Read Hadiyya Ermiyaas Kitaaba 42 Bible Online

Ermiyaas Kitaaba 42 - Hadiyya bible

Ermiyaas Kitaaba 42

¹O'l gogoxxi gassaan, Qaareeh beet Yoohaanaanii Hooshaay beet Azaariyaasii minaadabii hundim hoffokii lobokii i beyyo waatta'a

²«Gaassi lobakat manni hee'nnummo; ihukkaarem kaba at moo'lloo'isam gantum qax hoffi manna; ee bikkina ha'i ni uunxato macceese. Qeefajjiinsi gantummi minaadaphphi bikkina Waa'a uunxe.

³Ki Moollanni Waa'i neese malloommi beyyoo banxoommi baxoo caakkisoo'isina uunxe» yito'o.

⁴Anim «Danaamo yitakko'isam Moollanni Waa'a ki'nnuwwi bikkina uunxoommo; ixxi kuru luwwi hundam ki'nnuwwiinsi maham maaxoo'n kuroommo» yummo.

⁵Eehanniinsi lasonne ixxuwwi odim «Moollanni Waa'i ki kollinne uwwoo ijaaj hundam ijaajammumbeelas Waa'i ixxi gagim neesenne hanqo'anee amma'nnamaakkoo naqaashaa ihona.

⁶Iittinummom sambummom ni Moollanni Waa'i sagarina ijaajammoommo; keese ixxi beyyo asse'nnoommuullakim neese ixxena ijaajammumlas niina hundem luwwim makkoo bikkinatte» yito'o.

⁷Tommi balliinsi lasonne Waa'i iina wocukko.

⁸Ee bikkina Yoohaanaana, ixxenne maqire hee'llo'i gaaxxi awwonsaanoo minaadaba hoffokaa lobokaa hundamii i beyyo weeshaa

⁹«Ki'nnuwwi bikkina uunxoommisina asse'llakko'i Isra'ee'l Moollanni Waa'i

¹⁰‹Ki'nnuwwanne afoo'isina issummi bichchanne kichche'aammo; ee bikkina ka uullannemdu afuuttakkolas an ki'nnuwwa dabaraa axisoommo bagaan bi'isoommoyyo; kaasoommo bagaan xoqoloommoyyo.

¹¹Kaba ki'nnuwwa baddisoo Baabiloo'n adila badditakkotte; ki'nnuwwa ixxi angiinsi ubbuusisaa gatiseena an ki'nnuwwinne yoommo.

¹²An qishixxoommisam Baabiloo'n adilim ki'nnuwwina qishixxoo'isaa ki'nnuwwi uulla daba'llitakkamisa issoo'isaa issoommo; an Waa'im eekka wocaammo› yukko.

¹³«Ihukkaarem ki'nnuwwi Yihuxxi uullanne gattakko'i minaadab ki'nnuwwi Moollanni Waa'ina ijaajammoommoyyo yitakka'a ka uullanne afuurimma sabbakkolas

¹⁴odim ‹Neese orii xurumbulli sagarii macceesamoobee'i uulla sibaarim bee'i Gibxi uulla mallaa eekke'enne hee'nnoommo› yitakkolas

¹⁵Waa'i ki'nnuwwi bikkina wocoo luwwa macceessehe; Isra'ee'l Waa'i ihu gogoxxi Moollanni ‹Gibxi uullaa dillitakka'a eekke'enne hee'nnoommo yitakkolas

¹⁶oo badditakko'i or ki'nnuwwi beyyo afookko; Badditakkam sibaarim ki'nnuwwa laseesookko; ee Gibxi uullannem letakkamo.

¹⁷Gibxi uulla matta'a hee'lleena murte'llo'i keen hundim orinnee sibaarinnee jabbinnee beedditamo; ixxuwwanne eebeena sawwummi bichchiinsi matim goxxaa gatooyyo› yoolla.

¹⁸«Isra'ee'l Waa'i ihu gogoxxi Moollanni ‹Gibxi uullamdu mattakkolas kanniinsi illageen Yerusaalee'm mannanne dillu i quunqii boobanii ki'nnuwwannem dillookko. Ki'nnuwwi moo'oo manni beyyonne hundannem sabantakko'oohane, maalalakamane, duumakkamanee naac sagara wocakkamanee ikkakkamisa issoommo; ka beyyom la'mmaagge moo'llakkamoyyo› yoolla» yummo.

¹⁹An odim ixxuwwina «Uullanne gattakka'a Yoontakke'i manna, Waa'i ‹Gibxi uulla mattakkotte› yaa kuraakko; Anim ki'nnuwwi lobakat huushancha baxxakko'isa ki'nnuwwina qoxxisaa kuraammo; ki'nnuwwi bikkina Moollanni Waa'a uunxoommisina eese xa'mmitakko'o; Waa'i ijaaju luwwa hundam wonshitakkeena sagara aaggakka'a hee'llakko'o.

²¹Oono'o, anim dabachchooma caakkisaa kuraammo; ihukkaarem ki'nnuwwi Moollanni Waa'i asse'ukkaare kurummi sagarina kabadem ijaajantakko'oyyo.

²²Kaba mattakka'a hee'llakkeena hassakko'i beyyonne bisa'inne, sibaarinnee jabbinnee letakkamisa laqqehe» yummo.