Read Hadiyya Ermiyaas Kitaaba 43 Bible Online

Ermiyaas Kitaaba 43 - Hadiyya bible

Ermiyaas Kitaaba 43

¹An ixxuwwi Moollanni Waa'i kuroommisina asse'u minaadabina kuraa guullummo.

²Ee lasage Hosheey beet Sariyaas, Qaareeh beet Yoohaanaanii bolxitam mulli mannii hundim eese «At qophphano woccaatto; ni Moollanni Waa'i ‹Eekke'enne hee'llakkeena Gibxa mattakkotte yitaa kure› yaa keese asse'ukkoyyo.

³Ihukkaarem Baabiloo'n uulli manni neese shitamisina te'im qeefadda'a massitamisina ixxuwwi anganne higissaa uwwitoo'isina keese ki'isansukkok Neeriy beet Baarookatte» yito'o.

⁴Ee bikkina Qaareey beet Yoohaanaanii gaaxxi awwonsaanii ee'isam minaadabii hundim uullanne hee'llamisina ijaaju Waa'ika sagara macceesseena hasso'oyyo.

⁵Ee lasage Qareey beet Yoohaanaanii gaaxxi awwonsaanii mulli minaadaphphi lambe'enne binnito'i beyyiinsi uullanne hee'llamisina daba'llito'i manna hundam amadda'a Gibxi uulla matto'o.

⁶Odim goonaa meentoo ciilluwwaa Baabiloo'n gaaxxi ijaajaanchi Nabuzaardaan Akkiqaam beet Gadaaliyaas anganne dissu adi'l mi'n landa ee'isam eesee Baarookaa massito'o.

⁷Waa'i sagarina ijaajancha sabba'a Gibxa matta'a Xaafinaas beero'i afeebe'e aaggo'o.

⁸Ee Xaafinaas Beero'onne Waa'i iina

⁹«Lob kinneewwa massitaa Xaafinaasanne yoo adil Faari'oon mine aagakkam goocanne minaadab moo'llu'uuyyim kininne baxakko'i gaxanne waamme.

¹⁰Odim Isra'ee'l Waa'i ihummi gogoxxi Moollanni Waa'i iina awwaadaanchi ihu Baabiloo'n adil Nabukadanaxoora waaroo'isa issommo; Adilla'n barcumam at kina waammititti beyyonne dissaa adilla'n dukkaanam kaasoo'isa kure.

¹¹Nabukadanaxoorem waaraa Gibxa qasookko; jabbinne letamisina qoodanto'i keen jabbinne letamo; qeefadanta'a mattamisina qoodanto'i keen qeefadantamo; oranne letamisina qoodanto'i keen odim orannem letamo.

¹²Nabukadanaxoor Gibxi uullanne yoo qophpha'n waa'uwwi minenne giira xanqisaa shokkiisookko; qophpha'n waa'uwwam qeefadaa massookko; Allaaraanchi eddechchanne hanenne labasa edaa edde'oo'isam Gibxi uulla ixxi gassonne edaa xumminne elle'ookko.

¹³Gibxi uullanne Oona yakkam beero'onne yoo kininne baxakko'oo soodduwwa iiqansookko; Gibxanne yoo qophpha'n waa'uwwika minneewwa giirinne shokkiisookko» yukko.