundam Baabiloona maroo'isa issoombee'isa hundam xanoommi Waa'a eese uunxitona» yaa kurummo.

¹⁹Baabiloo'n adil Nabukadanaxoor Yihuxxi adil hee'u Iyyoo'aaqeem beet Ikkooniyaan Yihuxxaanninnee Yerusaalee'm la'anto'oo manninnee maqirem Baabiloo'n uulla qeefadaa massu ammane utubbuwwa, naas xaarinne baxamaakkoo wo'i jaalo'o, lokkonne tululoo shafe'i yoo xarapheezzuwwaa Keesammi Mi'n mu'uttuwwika mulli keenoo Yerusaaleemanne uraa maraa hee'ukko.

²¹«Yerusaaleemannee Keesammi Minennee adi'l minennee gatu mu'uttuwwina hundinam Isra'ee'l Waa'i ihummi gogoxxi Moollanni Waa'i wocoommi sagara macceessehe.

²²I sawwite ixxuwwi kollonne dabaraa do'eembe'e ku mu'uttuwwi hundim Baabiloo'n uulla qeefadamaa marookko; ee lasage odim dabaraa ka beyyo woroommo; an Waa'i kaka wocaammo» yoolla.