Read Hadiyya Ermiyaas Kitaaba 44 Bible Online

Ermiyaas Kitaaba 44 - Hadiyya bible

Ermiyaas Kitaaba 44

¹Gibxi uullanne hanaa'n qarinne Migdoola, Xaafinaasaa Meemfoosaa yakkam beero'uwwannee uullaannonnee woroo'n qarinne birinne binnita'a hee'llam minaadabina Waa'ik sagar i beyyo waarukko.

²Gogoxxi Moollanni Isra'ee'l Waa'i «Yerusaaleemannee beero'uwwannee hundannem eebummi bichcha ki'nnuwwi moo'llakko'ookko; oono'o kabad afeebe'em gindamaa matim hee'oobee'isa ihaa yookko.

³Mashka'oomim ee beero'uwwanne hee'llo'i minaadab jor baxo baxxa'a eese quuqisso'aarette; ixxuwwi qophpha'n waa'uwwina kitima hincaa'llo'o; ixxuwwam ki'nnuwwi te'im ki'nnuwwi anno'i otossitobee'i mulli waa'uwwina otossitto'o

⁴Anim ka ha'yyoombee'i shigigaa'oo baxo baxxakkam bee'isa qoxxissona iina awwaaddam hiraagaano ki'nnuwwi beyyo edaa edaa asse'ummo.

⁵Ki'nnuwwi ihukkaarem ixxuwwi woccam woshsha macceessakkeena hassakko'oyyo. Jor googiinsem daba'llitakka'a qophpha'n waa'uwwina kitima hincaa'imma uttakko'oyyo.

⁶Ee bikkina beero'uwwannee Yerusaaleem googguwwannee i quunqii bala'ii dillaa gii'llisa aphphoo'isa issummo; kaballa moo'llakkamisam gindamaa ayyim hee'oobee'an ihaa diihaakko.

⁷«Kabadem an Isra'ee'l Waa'i ihummi gogoxxi Moollanni Waa'i ki'nnuwwa xa'mmoommo; manni shumo'i gatoo'n goonii meentii, oosii Ciilluwwii uulliinsi bi'llamisina ka kee'mmaalli bichcha ki'nnuwwi gaganne mahina eebaqqitakkamuulla?

⁸Hee'llakkeena waattakko'i Gibxi uullanne anginne baxxakko'i qophpha'n waa'uwwina kitima hincaa'imminnee otossimminnee eese mahina quuqissakkamuulla? Te'im uullanne yoo minaadab hundim naacoo'isinaa ki'nnuwwi summim duumamoo'isinaa ki'nnuwwi gaga bi'ixxitakkamonnihe?

⁹Uullannee Yerusaalee'm googguwwannee ki'nnuwwi anno'ii adilluwwii ixxuwwi meentii baxxakko'i jolla xaddakko'onnihe?

¹⁰Kaballi afeebe'e horoore heeshaa'llakka'a iina lomba uwwitakko'oyyo; ki'nnuwwinaa ki'nnuwwi anno'inaa uwwummi seeraa gatti ogoraa egettakkeena hassakko'oyyo.

¹¹«Ee bikkina Isra'ee'l Waa'i ihummi Gogoxxi Moollanni Waa'i uulla hundam bi'iseena iikka ille jollinne ki'nnuwwi hanenne issoommo.

¹²Gibxa matta'a hee'lleena murte'llo'i qeefajjiinsi gatto'i manna hundam bi'llamisa issoommo. Hoffaanniinsi lobaannonne afeebe'e bagadinnee sibaarinnee Gibxi uullanne letamo; ki'nnuwwi ceemanchina, muggisoo guzumo'ina, duumanchinaa naacanchinaa mare'i ikkakkamo.

¹³Yerusaalee'm beero'i manna bagadinne, sibaarinnee jabbinnee bi'isummisam Gibxanne hee'llam keenom bi'isoommo.

¹⁴Uullanne qeefajjiinsi gatta'a Gibxi uulla matto'i keenyihuxxi uulla daba'lliteena mixxota'nnim hofqaxiinsi bagaan matim goxxaa te'im gataayihuxxi uulla mat manchim daba'llooyyo» yukko.

¹⁵Ee lasage Ixxuwwi meenti qophpha'n waa'uwwina kitima hincaa'oo'isa la'oo gooniimeentii hundim Gibxi uullanne woroo'n qarinne hee'llam Isra'ee'l minaadabii ee beyyonne uullita'a hee'llo'i meentii hundim mateeyyanne wixxita'a eese.

¹⁶«At Waa'i summinne kuttootti woshsha hundam macceensoommoyyo.

¹⁷Neese banxoommoo yinaa sawwinummi luwwi hundam issinoommo. Iima'n waa'atte yakkam Astaarotina aduruusa wiriissinoommo; niyyanno'ii ni adilluwwii awwonsaanii uullannee Yerusaalee'm googguwwannee issitam hee'llo'isam neesem kaba woyi'n diqaasa kitim issinaa ni waa'na hincaa'nnoommo; eekka issinam hee'nnummi ammane lobakat goddi hee'ukko; Goddaan inkaa makkixxinaa hee'nnummo bagaan jor luwwi gambahukkoyyo.

¹⁸Ihukkaarem iima'n adilina aduruusa wiriissimmaa woyi'n diqaasa kitim issinaa hincaa'immaa ullummi ammaniinsi ki'isaa hundem luwwam hoongaammo; Ni minaadabim bagadinnee sibaarinnee beeddoolla» yito'o.

¹⁹Odim meentim «Iima'n waa'atte yakkamaantena ise laboo ongochcho'o sallummuuyyii isenam aduruusa wiriissinummuuyyii woyi'n diqaasam kitim issinaa hincaa'nnummuuyyii issinummi luwwa ni goon la'ukkoyyonnihe?» yito'o.

²⁰Anim eehid yaa dabachcha uwwu goonina, meentinaa minaadabinaa hundinam

²¹«Ki'nnuwwi, gaassi ki'nnuwwi anno'i, ki'nnuwwi adilluwwi, daannuwwii uullanne hee'oo minaadabii hundim beero'uwwannee Yerusaalee'm googguwwanee aduruusa wiriissitakkam hee'llakko'isa la'ubee'ekaa xadukkokaa labissakka'atenheni?

²²Waa'i kanniinsi eehid ki'nnuwwi baxxakkam jollaa haashaaranchaa iyyaqqeena xanukkoyyo; ee bikkina ki'nnuwwi uulli duumanchina mare'e, manni hee'oobee'i diihaa udma'aa ihaakko.

²³Mulli waa'uwwina aduruusa wiriissimminne Waa'a kichche'issakko'i bikkinaa ixxi sagaram egettakkobee'i bikkinaa gatti ogoraa ijaajoo lonsitakkobee'i bikkinaa ku moo'llakkam bichchi hundim afukko» yummo.

²⁴Anim minaadabinaa ixxuwwi meentinaa hundinam Waa'ika sagara macceessamisina kurummo.

²⁵Isra'ee'l Waa'i ihu Gogoxxi Moollanni Waa'i «Ki'nnuwwii ki'nnuwwi meentii ki'nnuwwi suuminnem iima'n adilina aduruusa wiriissitakkeena woyi'n diqaasa kitim issitakka'a hincaa'llakkeena aaggakko'i sagara wonshitakko'ookko; eehannah aaggakko'i sagara egellehee wonshehee.

²⁶Gibxi uullanne hee'llakkam Ayihuxxi minaadab hundim i sagara macceessehe; kanniinsi eehid Gibxanne hee'oo minaadabiinsi mat manchim ihuta'n ‹hee'oo Waa'i summinne› yaa i summa weeshoobee'isaa hide'oobee'isaa iihaanninne malaayyaam summinne hide'aammo.

²⁷Kanniinsi eehid ki'nnuwwina jolla bagaan eroomma isseena sawwoommoyyo; ki'nnuwwiinsi matim gatoo'n hundim bagadinnee sibaarinnee beeditakkamo.

²⁸Ihukkaarem hofqax mannim lehiinsi gatta'a Gibxi uulliinsi uulla daba'llitamo. Ee ammane Gibxi uulla matta'a hee'llo'i manni i sagar te'im ki'nnuwwi sagar ayyek hanqi ihuda'ee laqqamo.

²⁹Ki'nnuwwa ka beyyonne guzumo'oommi ammane ‹Ki'nnuwwanne bichcha eeboommo› yaa wocummi sagar hanqi ihukkisa an ki'nnuwwi Waa'i mare'isa issoommo.

³⁰An Ayihuxxi adil Sedeeqiyaas sheena hasam hee'u diinakkichchi Baabiloo'n adil Nabukadanaxoorena higisaa uwwummisam Gibxi adil Faari'oon Hoofira sheena hasoo diina'ina higisaa uwwoommo» yukko.