Read Hadiyya Ermiyaas Kitaaba 41 Bible Online

Ermiyaas Kitaaba 41 - Hadiyya bible

Ermiyaas Kitaaba 41

¹Ee hiinchaannonne lama'l agananne adi'l mi'n lob gassaaniinsi matoom adi'l abaroosiinsi ihu Eelshaama'i beetina beet hee'u Naataaniy beet Isma'eel tommi manchinne maqirem ulla minaadaba gassaanchi Gadaaliya do'eena Misiphpha marukko; Hundim hurbaata itteena afuutta'a hee'llu'uuyyim

²Naataaniy beet Isma'eelii maqi'l tommem mannii Baabiloo'n adil gassaanchi issaa doo'llu Gadaaliya bisa'inne aphphissa'a shito'o.

³Odim Isma'eel Gadaaliyinne maqirem Misiphphanne hee'llo'i Isra'ee'l oosoo Baabiloo'n gaadaanoo edaa shukko.

⁴Soodaraar daram gadaliy lehukkisa ayyim la'oo'n

⁵Seekeemiinsii Seelo'iinsii Samaare'iinsii waatto'o; ixxuwwim kichche'lla'a haareedda hogoossita'a, eddechcha dereetta'atii illi kollo xargita'atii hee'llo'o. Keesammi Minenne kitima hincaa'llam hurbaataa aduruusaa amadda'a hee'llo'o.

⁶Odim Naataaniy beet Isma'eel Misiphphiinsi wi'llukkuuyyi ee manna aa'eena waarukko; Ixxuwwi beyyo waaraa lasonne «Ahiiqaam beet Gadaaliy beyyo waallehe» yukko.

⁷Oo manni beero'o aaggo'isam Naataaliyyi beet Isima'eelii ixxi awwonaanii shita'a barenne uunjito'o.

⁸Sadeentayyi manniinsem tommoom «Ha'i neese shititte; Neese abuulli woronne maanxaammo lobakat aras, so'i, wee'l zaytii marabii yookko» yita'a Isma'eela uunxito'o; ixxim qishixxato issukko.

⁹Ee manna shaa ubbuusu wo'i bar adil Aasa'i Isra'ee'l adil Baa'oosh hawwo afisoobee'isa baddu bikkina hinsiisaakkoohane hee'ukko; Isma'eelim ee barenne leesha wonshukko.

¹⁰Eehanniinsi lasonne Isma'eel adil Sedeeqiyaas mi'n landaa gatu minaadabaa Misiphphanne karukko; ixxuwwim Baabiloo'n adilina bagaxxi ijaajaanchi Nabuzaraadaan Gadaaliy anganne yabo uwwukeen hee'llo'o. Ihukkaarem Isma'eel ixxuwwa qeefadaa Amoo'n uulli kolli gibeena ki'ukko.

¹¹Qareey beet Yoohaanaanii ixxenne maqirem hee'llo'i o'l daannuwwii hundim Naataaniy beet Isma'eel baxu damiga macceesso'o.

¹²Ee bikkina Naataaniy beet Isma'eela qasseena maqi'l manninnem matta'a; Gaaba'oonaa yakkam uullanne matto'o; Gaaba'oonaa yakkam uullanne yoo lob qoqqophphi gadano affo'o.

¹³Isma'eela qeefadaa massu manni hundim Yoohaanaanaa maqi'l o'l awwonsaanoo mo'llo'i ammanenne liiranto'o.

¹⁴Isma'eel Misiphphiinsi qeefadaa massu manni hundim goxxita'a Qareey beet Yoohaanaan maqire hee'llo'i mannanne exxito'o.

¹⁵Ihukkaarem Naataaniy beet Isma'eel ixxenne hee'llo'i Sadeentem manninne maqirem Yoohaanaan angiinsi goxxaa Amoo'n uulla gibukko.

¹⁶Qareey beet Yoohaanaanii ixxenne maqirem hee'llo'i gaaxxi awwonsaanii hundim Naataaniy beet Isma'eel Akkiq beet Gadaaliya shaa lasage qeefadanto'i manna dabatta'a amadda'a matto'o; oo keenim gaadaanoo meentoo ciilluwwaa hee'llo'o.

¹⁷Ixxuwwim Baabiloo'n adil daanni issaa doo'llu Gadaaliya Isma'eel shu bikkina Baabiloo'n adil hawwo afisookko yita'a baddita'a hee'llo'o; ee bikkina Baabiloo'n uulli manniinsi gibba'a matto'o. Beeteeleema yakkam beero'i gadanonne yoo Kimihama yakkam beyyonne usheexxito'o.