Read Hadiyya Ermiyaas Kitaaba 46 Bible Online

Ermiyaas Kitaaba 46 - Hadiyya bible

Ermiyaas Kitaaba 46

¹Waa'i iina Gibxi uulliinsi ki'isaa uulli minaadabina hundinam wocukko; Iyyoo'aaqeem minaadabina adil ihu soo'l hiinchonne Efiraaxiis daajji gadanonne yoo Karkaamiisha yakkam beyyonne Nako yakkam Gibxi uulli adil gaadisaakkoo gaadaano Baabiloo'n adil Nabukadanaxoor kaa'ukkisa Waa'i wocu hiraaqqi sagar kane.

³«Gibxi uulli gaaxxi awwonsaan ‹Agira gudissehe; orinam fillehe;

⁴Faradonne hakkamma issitakka'a saa'llehe; horoo'l qoobe'e issitakka'atim orina guddehe. Ki'nnuwwika bagado qareessehe; o'l eddechcham edde'llehe› yita'a shattamuulla.

⁵«Ihukkaarem ku moo'oommi luwwi maha? Baddimmiinsi ki'ukkok laso daba'llitamuulla; Gaadaan kaa'anto'ookko; baddita'a dambaqimminne lasonne gibbo'ookko. Laso daba'llita'a moo'lloo'nnim ixxuwwi malaayqaxa geetto'o.

⁶Ihukkaarem qaqqissa'a geettam keeninam makkukkoyyo; gaadaanim xotteena xanto'oyyo; Efiraaxiisiinsi hanaa'n qarinne qo'llita'a ubbo'o.

⁷Ku Abbaaya yakkam daajjisa ki'ookkokii wo'mmaa dirisoom tochchi hundam ifiisoo daajjisa ihukkokii ayyette?

⁸Abbaaya yakkam daajjisa ki'ukkokii wo'mmaa dirisoom tochchi hundam ifiisoo daajjisa ihukkokii Gibxa; Gibxi «An ki'aa uulli hundam wo'mmoommo; beero'uwwaa eekke'enne hee'llam minaadabaa hundam bi'isoommo.

⁹Farad illagenne hooraa maroo'isina faraxxi gaare'uwwim tululihona ijaajjehe; Tophphe'iinsii Liiba'iinsii agira amadda'a waatto'i manninnee Liidiy uulliinsi waatto'i xiyya tokkossam malaayyaam manninne maqirem qoxxaalli gaadaano asse'llehe» yaakko.

¹⁰Ku balli Hundam Xanoo Waa'i doo'llaakkoo balla; ixxi diina'a guzumo'oo guzumo'i balla; Ixxek bisa'i ixxuwwa goddeeqaxina itookko; xeebo mu'lleeqxinam ixxuwwika xiiga agookko. Hundam Xanoo Waa'i Efiraaxiis daajjiinsi hanaa'n qarinne qeefadanta'a yo'i keeno kitim issookko.

¹¹Gibxi minaadaba, Gaala'aada mattakka'a qaraare hassehe. Ki'nnuwwik qaraar hundim awwaad bee'ane; fayyiiseena xanoo luwwim bee'ane.

¹²Mulli minaadab hundim ki'nnuwwi tuuttakko'isa macceesso'ookko; uulli minaadab hundim ki'nnuwwika lachcha macceesso'ookko. Mat gaadaanchi mulleka qolukkuuyyi amaxxamaa uullanne ubookko.

¹³Baabiloo'n adil Nabukadanaxoor Gibxi uulla qaseena waaru ammane Waa'i iina

¹⁴«Gibxi uulli beero'uwwanne Migdoolanne, Meemfoosannee Xaafinaasannee ‹Ki'nnuwwi gaga diina'iinsi gatixxitakkeena guddehe; wixxaa'llakko'i luwwi hundim orinne bi'ookko.

¹⁵Ki'nnuwwik ‹Aphphiis› yakkam malaayyaam waa'i ubukkok mahinatte? Waa'i aphphisukkaareyyonnihe? yitaa alallaate.

¹⁶Ki'nnuwwik gaadaan qolanta'a ubbo'ookko; ixxina'i ixxim mat mullaannina ‹Diina'i bisa'iinsi xollaa ni uulli minaadabanne exxinoommisina qaqqinsona› yookko.

¹⁷«Gibxi uulli adilina ‹Ixxeka gada'a awwaaxxoobee'i woshsham qophphanaancho› yakkam haareechchi summinne weeshakkamo.

¹⁸Summi gogoxxi Moollanni Waa'a yamamoo adil ‹Hanqinam an hee'oommi Waa'a; Taaboo'l duun duunnuwwiinsi hundiinsim lobane. Qarmeeloos duunim dambalaqiinsi hanaan ihaa moo'amoo'isam ee'isam ki'nnuwwanne hawwo afisookkokim malaayyaamo› yoolla.

¹⁹Gibxi minaadaba, qeefadantakka'a mattakkeena guddehe. Meemfoos beero'i gindamaa manni hee'oobee'i udma'i ihookko.

²⁰Gibxi makkixxu addichchisa; ixxi hanaa'n qarinne waaroo qasoo tikaayyichchinne qasamookko.

²¹Qaxxaramaa baxoo Gibxi uulli gaadaanim Di'iru baa'l moolluwwi'nnoohane; qoxxita'a orancha xantobee'i bikkina hundim laso daba'llita'a geetto'o. Oogaxxekii bichchi ayyaamii ixxuwwina afaakko.

²²Diina'i gogot waaroo amman hincoohaare Gibxi hamashshisa fiinqeesukkuuyyi gibookko. Manni tuutaakkoo dooma bachchoohaannisa heedinne bachchakka'a ubbuusakkamo; mannoo'mmeka xigo xigakka'a xanakkamoyyo; gaadaa'n xigim qawwaawwiinsi lobane.

²⁴Gibxi minaadab hanaa'n qarinne yoo'i minaadabina kaa'anta'a tuuttamo. An Waa'i kaka wocaammo» yukko.

²⁵Isra'ee'l Waa'i ihu gogoxxi Moollanni Waa'i «Gibxaa ixxuwwi waa'aa adilluwwaa edaa Teesiib Waa'i ihu Amoonaa guzumo'oommo. Gibxi uulli adila ixxonne amma'nnoo keeninne maqirem massaa

²⁶Sheena hasoo Baabiloo'n adil Nabukadanaxoorinaa ixxi gogotinaa higisaa uwwoommo; ihukkaarem kanniinsi illageen dasaa ihukkaannisam Gibxanne hee'oo manni bee'ooyyo; an Waa'i kaka wocaammo» yukko.

²⁷«I minaadaba, badditakkotte; Isra'ee'l minaadaba, dambaqqakkotte. ki'nnuwwa qeefadantakka'a a mattakko'i qee'l uulliinsi gatisoommo. Ki'nnuwwi uulla daba'llitakka'a waattakka'atim xumminne hee'llakkam; ayyim baddisoo'n xumminne hee'llakkamisa issoommo.

²⁸I minaadaba, badditakkotte; an ki'nnuwwinnette; an ki'nnuwwi bintakkamisa issummi uulli manna bi'isoommo; ihukkaarem ki'nnuwwa hore'em bi'isoommoyyo. Eehid yummi bikkinam guzumo'oo'n uroommoyyo. Ihukkaarem guzumo'oommok googaamisinnette. An Waa'i kaka wocaammo» yukko.