Read Hadiyya Ermiyaas Kitaaba 39 Bible Online

Ermiyaas Kitaaba 39 - Hadiyya bible

Ermiyaas Kitaaba 39

¹Sedeeqiyaas minaadabanne adil ihu honsi hiinchonne tommi agananne Baabiloo'n uulli adil Nabukadanaxoor o'l gogotinne hundinnem waaraa Yerusaaleem beero'o kibbukko.

²Sedeeqiyaas adil ihu tommaannonnee mat hiinchonnee soo'l aganannee honsi ballannee Yerusaaleem beero'ika qasha diina'i iiqaa aagukko.

³Baabiloo'n adi'l maqi'l daannuwwi hundim Samigaar neebo'i, Nergaalshaareex, lob ijaajaanchi Sarsaakiimii lob daanni Nergaalshaareexii hundim Yerusaaleem beero'i woro aagga'a lambe'i beyyi ooxxi goocanne afuutto'o.

⁴Adil Sedeeqiyaasii o'l gaadaanii hundim ihu luwwi hundam moo'lla'a hiimonne beero'iinsi fitta'a xotteena yakito'o; adilla'n mi'n duubbi kaashshi kollinne aa'lla'a lamem ooxxi lamejjannem yoo goocinne Yoordaanoos cebbi kollonne hootta'a xotto'o.

⁵Ihukkaarem Baabiloo'n uulli o'l gogot hollitu'uuyyi Laseessa'a Iyaarko'i gadanonne yoo biir uullanne Sedeeqiyaase affa'a qeefaddo'o; eehanniinsi lasonne Haamaaxxi uullanne Riibila yakkam beero'o adil Nabukadanaxoor yoo beyyo amadda'a wotto'o; Ixxim eekke'em Sedeeqiyaasenne oogatukko.

⁶Baabiloo'n adil Riibila yakkam beero'onne Sedeeqiyaas ooso ixxi illi moo'onam dussiisukko; daannuwwa hundam shukko.

⁷Eehanniinsi lasonne Sedeeqiyaasika lamem illem qooqisaa xaarinne karaa Baabiloona massukko.

⁸Baabiloo'n uulli manni adi'l minee minaadaphphi gatti minee giirinneshokkisso'o ootam gindito'o.

⁹Lasaanchonne odim Baabiloo'n adi'l o'l ijaajaanchi Nabuzaardaan Yerusaaleem beero'onne gatu minaadabaa luxxeka ixxi beyyo gibba'a matto'i mannaa hundam qeefadaa Baabiloo'n uulla massukko.

¹⁰Ihukkaarem amaxxi bee'i bux keeno uullanne urukko; Ixxuwwinam duubbi kaashsha kaaxxitam beyyoo abuullaqqitam beyyoo uwwukko.

¹¹Adil Nabukadanaxoor waardiyyuwwa ijaajaanchi hee'u Nabuzaardaanina

¹²«Ermiyaas beyyo mattaa hasisoo hara'mmat hundam isse bagaan matem luwwannem hawwodditte» yaa ijaajukko.

¹³Ee bikkina waardiyyuwwa ijaajaanchi Nabuzaardaan, Nabuushaazbaan, Nergaalshaareexeerinnee Baabiloo'n uulli mulli daannuwwinnee maqirem

¹⁴karamaa hee'ummi adi'l mi'n ooxxi woronne yoo waardiyya egeraa'n miniinsi firoommisa issukko. Eesem Saafaan beetina beet hee'u Ahiqaam beet Gadaliyaas beyyonne abooyyakku'uuyyi mine uwwakka'a hee'oommisa issakko'o; anim i minaadaphphi lambe'enne ihaa eekke'enne hee'ummo.

¹⁵An waardiyya egeraa'n beyyonne karamaa hee'ummi ammane

¹⁶Isra'ee'l Waa'i ihu gogoxxi Moollanni Waa'i Abemeeleeka yakkam Tophphe'i uulli manchina «Ka beero'onnee goddi ihoo'n bichcha eebaa wocummi sagara wonshoommo ee ammane ookki ihukkuuyyi ki illinne moo'llootto.

¹⁷Ihukkaarem ee balla an keese egeroommo; badditoo diina'i angannem qeefadantooyyo.

¹⁸An xumminne egeroommi bikkina letooyyo; eesenne amma'nnantaattoo bikkina foorinne hee'llootto; an Waa'i eekka wocaammo» yaa kuroommisina ijaajukko.