Read Hadiyya Ermiyaas Kitaaba 37 Bible Online

Ermiyaas Kitaaba 37 - Hadiyya bible

Ermiyaas Kitaaba 37

¹Baabiloo'n adil Nabukadanaxoore Iyyoosiyaas beet Sedeeqiyaasa adil Iyyoo'aaqeem beet hee'u Ikkooniyaan beyyonne adil issukko.

²Ihukkaarem Sedeeqiyaas, ixxi gassaanii minaadabii hiraagaanchi Ermiyaasinne Waa'i wocu sagarina ijaajanto'oyyo.

³Adil Sedeeqiyaas «Ni Moollanni Waa'a ni bikkina uunxe» yaa Sheleemiy beet Yahukaalaa Ma'eesaay beet qeessichchi Safooniyaasaa i beyyo asse'ukko.

⁴Ee ammane an karaxxi mine aagoo'n hee'ummi bikkina minaadaphphi Lambe'enne hasummisa daba'llamam hee'ummo.

⁵Gibxi uulli o'l gogot gabala higga'a waatto'oo bikkina Yerusaaleema kibbita'a hee'llo'i Baabiloo'n o'l gogot laso daba'llito'o.

⁶Ee lasage Isra'ee'l Moollanni Waa'i Sedeeqiyaasina «Oono'o, Gibxi uulli o'l gogot kiina hara'mmeena waaroolla; ihukkaarem waaru uullam daba'llaa elle'ookko.

⁸Odim Baabiloo'n uulli manni daba'llita'a waatta'a ka beero'o qassamo; kaa'lla'atim giirinne shokkiissamo.

⁹‹Baabiloo'n uulli manni daba'llita'a waattamoyyo› yitakka'a sawwitakkotte; elle'llambee'i bikkina ki'nnuwwi gaga qawwiissakkotte.

¹⁰Baabiloo'n o'l googota kaa'llakkota'nnim madaa'lla'a dukkaa'n woronne afuutto'i keenim qoxxita'a ki'lla'a beero'o giirinne shokkiissamo» yaa asse'amaano asse'aa kurona eese ijaajukko.

¹¹Gibxi uulli o'l gogot hincukkisa macceesaa Baabiloo'n o'l gogot Yerusaalee'm beero'o fatakaa laso gibaa hee'ukko.

¹²Anim i abaroosinne maqire afoo uulli baxxancha a'lleena Yerusaaleemiinse Biiniyaam uulla mareena ki'ummo.

¹³Ihukkaarem Biiniyaam ooxxi Gooca afummisam waardiyyuwwa ijaajaanchi hee'u Hanaaniyina beet beet hee'u Sheleemiyina beet Yiiriy «Ka uulla laggaa Baabiloona matteenatte» yaa amadukko.

¹⁴Anim «Yitoo woshshi qophphano; an ka uulla lagaa Baabiloo'n uulla mareenayyo» yaa dabachcha uwwummo; ihukkaarem Yiiriy i woshsha macceeseena hasubee'i bikkina karaa daannuwwi beyyo massukko.

¹⁵Daannuwwim lobakata quuqqa'a eese gansiisso'o; ee lasage karaxxi min ihoo'isina issakka'a hee'u dummichchi sawwite kitaaboo Yoonaataan mine aagisakka'a karakko'o.

¹⁶Eekke'ennem uulli woronne yoo karaxxi minenne lobakat ammane afuurummo.

¹⁷Eehanniinsi lasonne adil Sedeeqiyaas asse'amaano asse'aa adi'l mine maroommisa issaa annannam «Waa'i wocu hiraaqqi sagar yoohonnihe?» yaa xa'mmukko. Anim «Eeyya yookko; oohim at Baabiloo'n adilina higisantaa uwwantootto» yummo.

¹⁸Ee lasage adil Sedeeqiyaasena «Eese kassiissakko'ok keesenne, ki gassaanonnee ka minaadabannee baxummi jolli maruwwa?

¹⁹Kiina ‹Baabiloo'n adil keesennee ka uullannee hawwo afisooyyo› yita'a wocco'i hiraagaan hannonne yo'o?

²⁰Ee bikkina adila, i woshsha macceessoo'isinaa xa'mmoommi xa'mmichchinam dabachcha uwwitoo'isinaa uunxoommo. Oohim karaxxi min issitakko'i kitaabaanchi Yoonaataan mine dabattitte; eekke'e daba'llaa aagumlas lehoommo» yaa xaa'mmummo.

²¹Ee bikkina adil Sedeeqiyaas adi'l mi'n ooxxi woronne yoo waardiyyuwwi minenne karamoommisina ijaajukko; anim eekke'enne hee'ummo; beero'iinsi hurbaat beeddeebe'e hurbaata sarookee'n angiinsi mat mat xeffo'i qorosho'o ballina ballina uwwakkam hee'ukko.