Read Hadiyya Ermiyaas Kitaaba 38 Bible Online

Ermiyaas Kitaaba 38 - Hadiyya bible

Ermiyaas Kitaaba 38

¹Anim Waa'ika sagara minaadabina losisummisa Maataan beet Shafaaxiy, Phaashihuur beet Gadaaliy, Sheleemiy beet Yahukaalii Malkiy beet Phaashihuurii macceesso'o.

²Wocummi sagarim «Yerusaalee'm beero'onne gatookkok hundim orinne, sibaarinne, te'im jabbinne lehookko; ihukkaarem Baabiloo'n gogoxxi beyyo maraa anga uwwookkok lehooyyo; ixxi gagam xossiixxaa foorinne hee'ookko» yoohane hee'ukko.

³Odim kuroommisina Waa'i kuru sagar «An ka beero'o Baabiloo'n uulli o'l gogotina higisaa uwwoommo; ixxuwwim ixxuwwi gassoronne issita'a amaddamo» yoohane hee'ukko.

⁴Ee lasage gassaan adilina «Ku manchi wocoo woshshinne ka beero'onne gataa yoo gaadaanii minaadabii neeyyata muroolli ihu bikkina ixxi lehimmi hasisookko; ku manchi minaadaphphi bichcha sawwoohane bagaan eroomma sawwoobee'ane» yito'o.

⁵Adil Sedeeqiyaasim «Oono'o, ixxi ki'nnuwwi angannem yoo bikkina hassakko'isa issitakko'aare an hooroommoyyo» yaa dabachcha uwwukko.

⁶Ee bikkina eese amadda'a waardiyya egeraa'n wixxixxi beyyonne yoo adi'l beet Malkiy wo'i barenne heechchinne aad hoorakka'a dilliisakko'o; Ba'l woronnem hariinsi bagaan wo'i hee'ubee'i bikkina ha'l woronne xuuxamummo.

⁷Adi'l minenne daanni hee'u Tophphe'i uulli Abemeeleeka yakkam muleessakkichchi eese barenne ubbuusakko'isa macceesukko; ee ammane adil Biiniyaa'm ooxxi goocanne dummichchanne afuuraa hee'ukko.

⁸Ee bikkina Abemeeleek adi'l beyyo maraa

⁹«Adila, ku manni hiraagaanchi Ermiyaase barenne ubbuussa'a kee'mmaalli hawwojja hawwoddo'ookko. Beero'onne hurbaat bee'i bikkina sibaarinne leheenatte» yukko.

¹⁰Ee lasage adil Abemeeleekina «Ka beyyiinsi sas mancho amaddaa mattaa hiraagaanchi Ermiyaase lehoo'n illage wo'i bariinsi fissehe» yaa ijaajukko.

¹¹Abemeeleekim manna awwonsaa marukko; Adi'l mi'nnek mu'ut afuuroo mine aagaatim beeddaa dereeramaakkoo suusa aa'aa usanne karaa ba'l woronne yoommi beyyonne aad dilliisukko.

¹²Us muroobee'isa suusooma kikkilonne karoommisa kurukko; anim yukkisanne issummo.

¹³Oo mannim usinne gosaassu'uuyyi ba'l woriinsi fissita'a adi'l mi'n ooxxi woronne yoo waardiyya egeraa'n minenne aagissa'a katto'o.

¹⁴Adil Sedeeqiyaase eese Keesammi Mi'n saxxi gooca weeshisaa «An keese mat luwwa xa'mmoommo; maham maaxxitte» yukko.

¹⁵Anim «Hanqa wocummita'nnim shitootto; sogumta'nnim macceesseena hassooyyo» yummo.

¹⁶Ee ammane adil Sedeeqiyaas «An keese shoommoyyo; shoo manninam higisaa uwwoombee'an ihukkisa foore uwwu hee'oo Waa'i summinne hide'oommo» yaa ayyim la'oobee'isa hide'ukko.

¹⁷Ee lasage Isra'ee'l Waa'i ihu gogoxxi Moollanni Waa'i Sedeeqiyaas bikkina kurukkoka hundam «Baabiloo'n uulli o'l daannuwwina anga uwwittaare letoo'n gattootto; ku beero'im giirinne shokkimmiinsi gatookko; atii ki abaroosii foorinne hee'llakkamo.

¹⁸Ihukkaarem ixxuwwinamdu anga uwwitbeelas ku beero'i uwwamookko; Ixxuwwim shokkiissamo; atim ixxuwwi angiinsi goxxitaa xantooyyo» yaa kurummo.

¹⁹Adilim «An baddoommok ni uulliinsi lagga'a Baabiloo'n uulla matto'i manna; oo manni eese ixxuwwina higissa'a uwwitolas Baabiloo'n manni barche'e afissamo» yaa dabachcha uwwukko.

²⁰Anim «Hawwi bee'e; ixxuwwina higisakka'a uwwakkamoyyo; Waa'i wocu sagarina ijaajantilas kiina makkookko; atim lehiinsi gattootto.

²¹Ihukkaarem anga uwwimma sabbilas Waa'i iina moo'isu kaalti yookko.

²²Oohim Yihuxxi adilla'n minenne gatu meenti hundam Baabiloo'n uulli daannuwwi beyyo massitamo; oo meentim ‹Amma'nnantaa hee'llitti ki beshshuwwi keese huushisso'o; ixxuwwim keese kaa'llo'o; ki lokkim shophe'i woronne aagu bikkina ki beshshuwwi utta'a matto'o› yitamo» yummo.

²³Odim «Ki meentoo oosoo hundam Baabiloo'n uulla massakkamo; atim ixxuwwi angiinsi goxxitooyyo; Baabiloo'n adilim keese amadaa karookko; ku beero'im giirinne shokkookko.

²⁴Sedeeqiyaasim «Ka woncummi woshsha ayyim la'oone; la'ulas keese shookko.

²⁵Daannuwwi an kiinninne maqire haasaawwummisa macceessolas waatta'a maha woncumda'ee xa'mmitamo; woncummi woshsha maaxxoo'n kuttilas shitambee'isa sagara aaggamo.

²⁶Ee bikkina ‹Karaxxi min hee'u Yoonaataan mine dabattaa aagsitlas lehoommi bikkina aagissitte› yaa uunxam hee'ummo yihe» yukko.

²⁷Eehanniinsi lasonne daannuwwi hundim i beyyo waatta'a xa'mmito'o; anim adil Sedeeqiyaas ijaajukkisa xale'e kurummo; anii adilii haasaawwinummuuyyi ayyim macceeubee'i bikkina maham issiteena xanto'oyyo.

²⁸An Yerusaaleem beero'o diina'i amadeebe'e adi'l mi'n ooxxi woronne yoo waardiyyi egeraa'n minenne karamaa afuurummo.