Read Hadiyya Ermiyaas Kitaaba 35 Bible Online

Ermiyaas Kitaaba 35 - Hadiyya bible

Ermiyaas Kitaaba 35

¹Iyyoosiyaas beet Iyyoo'aaqeem Yihudanne adil ihu ammane Waa'i iina

²«Reekaab abaroos beyyo mattaa Keesammi Mine wore; Keesammi mi'nnaannonnem mat baxxanchanne aagissaa aggamisina woyi'n diqaasa uwwe» yukko.

³Anim Reekaab mannika abaroosa hundam weeshummo; oohim Habaadiin beetina beet hee'u mulli Ermiyaas beeto Ya'aazaniya, ixxi abbaayyuwwaa oosoo edaa

⁴Keesammi Mine worummo; Agdaaliy beet hee'u hiraagaanchi Hanaaniy losaan hee'llo'i minenne aagisummo; oo minim gassaa'nnaanniinsi awwonaa gooca egeraanchi hee'u Shaaluum beet Ma'iseeyaanniinsi hanaan hee'oohane.

⁵Reekaab oos illagenne woyi'n diqaas wo'mmaakkoo haralla hincaa'ummo; agakkam humbulluwwam uwwaa «Oono'o, aggehe» yummo.

⁶Ihukkaarem ixxuwwi dabatta'a «Neese woyi'n diqaasa angoommoyyo; mashka'oomim Reekaabina beet hee'u niyyanni Iyyoonaadaab neesee ni shumo'ii hundim woyi'n diqaasa angoombee'isina ijaajaakko.

⁷Ee'isam gatti mine baximmi, uulla abuullimmii woyi'n kaashsha kaasimmii hasisoobee'isa kuraakko; waaraan inkaa lobakat doolle dukkaa'n woronne hee'nnoommisina ijaajaakko.

⁸Neesem niyyanni Iyyoonaadaab losisu losano baxonne hasinsaammo; neesee ni meentii ni goo'n oosii landii woyi'n diqaasa angoommoyyo.

⁹Gatti mine banxoo'n dukkaa'n woronne hee'nnoommo; woyi'n kaashsha kaansoommi beyyii hurbaata winxeena abuullinoommi beyyii bee'e; gaassi niyyanni Iyyoonaadaab ijaaju sagarina hundinam wo'm wodaninne ijaajammaa hee'nnoommo.

¹¹Ihukkaarem Baabiloo'n adil Nabukadanaxoor waaraa uullanne ora ki'isu ammane Baabiloo'n uulli manniinsii Sooriy uulli gogotiinsii gimbaa Yerusaaleema waalleena murte'nnummo; kabadem Yerusaaleemanne yoommine'i mashka'i eehane» yito'o.

¹²Ee lasage Isra'ee'l Waa'i ihu gogoxxi Moollanni Waa'i Yihuxxi minaadaphphi beyyoo Yerusaalee'm minaadaphphi beyyoo an maraa «I sagara macceesimmaa losisoommi losaninam ijaajanchaa sabbakkamok mahinda'e an Waa'i xa'mmoommo.

¹⁴Reekaab beet hee'u Iyyoonaadaab oosina woyi'n diqaasa aggambee'isa ixxuwwi anni ijaaju ijaajo egetta'a kaballi afeebe'e woyi'n diqaasa hore'em aggamoyyo; ihukkaarem ki'nnuwwi an edaa edaa kuroommoka ijaajantakkeena hassakko'oyyo.

¹⁵Iina awwaaddam hiraagaano ki'nnuwwi beyyo asse'imma urummoyyo; Ixxuwwim jor googiinsi ki'nnuwwi daba'llitakka'a er baxo baxxakkamisina kutto'o; qophpha'n waa'uwwina otossitakkambee'isaa awwaaddakkambee'isaa qoxxisso'o; gaassi ki'nnuwwi anno'ina uwwummi uullanne hee'llakkamisina ee hundam ijaajaa hee'ummo. Ihukkaarem ki'nnuwwi i woshsha macceessakkeena hassakko'oyyo.

¹⁶Reekaabina beet hee'u Iyyoonaadaab oos ixxuwwi anni ijaaju ijaajo hundam egetto'ookko; ihukkaarem ki'nnuwwi i minaadab iina ijaajantakko'oyyo.

¹⁷Ee bikkina Isra'ee'l Waa'i ihummi gogoxxi Moollanni Waa'i Yihuxxi uullannee Yerusaaleemannee hee'llam mannanne hundannem eeboommisina wocummi bichcha eeboommo; mashka'oomim kuroommi woshsha macceesimma sabbakko'i bikkinattee weeshoommaarem dabachcha uwwitobee'i bikkinattee» yaa kuroommisina asse'ukko.

¹⁸Ee lasage Isra'ee'l Waa'i ihu gogoxxi Moollanni Waa'i Reekaab abaroosina wocu sagara «Gaassi ki'nnuwwi anni Iyyoonaadaab uwwu ijaajo hundam egettakko'ookko; losisu losa'nnisannem awwontakko'ookko; ijaaju ijaajo hundam ijaajantakko'ookko.

¹⁹Ee bikkina an Isra'ee'l Waa'i ihummi gogoxxi Moollanni Waa'i ‹Reekaab beet Iyyoonaadaab shumo'iinsi iina awwaadoo manchi hinkammanem bee'ooyyo› yoolla» yaa kurummo.