Read Hadiyya Ermiyaas Kitaaba 30 Bible Online

Ermiyaas Kitaaba 30 - Hadiyya bible

Ermiyaas Kitaaba 30

¹Ermiyaas beyyo waaru Isra'ee'l Moollanni Waa'i sagar kane;

²Isra'ee'l Moollanni Waa'i «An kiina kurummi sagara hundam kitaabanne kitaabe.

³I minaadab ikko'i Isra'ee'l minaadabaa Yihuxxi minaadabaa qeefadanto'i uulliinsi dabaroommi amman hincaakko; gaassi ixxuwwi anno'ina uwwummi uulla dabaroommaare ixxuwwi gaqqan issitamo; an Waa'i kaka wocaammo» yoolla.

⁴Waa'i Isra'ee'l minaadabinaa Yihuxxi minaadabinaa

⁵«Xumman ihoo'n baddisookkokii dambaqisoo sagarii macceesamoolla.

⁶Hino'o, xa'mmehe; goon qareena xanooda'em qoossehe. Eehannah goon hundim qaroo meentisa anginne lamado amaxxaakkoo moo'oommok mahinatte? manni hundikim illi kolli heemachchaakkoo mahinatte?

⁷Aayye! U'nnisoo ayyaam waaraakko; ee ayyaami'nnoo'i balli hore'em bee'e. Oohim Yaaqoob shumo'ina hawwi doolli ihookko. Ihukkaarem ixxuwwi ee u'nniinsi hundiinsim gattamo» yoohane.

⁸Gogoxxi Moollanni Waa'i «Ee ayyaamo i minaadaphphi axonne iyyiisamu gassika gaanjaqqa iiqoommo; ixxuwwi karanto'i chimchimam muroommo; eehanniinsi lasonne allaggichchi minaadabina awwaadaan ikkamoyyo.

⁹Ee bikkenne iina ixxuwwi Waa'ina otossitamo; an adilla'n barcumanne afuussoommi Daawiit shumo'i ihu adilina ijaajantamo.

¹⁰Ee bikkina iina awwaaddakkam i minaadab badditakkotte; Ki'nnuwwi Isra'ee'l minaadab baa'llakkotte; ee qee'l uulliinsi ki'nnuwwaa ki'nnuwwi oosoo fissoommo; karantakka'a hee'llakko'i ee uulliinsi fittakka'a Ki'nnuwwi uulla daba'llitakka'atim xumminne hee'llakkamo; matem baddisoo luwwi bee'ekam xumminne usheexxitakkamo.

¹¹An gagim ki'nnuwwinnetti ihaa gatisoommo. Ki'nnuwwi binnitakkamisa issummi uulli manna bi'isoommo; ihukkaaremdu ki'nnuwwa bi'isoommoyyo; eehaarem guzumo'oo'n uroommoyyo; guzumo'oommokim ki'nnuwwi bi'ishshi qaxinnette. an Waa'i kaka wocaammo» yoolla.

¹²Waa'i ixxi minaadabina «Ki'nnuwwik iiqantakko'i beyyi fayye'oobee'ane; omarim e'lloobee'ane.

¹³Ki'nnuwwina hara'mmaa fitamookkok omar fayye'oo'isinam ki'nnuwwa abooyyookkok matim bee'i bikkina fayye'llakkamoyyo.

¹⁴Ki'nnuwwik besh hundim ki'nnuwwa xaddo'ookko; ixxuwwi ki'nnuwwa hassamoyyo. Ki'nnuwwik jolli lobakata baaxiilim dut ihu bikkina an ki'nnuwwa diina'isa aphphisummo; qishixxat bee'ekam guzumo'ummo.

¹⁵Fayye'oobee'i ki'nnuwwi oma'l bikkina quunquuntakkotte; an ee'isa issaa ki'nnuwwa guzumo'oommo; mashka'oomim ki'nnuwwik baaxiil lobakata. Ki'nnuwwi jollim lobakata lophphaakkoohane.

¹⁶Ihukkaarem ki'nnuwwa kankanta'a itto'i keen hundim ixxuwwim kankananta'a itantamo. Ki'nnuwwi diina'im qeefadanta'a mattamo; ki'nnuwwa wor amadda'a hee'llo'i keen hundim wor amadantamo; ki'nnuwwa boggam hee'llo'i keen hundim korina bogantamo.

¹⁷Ki'nnuwwi diina'i ‹Xiyoon ubukkisam gatukko; egeraanchom hoogukko› yitota'nnim an ki'nnuwwika fayya'ooma odim dabaroommo; ki'nnuwwika omaram fayyiisoommo; an Waa'i kaka wocaammo» yoolla.

¹⁸Waa'i «Oono'o, Isra'ee'l oosika mine dabaraa baxoommo; abaroosina hundinam qishixxato issoommo; Yerusaaleem gindamu beyyonnem daba'llaa baxamookko; adi'l minim gaassi beyyonne baxamookko.

¹⁹Eekke'enne hee'llam manni hundim galaxxi mazmuura zammattamo; liiranchinnem ilil yitamo; an ixxuwwa fikkaannisoommo bagaan ixxuwwik xig hoffe'ooyyo; i lomba siiddamisa issoommo; ee lasage gadantamoyyo.

²⁰Ixxuwwik oos gaassi ixxuwwi anno'isam baddanta'a hee'llamo; oo mateeyyoo'm heechchim i illagenne qoxxaakkoohan ihookko; ixxuwwa wor amadda'a hee'llo'i keenom guzumo'oommo.

²¹Ixxuwwa gassoo gassaanchi ixxuwwi lambe'iinsim doo'llamookko; ixxuwwa awwonsookkokim ixxuwwi moolliinsetti ihookko; an ixxo i kollonne hincaa'oommo; ixxim i kollonne hincookko; oobeelas iggaa i kollonne hincookkok ayyette?

²²Ixxuwwi iina minaadab ikkamo; anim ixxuwwina Waa'i ihoommo; an Waa'i kaka wocaammo» yoolla.

²³Oono'o, hambu'llam hafachchi'nnoo'i Waa'i quunqi malaayyaam hafachchisa kululukkuuyyi boqquwwi kee'n sammonne dillookko.

²⁴Malaayyaam ihu Waa'ik quunqi Isseena sawwu luwwa wonshoo'n daba'llooyyo; amman afoohaare minaadab ixxuwwi gagim kaka erisa laqqamo.