Read Hadiyya Ermiyaas Kitaaba 28 Bible Online

Ermiyaas Kitaaba 28 - Hadiyya bible

Ermiyaas Kitaaba 28

¹Ee maarage Yihuxxi adil Sedeeqiyaas adil ihu soo'l hiinchi onti agananne Gaaba'oo'n beero'iinsetti ihu Aazuur beet hiraagaanchi Hanaaniy Waa'i Mi'n qeessuwwaannonnee minaadaphphaannonnee illagenne

²«Isra'ee'l Waa'i ihu gogoxxi Moollanni Baabiloo'n adi'lleka gaanjaqqa iiqoommo.

³Adil Nabukadanaxoor ka beyyiinsi Baabiloo'n uulla massu Keesammi mi'n mu'uta hundam lam hiinchi woronne dabaraa ka beyyo woroommo.

⁴Ee'isam Yihuxxi uulli adil Iyyoo'aaqeem beet adil Ikkooniyaanaa ixxenne maqirem qeefadanta'a Baabiloo'n uulla matto'i Yihuxxi minaadabaa dabaraa woroommo; Baabiloo'n adil iyyiisu gaanjaqqam iiqoommo› yaa an Waa'i kaka wocaammo» yaa iina kurukko.

⁵Anim qeessuwwi illagennee Keesammi Minenne uullita'a hee'llo'i minaadaphphi illagennee Hanaaniyina

⁶«Eeyya ihona; Waa'i at yittisam issona; Waa'i Mi'n mu'utaa qeefadanto'i minaadabaa ka uulla dabaraa at woccitti hiraaqqi sagara Waa'i wonshona.

⁷Ihukkaarem kiinaa ka minaadabinaa wocoommi sagara macceese.

⁸Gaassi doolle iinniinsii kiinniinsii illageen ki'llo'i hiraagaan lobakat minaadabannee la'anto'oo adilluwwannee or, sibaarii jabbii waaroo'isa hiraago wocco'ookko.

⁹Ihukkaarem xummi bikkina wocu hiraagaanchi hee'uta'n Waa'i hanqo'isinne asse'u hiraagaanchi ihukkis la'amookkok oo wocu sagar hanqi ihaa siidamoohaarette» yummo.

¹⁰Eehanniinsi lasonne hiraagaanchi Hanaaniy i gudumonne hee'u gaanjaqqa massaa iiqansukko.

¹¹Odim hundem minaadaphphi illagennem «Lam hiinchi woronne Baabiloo'n adil Nabukadanaxoorik gassi gaanjaqqa minaadaphphi gudumiinsi dilliisaa ka'isa iiqansoohan ihukkisa Waa'i wocaakko» yaa wocukko; anim eekke'iinsi ki'aa marummo.

¹²Hiraagaanchi Hanaaniy ee gaanjaqqa hiraagaanchi Ermiyaas axiinsi dilliisaa iiqansaa lasage Waa'ik sagar Ermiyaas beyyo

¹³«Mattaa Hanaaniyina ‹Oono'o, at haqqinne baxamu gaanjaqqa iiqqaatto; ihukkaarem an eehanni bikkenne xaa'l gaanjaqqa baxoommo.

¹⁴Baabiloo'n adil Nabukadanaxoorina awwaaddamisina ka minaadaphphi hanenne xaa'l gaanjaqqa iyyiisoommo; mullek gataa doo'm wo'l moochchannem daannooma uwwaammo› yitaa kure; an Isra'ee'l gogoxxi Moollanni Waa'i kaka wocaammo» yaa waarukko.

¹⁵Anim ee sagara Hanaaniyina «Hanaaniya, macceese; keese Waa'i asse'oo'nnim ku minaadab hundim qophpha'n woshshanne amma'nnoo'isa issitaatto.

¹⁶Ee bikkina Waa'i ‹Keese ka uulliinsi bi'isoommo; ku minaadab eesenne ixxuwwi Moollannanne boqqoo'isa issitaattoo bikkina ku hiinchi beeddeena iillageen letootto› yoolla» yummo.

¹⁷Hiraagaanchi Hanaaniy ee maaragem lama'l agananne lehukko.