Read Hadiyya Ermiyaas Kitaaba 33 Bible Online

Ermiyaas Kitaaba 33 - Hadiyya bible

Ermiyaas Kitaaba 33

¹Adi'l mi'n ooxxi woronne yoo waardiyyuwwi mi'n woronne karamaa hee'ummisam Waa'ik hiraaqqi sagar i beyyo odim waarukko.

²Uulla qooccukkok, gudisukkokii baxukkokii summim «Waa'a» yamamaa weeshamoo Moollanni

³«I kollonne laare; anim kiina dabachcha uwwoommo; atim laqqoobee'i malaayyaam luwwa kiina issoommo.

⁴Yerusaalee'mmekii Yihuxxi adilluwwi minneewwii kibbamaa orinne gindamoo'isa an Isra'ee'l Moollanni Waa'i kuroommo.

⁵Baabiloo'n manni orina waatto'ookko. Minaadaphphi jolli mashka'inne i ille ka beero'iinsi mulli kollonne dabaroommo bikkina ku beero'uwwi an i quunqinnee bala'innee shoommi manni leeshinne wo'mmookko.

⁶Ihukkaarem ka beero'oo ka beero'i minaadabaa dabaraa fayyiisoommo; yaayya'oomam uwwoommo; lobakat xumminne usheexxita'a hee'llamisa issoommo.

⁷Yihuxxekaa Isra'ee'l minaadabaa qeefadanta'a matto'i uulliinsi dabaroommo; gaassi hee'llo'isanne issaa axisoommo.

⁸Eese hawwoddo'i baaxiiliinsi hundiinsim muccussoommo; ixxuwwika baaxiiloo boqqoomaa hundam haafoommo.

⁹Yerusaaleem beero'ina issummi eroomma macceesso'i uulli minaadaphphi illagenne hundannem danaam sadii liiranchii galatii lombii iina ihookko; Yerusaalee'm minaadabina uwwoommi lobakat goddaa xummaa moo'llo'i minaadab eese baddimminne huxe'llamo» yukko.

¹⁰Waa'i «Minaadab ‹Ku beyyi mannii diinatii hee'oobee'i udma'i ihookko› yitamo; woshshoom hanqame; mashka'oomim beero'uwwii Yerusaalee'm googguwwii mannii diinatii hee'oobee'i bikkina diih ihaakko.

¹¹Ihukkaarem ee beyyuwwanne hundannem odim liiranchikii ilillaaxxekii bollochcho'i sagarii macceesamookko; minaadab galaxxi kitima amadda'a keesamaakkoo mine waattam ammane ‹Gogoxxi Moollanni Waa'a galaxxehe; mashka'oomim ixxi biijaalla; ixxi iittim heer heerina hee'oohane› yitu'uuyyi zammattamoka macceessootto. Ka uulla gaassisam goddaanchi issoommo; an Waa'i kaka wocaammo» yukko.

¹²Gogoxxi Moollanni Waa'i «Mannii diinatii hee'oobee'isa udma'i ihu ka beyyonnee ka beero'uwwannee hundannem allaaraan allaachcha usheexxissam beyyo siiddamo.

¹³Duu'n uullanne duunnuwwi gabonnee uullanne woroo'n qarinne yoo beero'uwwannee Biiniyaam uullannee Yerusaaleem kululleetanne yoo hoffi beero'uwwannee hundannem allaaraan odim gereebba xiggamo; an Waa'i kaka wocaammo» yukko.

¹⁴Waa'i «Isra'ee'llaanninaa Yihuxxi minaadabinaa aagummi neeyyaxxi sagara wonshoommi amman hincaakko.

¹⁵Oo ayyaam afoo ammane Daawiit shumo'iinsi mat caaf ihaakkoo muccur adila doo'lloommo. Ixxim hanqo'i oogatii muccuroomii uullanne hee'oo'isa issookko.

¹⁶Yihuxxekii Yerusaaleem minaadabii diina'i angiinsi gatta'a xummanne hee'llamo; beero'oomim ‹Waa'i niina muccurooma› yamamookko.

¹⁷Daawiit shumo'iinsi Isra'ee'l minaadabanne adil ihookkok hore'em bee'oobee'isa an wocaamo.

¹⁸Ee'isam shokkiisakkam kitima, hurbaaxxi kitimaa mulli kitimaa hincaa'imminne iina awwaaddam qeessuwwi Leewe'i moolliinsi hore'em bee'llamoyyo» yukko.

¹⁹Waa'i iina «An hiiminaa ballinaa qoodaa uwwummi siyya'a dabassitakka'a hiimii ballii ixxuwwina qoodamu ammanenne dabassantambee'isa an aagummi sagara ginditakkeena xantakkolas

²¹ee ammane i awwaadaanchi Daawiitinnee i illagenne qeessoomaninne awwaaddam Leewe'i oosinnee aagummi hidi'l sagara gindimmi xansiisookko; Daawiitinam kanniinsi eehid ixxi adilla'n barcumanne afuuroo shumo'i hee'ooyyo.

²²I awwaadaanchi Daawiit shumo'ikaa Leewe'i moolli ikko'i qeessuwwikaa xigo fikkaannisoommo; ixxuwwim xigakkeena xanakkambee'i iima'n boollaankisaa wo'i shashsha'llisaa ikkamo» yukko.

²⁴«Ku minaadab ‹Waa'i doo'llu Isra'ee'llekaa Yihuxxi minaadabaa lamem adilla'n uulluwwam uraakko› yoolli ihukkisa qoossittoyyonnihe? I minaadaba gaddo'ookko; mat minaadaphphisam xiggo'oyyo» yukko.

²⁵Odim Waa'i «Hiiminaa ballinaa ee'isam iimaninaa uullinaa ihoo seera uwwumman ihukkisa la'isoo hidi'l sagara egeroombee'an ihulas

²⁶Yaaqoobikaa iina awwaadaanchi ihu Daawiitikaa shumo'o uraammoo yimma. Oohim iina awwaadaanchi Daawiitina Abrihaamaanniinsi, Yisaaqaanniinsii Yaaqoob shumo'iinsii adila doo'lloommoyyoo yimma. Ihukkaarem an ixxuwwina haafoommo; ixxuwwi amaxxam dabaroommoo» yukko.