Read Hadiyya Ermiyaas Kitaaba 32 Bible Online

Ermiyaas Kitaaba 32 - Hadiyya bible

Ermiyaas Kitaaba 32

¹Adil Sedeeqiyaas adil ihu tommi hiinchonne Baabiloo'n adil Nabukadanaxoor odim adil ihu tommaannonnee sadeenti hiinchonnee Waa'i iina wocukko.

²Ee ammane Baabiloo'n adil Nabukadanaxoorek o'l gogot Yerusaalee'm beero'o kibbita'a hee'llo'o anim ee amman adil mi'n beyyonne yo'i waardiyya egettam kee'n minenne karamaa hee'ummo.

³Adil Sedeeqiyaasim eese kassiisu mashka'i Waa'i wocu hiraaqqi sagara ixxena wocummaarette; oohim «Yerusaaleem beero'o Baabiloo'n adil anganne higisaa uwwoommo.

⁴Adil Sedeeqiyaasam xoraa xanoobee'i bikkina an Waa'i higisaa uwwoommo; adil Nabukadanaxooram illinne moo'ookko; annannannem atoorassookko.

⁵Sedeeqiyaasa Baabiloona massakkamo; i oogaxxi amman afeebe'e eekke'enne hee'ookko; Baabiloo'n uulli manninne orantakkeena yakitakkota'nnim xantakkamoyyo; an Waa'i kaka wocaammo» yummaarette hee'ukko.

⁶Odim Waa'i iina

⁷«Kiyyannabbaayyi Shaaloom beet Hanaami'eel Biiniyaam baxxanchi hee'u Anaatootanne yoo ixxi uulla bitaa'lloo'isina xa'mmeena ki beyyo waarookko; mashka'oomim ee uulla bitaa'im labookkok atette» yukko.

⁸Waa'i iina wocukkisannem Hanaami'eel karamaa yoommi beyyo waardiyyuwwi mine waaraa uulla bitaa'oommisina xa'mmukko; ee bikkina Waa'i iina wocukkisa la'ummo.

⁹Anaatootanne yoo abuulli uulla iyyanni abbaayyi beet Anaami'eeliinsi bitaa'eena diinate xufummo; bitim tommoo lamar kin biraa ihukko.

¹⁰Bitina iittamummi iittom naqaashshuwwi yo'i beyyonne farramaa ifiisummo; diinatem keenaanchonne xufaa uwwummo.

¹¹Ifiisamukkokaa ifiisamubee'ekaa uulla bitaa'ummi furma'a massaa

¹²Maahisey beet beetina Neeriy beet Baarookina uwwummo; ee furma'uwwam uwwummok iyyannabbaayyi Hanaami'eel bitinne iittammummisa naqaash ikka'a farranto'i manni illagennettee i karaxxi mi'n beyyonne wixxita'a hee'llo'i manni illagennettee hee'ukko.

¹³Ixxuwwi illagenne Baarookina

¹⁴«Isra'ee'l Waa'i ihu gogoxxi Moollanni Waa'i ifiisamukkokaa ifiisamubee'i furma'aa lamom bi'oo'n lobakat ammane hee'oo'isina massitaa buchchi mu'uxxi woronne dissitoo'isina ijaajaakko.

¹⁵Isra'ee'l Waa'i ihu gogoxxi Moollanni Waa'i odim «‹Ka uullanne minee abuulli uullaa duubbi kaashsha kaasakkam beyyoo bitaa'akkam amman waarookko› yaakko» yaa ijaajummo.

¹⁶Uulla bitaa'ummi furma'a Baarookina uwwaa lasonne

¹⁷«Hundam xantoo i Moollanni Waa'a! Ki lob daannoominnee malaayyinnee iimanee uullaa qooccitaatto; keese kaa'oo luwwi hore'em bee'e.

¹⁸Xigiinsi hanaan ihaakkoo minaadabina heer heerina hee'oo ki iitto moo'issaatto; ihukkaarem ixxuwwik anno'i baxxo'i baaxii'l mashka'inne minaadaba guzumo'lloo amman yookko; at hundiinsi lobanee malaayyaam Waa'aa! At hundam xantoo gogoxxi Moollanna.

¹⁹Qooroom wo'mmaakkoo sawwitinne lob maalalsiisoo baxo baxxootto; minaadab baxoo baxo hundam moo'llootto; annannichchim baxukkisinne bito miqqootto.

²⁰Gaassi doolle Gibxi uullanne agannakkam maalalsiisoo luwwa baxxaatto; kaballi afeebe'em maalalakkam baxxeewwa Isra'ee'l minaadaphphi lambe'ennee mulli manni lambe'ennee baximminne beyyi hundannem ki sad weeshamaakko.

²¹Ki minaadab ikko'i Isra'eela Gibxi uulliinsi wolabbanonne fissiteena ni diina'a huxe'llamisa issitti ee maalalsiisoo agannaam baxxeewwinne ki malaayyee lombaa mo'issaatto.

²²Gaassi ixxuwwi anno'ina woccitti neeyyaxxi Saga'llisannem ka hee'akkeena makki uulla uwwitto.

²³Ihukkaarem ka uulla waatta'a lago aa'lla'a lasage ijaajantamisina uwwitti sagarina ijaajanto'oyyo; ki seeram egetto'oyyo; ee bikkina kaa'n hawwodanchi hundim ixxuwwanne afukko.

²⁴«Oono'o, Baabiloo'n uulli manni Yerusaalee'm beero'o amaddeena dichchitta'a kibbito'ookko; orii sibaarii jabbii beero'i manna Baabiloo'n manni anganne ubbamisa isseenatte; at moo'lloo'isam woccittok hundim wo'mmoolla.

²⁵Hundam xantoo Waa'a! beero'oom Baabiloo'n manni anganne higaa uwwameena hincaakkoohaannonne naqaashshuwwi yo'i illagenne uulla bitaa'oommisina ijaajjittok atette» yaa Waa'a uunxummo.

²⁶Eehannii lasonne Waa'i iina

²⁷«Manni shumo'i hundinam Moollanni Waa'i anette; eese kaa'oo luwwi hore'em bee'e.

²⁸Ee bikkina oono'o ka beero'o Baabiloo'n adilinaa ixxi gogotinaa higisaa uwwoommo; ixxuwwim beero'ooma amaddamo.

²⁹Giirinnem shokkiissamo; qophpha'n waa'uwwina woyi'n diqaasa kitim issita'a duntu'uuyyi Ba'aal yakkam qophpha'n waa'ina mi'n illichchonne aduruusa wiriissitu'uuyyi eese quuqissam hee'llo'i mannika gatti minneewwa hundam shokkiissamo.

³⁰Isra'ee'llekii Yihuxxekii minaadaphphi aganni asheeru ammaniinsi ki'isaa baxxo'i jollinne hundinnem eese quuqisso'o bagaan matem eroommam baxxo'oyyo.

³¹Ku beero'i baxamukkaanniinsim ki'isaa woronne hee'llam manni eese quuqisso'i bikkina beero'ooma bi'iseena murte'aammo.

³²Mashka'oomim Isra'ee'llekii Yihuxxekii Yerusaalee'm minaadabanne, adilluwwinne, daannuwwinne, qeessuwwinnee hiraagaaninnee maqirem mat ikka'a baxxo'i jollinatte.

³³Ixxuwwi eese utta'a matto'ookko; edaa edaatim losano uwwummaarem i woshsha macceesso'oyyo; i sogitanom aa'llo'oyyo.

³⁴Hore'oomam i summi weeshamoo keesamaakkoo minenne shigigaa'oo qophpha'n waa'uwwa uullissa'a i mine haashaassito'ookko.

³⁵Moolook yakkam qophpha'n waa'ina ixxuwwika goo'n oosoo landaa kitimteena Heenoo'm cebbanne Ba'aala yakkam mulli Waa'i summinne kiti'm beyyo baxxo'ookko; ee baxo baxxamisina an ijaajummoyyo; minaadab baaxiilo baxxoo'isa issitamo yaa hore'em sawwummoyyo» yukko.

³⁶Isra'ee'l Moollanni Waa'i iina «Ermiyaasa, oono'o minaadab ‹Ku beero'i bagadinne, sibaarinnee jabbinnee Baabiloo'n adi'l anganne ubookko› yitamo; oono'o odim an yoommi mulli luwwam macceese.

³⁷Lobakat quunqinnee boobaninnee binnaa'ummi minaadaba matto'i uulliinsi hundiinsim wixxaa'oommo; ka beyyonne dabaraa woraa xumminne hee'llamisa issoommo.

³⁸Ixxuwwim i minaadab ikkamo; anim ixxuwwina Waa'i ihoommo.

³⁹Ixxuwwinaa ixxuwwi oosinaa makkoo'isina hundi ammanem eese lonsitona mat wodanoo mat tiiroo uwwoommo.

⁴⁰Ixxuwwinne maqire heer heeraxxi hidi'l sagara aagoommo; ixxuwwinam er luwwa issimma uroommoyyo; hanqo'isam eese badditamisa issoommo; eehanniinsi lasonne ixxuwwika sawwite i kolliinsi bagaan mulli kollonne dabattamoyyo.

⁴¹Ixxuwwina eroomma isseena liiramoommo wo'm wodaninnee tiirinnee hundinnem lobakat liiranchinne hanqo'isam ka uullanne kaaxxixxita'a hee'llamisa issoommo.

⁴²Ka minaadabanne kaa'n kaa'n kee'mmaalli hawwo eebumqaxam uwwoommo yaa sagara aagummi danaam luwwa hundam uwwoommo.

⁴³Minaadabim ‹Ku uulli mannii diinatii hee'oobee'i udma'i uulli ihookko; Baabiloo'n uulli manni angannem higaa uwwamookko› yitamo; ihukkaarem ka uullanne abuulli beyyo bitaa'akkam amman odim waarookko.

⁴⁴Qeefadanto'i uulliinsi dabaroommi bikkina Biiniyaa'm uullannee Yerusaalee'm kululleetanne yoo beyyuwwannee beero'uwwannee hansawwannee qaala'annee yoo beero'uwwannee woroo'n qarinne yoo beero'uwwannee yo'i manni abuulli uulla bitaa'llamo; iittanto'i furma'am naqaash illagenne farrantamo; an Waa'i kaka wocaammo» yukko.