Read Hadiyya Ermiyaas Kitaaba 3 Bible Online

Ermiyaas Kitaaba 3 - Hadiyya bible

Ermiyaas Kitaaba 3

¹Waa'i «Mat manchi ixxi meentichco holluta'n isem ixxeensi fitta'a mulli goonchonne affa'a lasonne la'mmaagge dabaraa ise eebeena xanoohonnihe? Eehid issulasa'e hore'oomam uulla haashaassoo bax ihookko. Ihukkaarem Isra'eela, ki'nnuwwi lobakat qophpha'n waa'uwwa iittitakko'ookko; eehannah kaba odim ki'nnuwwi i kollonne daba'llitakkeena hassakkamuullannihe?

²Hino'o, gaanje xabbaa'llakka'a duunnuwwi kolli moo'llehe; ki'nnuwwi qophpha'n waa'uwwina otossitakkobee'i beyyi hee'oonnihe? Uulli udma'anne hee'oo darba'oo Araphphi uulli mannisa goog hundannem afuuttakka'a ki'nnuwwi besha egettakkamo; saa'imminnee jollinnem uulla haashaassitakkamo.

³Ee bikkina qaraaxonne ga'nnoo xeenii hagayyenne ga'nnoo xeenii bee'ukko; ihukkaarem ki'nnuwwi kabadem saa'aanchi meentichchi qooccanne yoontakke'e; ki'nnuwwikim illi tuuroobee'ane.

⁴«Kabadem ‹Iyyanna, oosoomma'n i beshichcho› yitaa weeshshittoyyonnihe?

⁵Ki'nnuwwi iina hundi ammanem quuqqoohonnihe? At quuqqoottodu heer heerinattemennihe?» yitakko'ookko. Ihukkaarem Isra'eela, eehid yitakkamuulla bagaan ki'nnuwwi malaayyi xanuqax hundinnem jora baxxakkamuulla» yukko.

⁶Iyyoosiyaas adil ihu ammane Waa'i iina «Amma'nnamoobee'i Isra'ee'l minaadab maha baxuda'e moo'llittonnihe? Ixxuwwi qeeraa'l duunnuwwannee latu haqqi lugumonnee hundannem iinniinsi annanni ikka'a matta'a qophpha'n waa'uwwina otossimminne saa'llo'ookko.

⁷Ee hundam ixxuwwi baxxa'a lasonne odim i kollonne daba'llitamoka labisaa hee'ummo. Ihukkaarem ixxuwwi daba'llito'oyyo. Amma'nnantam bee'i Yihuxxi minaadabim eekka moo'llo'ookko.

⁸Amma'nnamoobee'i Isra'ee'l minaadab iinniinsi annanni ikka'a qophpha'n waa'uwwina otossito'i bikkina ixxuwwa hollummisa Yihuxxi minaadab moo'llo'ookko. Amma'nnitambee'i Yihuxxi minaadabim eekka moo'lla'a baddito'oyyo. Ixxuwwim matta'a qophpha'n waa'uwwina otossito'o.

⁹Ixxuwwim hore'em tuutto'oyyo; baasam kinannee haqqannee otossimminne uulla haashaassito'o.

¹⁰Ixxuwwi ee hundam baxxa'a lasonne amma'nnantambee'i Isra'ee'l minaadabina abbaayyuwwi ikko'i Yihuxxi minaadabim i kollonne daba'llitamoka labbo'ok wodaninnette ihoo'n gaanjiinsi iimette hee'ukko› yaa wocaakko» yukko.

¹¹Isra'ee'l minaadab iinniinsi annanni ikkota'nnim amma'nnantambee'i Yihuxxi minaadabiinsi e'llitamisa Waa'i iina kurukko.

¹²Ee bikkina Waa'i an hanaa'n qara maraa «Amma'nnantakkambee'i Isra'eela, i kollonne daba'llehe; iikki qishixxat lobakkat ihu bikkina quuqoommoyyo; ki'nnuwwannem quuqoommok heer heerinayyo.

¹³Ki'nnuwwi baaxiilaan ikkakko'isaa ki'nnuwwi Moollanni Waa'anne boqqitakko'isaa xale'e amma'nnehe; odim qophpha'n waa'uwwinne maqire latu haqqi lugumonne hundannem saa'llakko'isaa i seerinam ijaajantakkobee'isaa biiraa yi'llehe; an Waa'i kaka wocaammo.

¹⁴«Ki'nnuwwi amma'nnantakkambee'i minaadaba, i oos ikkakko'i bikkina daba'llehe; ki'nnuwwi lambe'iinsim hundem beero'iinsim mat mat mancho ee'isam hundem mi'n abaroosiinsim lam lam mancho doo'llaa Xiyoo'n duunanne woroommo.

¹⁵Lachchinnee do'ixximminnee i woda'nnisa ikko'oo awwonsitam allaaraano ki'nnuwwina uwwoommo.

¹⁶Ki'nnuwwik xig ee uullanne lobakata dutoo ammane i Hidi'l Saga'l Saaxi'n bikkina wocoo manni hee'ooyyo; eehanniinsi lasonne ixxi bikkina sawwitamoyyo; qoossiteenam xantamoyyo; ixxek awwaad mah ihuda'em ixxuwwina moo'amubee'i bikkina la'mmaagge mulleka baxxeenam hassamoyyo.

¹⁷Ee doollenne Yerusaaleem ‹Waa'i adilla'n beyyo yamamookko; minaadab hundim iina otossiteena eekke'enne wixxitamo; eehanniinsi lasonne xiiqqamoo jor woda'n sawwitem awwontamoyyo.

¹⁸Isra'ee'l minaadabii Yihuxxi minaadabii mat ikkamo; lamim mat ikka'a hanaa'n qaranne yoo uulliinsi qeefadanto'i beyyiinsi daba'llitamo; gaassi ixxuwwi anno'ina gulummi issaa uwwummi uullam daba'llita'a aaggamo» yaa kuroommisina ijaajukko.

¹⁹Waa'i «Isra'eela, an keese i beet issaa aa'imminne ka uullanne lobakata mishisookkokaa harish uullaa kiina uwweena hasummo. Oohim ‹Iyyanna› yitakka'a eese weeshshakkonaa la'mmaagge iinniinsi qee'llitakkambee'isaa sawwaa hee'ummo.

²⁰Ihukkaarem ki'nnuwwi is aro'ina amma'nnantambee'i meentichchosa ki'nnuwwi iina amma'nnantakkambee'i keen ikkakko'ookko; an Waa'i kaka wocaammo» yoolla.

²¹Latu luwwi bee'i duunnuwwanne sagar macceesamoolla; oo sagarim Isra'ee'l minaadab ixxuwwi Moollanni Waa'a xadimminne baaxiilo baxxu'uuyyi hee'lla'a kaba odim saxxita'a macceesissam uunxaxxi sagaraa wi'llimmi sagaraa.

²²Ki'nnuwwi Waa'iinsi qee'llitakka'a hee'llakko'i keen hundim daba'llehe; ixxi ki'nnuwwa fayyiisookko; amma'nnantakko'oo keenom issookko. Ki'nnuwwim «Eeyya, Waa'i niina Moollanni ihu bikkina ixxi kollonne daba'llinoommo.

²³Hoffi duunnuwwannee lob duunnuwwannee fillaa qophpha'n waa'uwwina otossimmi awwaad bee'ane; Isra'eelina hara'mmat uwwamookkok xale'i ni Moollanni Waa'iinsette.

²⁴Ihukkaarem tuussisoo qophpha'n waa'uwwina otossinaa gereebbikaa mulli fooraam diinaxxi allaachchaa hundam odim goo'n oosoo landaa hundam niyyanno'im gaassiinsim ki'issa'a badatta'a afisso'i amaxxa hundam hoongoommisa issaakko.

²⁵Neesee gaassi niyyanno'ii endaa endaa baaxiilo baximminne ni Moollanni Waa'a kichche'insaammo; ixxi ijaajom egellummoyyo; ee bikkina sholle'nnanne ubimmii tuulle edde'immii labookko» yitakko'ookko.