Read Hadiyya Ermiyaas Kitaaba 34 Bible Online

Ermiyaas Kitaaba 34 - Hadiyya bible

Ermiyaas Kitaaba 34

¹Baabiloo'n adil Nabukadanaxoorii ixxi gogotii ixxi gassi woronne yo'i uulli adilluwwinnee minaadabinnee hundinnem hara'mmamaa Yerusaaleemannee kululleexxi beero'uwwannee ora ki'isu ammane Waa'i iina wocukko.

²Isra'ee'l Moollanni Waa'i an adil Sedeeqiyaas beyyo maraa «Waa'i ka beero'o Baabiloo'n adilina higisaa uwwoommo; ixxim beero'ooma giirinne shokkiisookko.

³Atim xotteena xantoobee'i bikkina qeefadantootto; ixxi angannem higisantaa uwwantootto; ixxi ille moo'llittuuyyim keese atoorassookko; ee lasage Baabiloona mattootto.

⁴Sedeeqiyaasa, an ki bikkina yoommi luwwa macceese; oranne letooyyo.

⁵Xumminnem letootto; kiinniinsi illage adilluwwi hee'llo'i kiyyanno'i leto'i ammane minaadab ee kee'n lombi bikkina giira giittam hee'llo'isam kiinam giira giittamo; ‹Aayye ni adila!› yiti'uuyyim ki bikkina wi'llitamo; an Waa'i kaka wocaammo» yaa wocoommisina ijaajukko.

⁶Ee sagara Sedeeqiyaasina Yerusaaleemanne yoo beyyonne kurummaare

⁷Baabiloo'n adi'llek gogot Yerusaalee'm beero'onne ora ki'isaa hee'ukko; oo gogot ee beyyiinsi higaa Yihudanne gataa hee'u girbamaakkoo Laakiishaa Azeeqaa yakkam lasaanchi beero'uwwa qasukko.

⁸Adil Sedeeqiyaasii Yerusaaleem minaadabii agiddanonne hee'llam keen wolabbanonne fittamisa iittanto'o.

⁹Oohim Ibro'i manni ixxuwwina awwaaddam manna goonaa meentoo hundam wolabbanonne fiissimminatte hee'ukko; Isra'ee'llek ayyim agishshi ihaa hee'oobee'isa iittanto'o.

¹⁰Minaadabii awwonsaanii hundim ixxuwwina awwaaddam agido wolabbanonne fissiteenaa la'mmaagge agid issitambee'isinaa iittanto'o; iittanto'isinnem wolabbanonne fissito'o.

¹¹Ihukkaarem eehanniinsi lasonne ixxuwwi sawwite dabatta'a wolabbanonne fissito'i manna odim agid issita'a gaassito'o.

¹²Eehanniinsi lasonne Isra'ee'l Moollanni Waa'i iina

¹³«Gaassi ki'nnuwwi anno'o Gibxi uulli agiddaninsi wolabbanonne fissummi ammane ixxuwwinne maqire hidi'l sagara aagaa hee'ummo.

¹⁴‹Ixxi gaga agiddanina biteesu Ibro'ik agishshi ki'nnuwwina hee'ulas loh hiincho awwaadaa lasage lama'l hiinchonne wolabbanonne firona fatakitakkamo› yaa gaassi ki'nnuwwi anno'o ijaajaa hee'ummo; ihukkaarem ixxuwwi iina ijaajanteenaa i woshsham macceesseenaa hasso'oyyo.

¹⁵Oono'o, ki'nnuwwim baaxiilo biiraa yitakka'a eese liiransoo hanqo'i baxo baxxakka'a hee'llakko'o; hundim Isra'ee'l moolliinsette ihu ki'nnuwwi awwaadaano wolabbanonne fissitakkeena iittantakko'o; i summi weeshamu Keesammi Minennem i illagenne hidi'l sagara aaggakko'o.

¹⁶Ihukkaarem sawwite dabattakka'a i summa bushissakko'o; oohim hasso'i beyyo mattona fatakitakko'i goonaa meenti awwaadaanoo odim agid issitakka'a gassitakko'o.

¹⁷Oono'o, an Waa'a ki'nnuwwina yoommi luwwi kane; ‹Ki'nnuwwina an ijaajamoommoyyo; ki'nnuwwi moolli ikko'i Isra'ee'l minaadabinam wolabbano uwwoommoyyo.› Ee'isam an ki'nnuwwina uwwoommi wolabban yookko; oohim oranne, sibaaronnee Jabbonnee letakkam wolabbano uwwoommo. Ki'nnuwwanne issoommi luwwanne uulli minaadab hundim hiriroo'isa issoommo.

¹⁸I hidi'l sagara gindito'i keenoo i illagennem aaggo'i sagara wonshitobee'i keeno hundam lam beyyonne diqakka'a lambe'inne higakko'i baa'l moo'llisa issoommo.

¹⁹Yihuxxekaa Yerusaalee'm awwonsaanoo, adi'l mi'n daannuwwa, qeessuwwaa lam beyyonne diqakko'i baa'l moo'l lambe'inne higgo'i uulli minaadabaa hundam

²⁰bi'isseena hassam ixxuwwi diina'i anganne higisaa uwwoommo; ixxuwwi leesham iima'n ammarii uulli moochchii itookko.

²¹«Adil Sedeeqiyaasaa ixxi gassaanoo hundam ixxuwwika foore bi'isseena hassam diina'i anganne higisaa uwwoommo; higisaa uwwoommokim ki'nnuwwa qasseena waatta'a ammanoomina daba'llito'i Baabiloo'n gogoxxi angannette.

²²«Anim ixxuwwa ijaajoommo; ixxuwwim ka beero'o daba'llitamo; waatta'atim qassamo; beero'oomam shokkiissamo; beero'uwwanne hundam ayyim hee'oobee'i udma'i issoommo; an Waa'i kaka wocaammo» yoommisina ijaajukko.