Read Hadiyya Ermiyaas Kitaaba 31 Bible Online

Ermiyaas Kitaaba 31 - Hadiyya bible

Ermiyaas Kitaaba 31

¹Waa'i «An Isra'ee'l sullina hundinam Waa'i ihoommokii ixxuwwim iina minaadab ikkam ammanii waarookko.

²Isra'ee'l minaadab usheexxato siiddeena waatto'i ammanenne oriinsi gatto'i keen uulli udma'anne iinniinsi nuura siiddamo.

³An ixxuwwina qee'llonnem moo'amummo; Isra'ee'l minaadaba, oono'o an ki'nnuwwa heer heerina iittaammo; ee bikkina heer heeraxxi i biijoomim ki'nnuwwina qoxxaa hee'ookko.

⁴I minaadab ikkakko'i Isra'eela an ki'nnuwwa dabaraa baxoommo; ki'nnuwwim baxantakkamo; la'mmekam dibbe'e amaddakkamo; liirantam keeninne maqirem fittakka'a kaddakkamo.

⁵Odim Samaare'i duu'n hanenne woyi'n kaashsha kaassakkamo; eehanni misham badatto'i keen liiranchinne ittamo.

⁶Ee ammane diina'a egettam keen Efiree'm duunanne fitta'a ‹Waallehe, ni Moollanni Waa'i yoo Xiyoona mallona› yitam amman waarookko» yoolla.

⁷Waa'i «Minaadabiinsi hundiinsim lophphoo Isra'ee'l bikkina liiranchinne zammallehe; ‹Waa'i ixxi minaadaba gatisaakko; Isra'ee'l uullanne gatto'i keeno hundam gatisaakko› yitakku'uuyyi galaxxi mazmuura hincaa'llehe.

⁸An hanaa'n qariinsi ixxuwwa woroommo; uulli tochchiinsim ixxuwwa wixxaa'oommo; qooqquwwii dimmeewwii lamfoor meentii xuuchchi amadu meentii hundim ixxuwwinne maqirem waattamo; lob minaadab ikka'atim ixxuwwi gaqqi uulla daba'llitamo.

⁹An ixxuwwa uulla daba'llitamisa awwonsummuuyyi i minaadab liiranchinne wi'lltu'uuyyii Waa'a uunxitu'uuyyii daba'llitamo; qoloo luwwi bee'i er googinne er wo'ik bu'i yoo kollonne awwonsoommo; an Isra'eelina anna; Efireemim iina won beeto» yukko.

¹⁰Waa'i «Minaadaba, macceessehe; qee'llonne yoo tochchi uullinam i sagara alallaattehe; an i minaadaba binnaa'aa hee'ummo; ihukkaarem kaba wixxaa'oommo; allaaraanchi fooraam diinate egeroohaannisam egeroommo.

¹¹An Isra'ee'l minaadaba wolabbanonne fissaammo; malaayyaam adi'l angiinsim fissaa gatisaammo;

¹²Ee bikkina daba'llita'a waatta'a Xiyoo'n duunanne liiranchinne zammattamo; an ixxuwwina uwwoommi hurbaaxxaanninne, woyi'n diqaasinne, wee'l zaytinne, gereebbaanninnee la'l maassinnee hundinnem makkixxita'a liirantamo. Er wo'i yoo gannattisa ikkamo; ixxuwwina hasisoo luwwa hundam siidda'a hawwiinsii u'nniinsii gattamo.

¹³Ixxuwwik landi liiranchinne kadookko; harde'i woraadii lommannii liirantamo; an ixxuwwa qoxxisoommo; ixxuwwikam wi'llo liiranchanne kichchechcham lobakat liiranchanne dabassoommo.

¹⁴Qeessuwwa uulli maassinne goddisoommo; minaadaphphekam qulunxa i biijoominne xeebo muroommo; an Waa'i kaka wocaammo» yoolla.

¹⁵Waa'i «Laachchii qaraaraalli wi'llii Rama'anne macceesamukko; Raaheelem is oos bikkina wi'llitamuulla; isek oos lehu bikkina qoxximma hooggo'o.

¹⁶Ki'nnuwwi wi'llimma uttakka'a indiidda shiinshaqqehe. Ki'nnuwwi oosina issitakko'ok hundim kora'a gatoohaneyyo; ixxuwwi diina'i uulliinsi daba'llita'a waattamo.

¹⁷Ki'nnuwwik oos ixxuwwi uulla daba'llita'a waattam bikkina ka lasage ki'nnuwwina neeyyat yookko; an Waa'i kaka wocaammo.

¹⁸«Isra'ee'l minaadab kichchechchinne ‹Waa'a! Neese leejjisakkobee'i labee'nnisa hee'nnummo; ihukkaarem at niina ijaajancha losissitto; at niina Moollanni ikkitti bikkina kabadem ni Waa'i ikkitti ki kollonne dabare; neesem daba'llinoommo.

¹⁹Kiinniinsi qee'llinaa mallaa hee'nnummo; ihukkaarem kaba ni baaxiilo biiraa yinaammo; tuullinnee saxximminnee ni gaga heeshaa'nnaa ni biqe aphphixxinoommuulla; harde'oo'm doolle banxummi baaxii'l bikkina ni gaga acceeqansoommuulla› yitu'uuyyi macceesummo.

²⁰Isra'ee'l minaadaba, Ki'nnuwwi iittantakko'oo i ooso; ki'nnuwwa hundiinsim lonsaa iittoommaneyyonnihe? Ki'nnuwwina qishixxato isseena i kollonne hincaa'eena hasoommo; an Waa'i kaka wocaammo.

²¹Googo huushantakkambee'isa mare'e issehe; googo moo'isoo utubbuwwa kaassehe; mattakko'i lob googom qoossitakka'a moo'llehe; i minaadab ikkakko'i Isra'eela, ka ki'nnuwwi beero'uwwa daba'llehe.

²²Ki'nnuwwi amma'nnat hanqataakkoo minaadaba, malantakkamok hinki balli afeebe'e? An Waa'i uullanne haareechchi luwwa qooccaammo; oohim meentichcho gooncho egettamo[3]›› yukko.

²³Isra'eelina Waa'i ihu gogoxxi Moollanni Waa'i «Minaadaba ixxuwwi uulla dabaroommi ammane Yihudannee Yihuxxi uulli beero'uwwannee odim ‹At hanqina gatti min ikkitti keesammi duuna, keese Waa'i maasse'ona› yitamo.

²⁴Yihuxxi uullii ee uulli beero'uwwii hundim minaadab hee'oo beyyi ihookko; uulla abuullitam abuullaanii fooraam diinaxxi allaaraanii eekke'enne mateeyyam hee'llamo.

²⁵Hooggo'i kee'nneka malaayye qoxxisoommo; sibaaraa tuude'u keeninam hurbaata uwwaa goddisoommo.

²⁶Ee ammane minaadab ‹Diriichchiinsi baqinoommaare ni malaayyi haareechchi ihaa hee'ukko› yitamo.

²⁷Oono'o, an Waa'i Isra'ee'l uullaa Yihuxxi uullaa manninnee fooraam diinatinnee wonshoommi amman waarookko.

²⁸Ixxuwwa beyyiinsi xoqoleena, gindeena, ikkid kid isseena, bi'iseenaa hawwitamisa isseenaa murte'ummi qaxa dabaraa beyyonne kaaseenaa baxeenam murte'oommo.

²⁹Ee ammane ‹Anno'i itto'i hamaraar woyi'n mish oosika inqe sigillaa'ukko› yukkuuyyi manni wocam hee'u heessi gatookko.

³⁰Eehid ihimmi gataa hamaraar woyi'n misha itu manchik ixxi gaqqi inqim sigillookko; annannichchim ixxi gaqqi baaxiilinnem lehookko» yukko.

³¹ Waa'i «Isra'ee'l minaadabinnee Yihuxxi minaadabinnee maqire haareechchi hidi'l sagara aagoommi amman waarookko.

³²Oo hidi'l sagarim ixxuwwa Gibxi uulliinsi fisseena anga amadaa awwonsummi ammane ixxuwwi anno'inne aagummi hidi'l sagari'nnoohaneyyo; an ixxuwwina Moollanni[4] ihaa hee'ummisam ixxuwwi i hidi'l sagara egettobee'i bikkina uraa urummo.

³³Ihukkaarem eehanniinsi lasonne Isra'ee'l minaadabinne maqire aagoommi hidi'l sagar kane; i seera ixxuwwi wodanonne dissoommo; ixxuwwi wodanonnem kitaaboommo; anim ixxuwwina Waa'i ihoommo; ixxuwwim i minaadab ikkamo.

³⁴Kanniinsi eehid ayyi manchim ixxi beshichcho te'im ixxi abbaayyo ‹Waa'a la'e› yaa losisooyyo; mashka'oomim lobaanniinsi ki'isaa hoffaannonne afeebe'e hundim eese la'ookko; ixxuwwi hawwoddo'i hawwojjam haafoommo; ixxuwwi baaxiilom la'mmaagge sawwoommoyyo; an Waa'i kaka wocaammo» yukko.

³⁵Waa'i ballanne eelliinchi caakkisoo'isa hiimonne odim aganii boollaankii caakkisoo'isa issookko; dambalaqa heekkeesaa hambu'llam shuuroo'isa issookko; ixxi summim gogoxxi Moollanni Waa'a.

³⁶Ku qooccanchi seer qoxxaa hee'oo qax ammanenne Isra'ee'l minaadab ixxi illagenne minaadab ikka'a hee'llaman ihukkisa moo'isoo neeyyat uwwamookko.

³⁷Waa'i ixxi minaadab ikko'i Isra'eela baxxo'i hawwojji mashka'inne uunjookko yimmi xanamookkok iima'nnek haraaroom keenamaa uullikim lugum fooqaa la'imma xanakkolasette; Waa'i kaka wocaakko.

³⁸Waa'i «Hanaani'eel gimbiinsi ki'isaa ooxxi gooc lamejjanne afeebe'e Yerusaaleem i beero'i ihaa baxamoo amman waarookko.

³⁹Gaba'llekim xabbeen ooxxi lamejji goociinsi ki'isaa Gaareeb duun afeebe'e afaa Goo'a'anne kululoohan ihookko.

⁴⁰Lehu luwwaa gii'lbuchaa uunjakkam cebbi hundim eelliinchi firoo kollinne Qeediroo'n cebba edaa ‹Faraxxi gooca› yakkam beyyi afeebe'e iina keesamaakkoohan ihookko; kanniinsi eehid beero'oom la'mmaagge hore'em gindamooyyo te'im bi'ooyyo» yukko.