Read Hadiyya Ermiyaas Kitaaba 36 Bible Online

Ermiyaas Kitaaba 36 - Hadiyya bible

Ermiyaas Kitaaba 36

¹Iyyoosiyaas beet Iyyoo'aaqeem Yihuxxi uullanne adil ihu soo'l hiinchonne Waa'i iina Ermiyaasena

²«An kiina wocummi balliinsi ki'issaa oohim Iyyoosiyaas adilla'n doolliinsi kaballi afeebe'e Isra'ee'l minaadaphphi bikkina, Yihuxxi minaadaphphi bikkinaa mulli minaadaphphi bikkinaa kurummi sagar hundam kitaabanne kitaabe.

³Ayyi la'ukko minaadab ixxuwwanne eebeena sawwummi bichcha macceessa'a jor googiinsi daba'lliteena xantamo; anim ixxuwwika boqqoomaa baaxiiloo haafoommo» yukko.

⁴Ee bikkina Neeriy beet Baarooka weeshaa Waa'i iina kuru sagar hundam kurummuuyyi ixxi odim xaaxamaakkoo omachchonne kitaabukko.

⁵Odim Baarookina «An Keesammi Mine mareena hoorakko'oo bikkina xanoommoyyo.

⁶Ihukkaarem minaadab soommanonne hee'llu'uuyyi at ee beyyo mare; Waa'i iina kuru sagara hundam kiina kurummuuyyi xaaxamaakkoo omachchonne kitaabbittoka sagara iimaa'llaa qananaa'e; beero'uwwiinsi waatto'i Yihuxxi minaadabina qananaa'e.

⁷Waa'i baddisoo quunqaa boobanaa minaadabanne eeboo'isa kuraakkoo bikkina ayyi la'ukko jor baxiinsi daba'llita'a Waa'a uunxiteena xantamo» yaa asse'ummo.

⁸Odim Neeriy beet Baarook ee an kurummoka hundam omachchonne kitaabamu Waa'i sagara Keesammi Minenne qananaa'ukko.

⁹Iyyoosiyaas beet Iyyoo'aaqeem Yihuxxi uullanne adil ihu onti hiinchonne honsi agananne Yerusaalee'mmekii Yihuxxi beero'uwwiinsi waatto'i mannii hundim Waa'iinsi haafite siiddeena soommanteena alallaatto'o.

¹⁰Minaadab macceesseena guddo'oohaannonne an kurummuuyyi Baarook omachchonne kitaabu Waa'ika sagara hundam qananaa'ukko. Keesammi Minenne eekka issukkok dummichchina kitaabaanchi hee'u Saafaan beet Gamaariy mi'n beyyinne huruuraa aagaatette hee'ukko; mi'n beyyim Keesammi Mine aagakkam haareechchi ooxxi gooc gadanonne hanaa'n qarinne manni wixxoo beyyiinsi ekkeenette hee'ukko.

¹¹Saafaan beetina beet hee'u Gamaariy beet Miikay Waa'i wocu sagara hundam xaaxamu omachchiinsi Baarook qananaa'ukkuuyyi macceesukko.

¹²Ixxim adi'l mi'n beyyonne yoo daannuwwi yo'i dummichchi sawwite kitaaboo manchi mine marukko; dummichchika sawwite kitaaboo Elsham, Shamaa'iy beet Dalaay, Akboor beet Elnaataan, Safaan beet Gamaariy, Hanaaniy beet Sedeeqiyaasii mulli keenii eekke'enne afuutta'a hee'llo'o.

¹³Mikkiyaasim Baarook minaadabina qananaa'ukkuuyyi macceesu sagara hundam ixxuwwina kurukko.

¹⁴Ee lasage minaadabina Baarook qananaa'u xaaxamaakkoo omachchonne kitaabamukkoka amadaa waarona kurona daannuwwi Yihudiina asse'llo'o; Yihudiin Naataaniy beet ihukkuuyyi Naataaniy odim Sheleemiy beeto; Sheleemiyim Kuush beeto; Baarook xaaxamaakkoo omachchonne kitaabamukkoka amadaa ixxuwwi beyyo waarukko.

¹⁵Daannuwwim Baarookina «Hino'o afuuttaa xaaxamaakkoo omachchonne kitaabamukkoka qananaa'e» yito'o. Baarookim qananaa'ukko.

¹⁶Baarook qananaa'aa guullaa lasage muggito'i bikkina illi ille moo'aqqanta'a ixxena ‹‹Ka woshsha adilina la'isimmi hasisookko›› yito'o.

¹⁷Ee lasage odim «Ka hundam hinkid kitaabbida'e kure; kaka kitaabbittok Ermiyaas kurukkuuyyattennihe?» yita'a xa'mmito'o.

¹⁸Baarookim «Eeyya hanqame; ka omachchonne qalaminne kitaabummok Ermiyaas kurukkuuyyatte» yukko.

¹⁹Daannuwwim «Atii Ermiyaasii mat beyyo mattakka'a maaxammehe; yoontakke'i beyyom ayyim la'oone» yito'o.

²⁰Daannuwwim omachchonne kitaabamu Waa'ika sagara dummichchika sawwite kitaaboo Eelsaam minenne dissito'o; adi'l beyyom matta'a ihu luwwi hundam kutto'o.

²¹Adilim omachchonne kitaabamu Waa'ika sagara eeboo'isina Yihudiina yakkam mancho asse'ukko; ixxim omachchonne kitaabamu Waa'ika sagara Eelshaam miniinsi eebaa adilinaa gadanonne uullita'a hee'llo'i daannuwwina hundinamii qananaa'ukko.

²²Ammanoom hagayyi hee'u bikkina adil hagayyi agana higisoo minenne gii'l midachchi gadanonne afuuraa hee'ukko.

²³Yihudinam sas ogora te'im soor ogora qananaa'aa lasonne omachchonne kitaabamu Waa'i sagara adil bisa'inne muransaa giiranne uunjukko; ee'isinnem omachchonne kitaabamaa hee'u Waa'i sagara hundam giiranne shokkiisukko.

²⁴Adilii maqi'l daannuwwii ee sagara macceesso'i ammane maham baddito'oyyo; kichche'lla'atim ixxuwwika eddechcha dereetto'oyyo.

²⁵Elnaataan, Dalaayii Gamaariyii xaaxamaakkoo omachchonne kitaabamu sagara adil shokkiisoobee'isa uunxito'aarem ixxi maham macceeseena hasukkoyyo.

²⁶Ee lasage eesee Baarookaa amadda'a kattamisina adi'l beet hee'u Yiraahimi'eela, Aziri'eel beet Saraayaa Abdi'eel beet Sheleemiyaa ijaajukko; ihukkaarem neese Waa'i maaxukko.

²⁷An kurummuuyyi Baarook xaaxamaakkoo omachchonne kitaabu Waa'i sagara adil shokkiisaa lasonne mulli xaaxamaakkoo omachchonne illagee'n sagaram dabaraa kitaaboommisina Waa'i kurukko.

²⁹Adilinam «Oono'o, at xaaxamaakkoo omachchonne kitaabamu Waa'i sagara shokkiissaatto; odim ‹Baabiloo'n adil waaraa ka uullaa ka uullanne hee'oo mannaa diinatee hundam bi'isoo'isa hiraago woccittok mahinatte?› yitaa Ermiyaasa xa'mmitaatto.

³⁰Adil Iyyoo'aaqeema, Waa'i kiina ‹Daawiit adilla'n barcumanne afuuroo manchi ki shumo'iinsi hee'ooyyo; ki leeshim biiranne uunjamaa balli eelliinchinaa hii'm hadaddinaa ihookko.

³¹Baxxakko'i baaxii'l bikkina keese, ki shumo'oo maqi'l daannuwwa hundamii guzumo'oommo; i sagara macceessakkobee'i bikkina ki'nnuwwanne, Yerusaalee'mmaannonnee Yihuxxi minaadabannee eeboommo yaa wocummi jor luwwa hundam eeboommo› yoolla» yaa kuroommisina ijaajukko.

³²Ee bikkina xaaxamaakkoo omachcho massaa kitaabam hee'u Neeriy beet Baarookina massaa uwwummo; ixxim sagarinne kurummaka hundam kitaabukko; Yihuxxi adil Iyyoo'aaqeem shokkiisu omachchonne yoohaanni'nnookkokaa anim kurummoka laboo mulli sagaraa hundam kitaabukko.