Read Hadiyya Ermiyaas Kitaaba 48 Bible Online

Ermiyaas Kitaaba 48 - Hadiyya bible

Ermiyaas Kitaaba 48

¹Gogoxxi Moollanni Waa'i Moo'aaphphi bikkina «Ixxuwwik beero'i bi'oo bikkina Nabo'i minaadabina aayye! Qiiriyaataayim diina'i anganne ubookko; qoxxaalli girbuwwim gindamookko; minaadabim tuullanne ubookko.

²Moo'aaphphek hibbii danii bi'ookko; diina'i Haaseeboona amadaa Moo'aaphphi adillano bi'iseena sawwaakko. Diina'ik bisa'i manna muransukkuuyyi higoo ammane Maadmeen yakkam beero'i sahookko.

³Hornaayi'm minaadabanne ‹Bichchii gindanchii afukko› yitu'uuyyi laattamo.

⁴«Moo'aab bi'aakko; wi'lloo oosika laachcha macceessehe.

⁵Afu hawwonne Luhiit beqeranne fittu'uuyyi Hornaayiim sagadanne dillitu'uuyyii u'nnanta'a hiqqita'a wi'llitu'uuyyi macceessehe.

⁶Ixxuwwina'i ixxuwwim ‹Ki'n foore gatixxitakkeena erisa geellehe; udma'anne hee'oo bii'l hallichchisa barallehe› yaqqantamo.

⁷«Moo'aaba, ki wodannee ki amaxxannee amma'nnantaa hee'llitto. Ihukkaarem kaba at ki gagim kaa'antootto. Kaamoosh yakkam qophpha'n waa'im adi'l oosinnee qeessuwwinnee maqirem qeefadamaa marookko.

⁸Bichchiinsi xoroo beero'i hore'em hee'ooyyo; cebbii biir uullii hundim bi'ookko; an Waa'i kaka wocaammo.

⁹Moo'aab qaqqisaa bi'oo amman afaakkoo bikkina bararaa xoroo lada uwwehe; Moo'aaphphek beero'uwwi hundim gindamookko; hee'oo mannim siidamooyyo» yukko.

¹⁰Waa'ika baxo innaannukkuuyyi baxoo manchi duumamaakkoohan ihona; Waa'i ijaajoo ammane bisa'a ee manchi xiigiinsi hooroo manchi duumamaakkoohan ihona.

¹¹Waa'i «Moo'aab shooho'amukkaanniinsi kid yaayyanchi hore'em afoo'n xumminne hee'am hee'ukko; Moo'aab mat jaalo'onne mulli dabaransakkoo'nnii borqoo'nnii xee'nnim bi'oo'nii illagee'nnisam xaliilaa yoo woyi'n diqaasisa.

¹²Mat manchi woyi'n diqaasa mat mu'utiinsi mullaannonne dabaraa lasage ee mu'utooma iiqoohaannisam anim Moo'aaphphi uulla bi'isaa minaadabooma binnaa'oo mancho asse'oommi amman hanqinam afaakko.

¹³Isra'ee'l minaadab bakke'llam hee'llo'i Bete'eela yakkam qophpha'n waa'anne tuutto'isam Moo'aaphphi minaadabim Kaamoosha yakkam qophpha'n waa'anne tuuttamo.

¹⁴«Moo'aaphphi manna, ‹Neese o'l gitannuwwaa oranne qoxalluwwaa› yitakka'a bakke'llakkamok mahinatte?

¹⁵Moo'aabii Moo'aaphphi beero'uwwii bi'aakko; doo'llanto'oo harde'i keenim duranto'ookko; kaka wocummok gogoxxi Moollanni Waa'i anette.

¹⁶Moo'aab bi'oo amman hincaakko; gindamoo ammanim qaqqisaa afaakko.

¹⁷«Moo'aaphpheka sado laqqakkam keenii gadanonne hee'llakkam minaadabii hundim ‹Malaayyaam hee'u adilla'nnek daannoom shaaramaakko; kanniinsi eehid lombik hibbi ixxuwwina hee'ooyyo› yitakku'uuyyi kichche'llehe.

¹⁸Diiboonanne hee'llakkam keen hundim lombi beyyiinsi dillitakka'a uullanne buchchanne afuullehe. Moo'aaba bi'isookkok oono'o keyyenne yookko; girbuwwam gindamaa gatoo'isa issaakko.

¹⁹Aaro'eeranne hee'llakkam keen hundim gooqqi tochchonne uullitakka'a gibbam keeno xa'mmitakka'a ihu luwwa hundam laqqehe.

²⁰Ixxuwwim ‹Oono'o, Moo'aab ubaakko; sholle'u bikkinam wi'llehe; Moo'aaphphi bichcham Arnoo'n daajji kululleetanne kullehe› » yita'a dabachcha uwwitamo.

²¹Hansawwanne baxakko'oo Hooloona, Yaahixa, Meefaa'aata,

²²Diiboona, Nabo'o, Betdiibilaataayima,

²³Qiiriyaataayima, Beetgaamula, Betma'oona,

²⁴Qariyootimaa Booxiraa yakkam beero'uwwannee qee'llonnee abbisonnee yoo Moo'aaphphi beero'uwwannee hundannem guzumo'i oogat waaraakko.

²⁵Moo'aaphphek malaayyaam buud iiqamaakko; malaayyim hoogaakko; an Waa'i kaka wocaammo» yukko.

²⁶Waa'i «Eesenne boqqu bikkina Moo'aabina agissakka'a dimbissehe; uwwe'u uwwannem biqqiiqqona; minaadabim ixxonne osarona

²⁷Moo'aaba, ki horoore heekkeessittuuyyi Isra'ee'l minaadabanne hinkaa'nna naacantida'ee sawwihe; at ixxuwwa fanguwwi anganne ubbo'aannisanne moo'llaa hee'llitto.

²⁸«Ki'nnuwwi Moo'aabanne hee'llakkam minaadaba, ki'nnuwwika beero'uwwa fatakitakka'a fillehe; ki'nnuwwika heechchi beyyom baallor issehe; baalli gadanonne do'nna baxoo handarekkichchisam ikkehe.

²⁹Moo'aab lobakata bolxaakko; minaadabim hinkaa'nna bolxoohanee xiiqqaamoo gaganne bakke'oohanee ihukkisaa ixxuwwi gaqqi bikkinam hinkaa'n lob sawwit yooda'ee la'oommo.

³⁰An Waa'i ixxuwwika xiiqqo la'oommo; ixxuwwina yoo luwwanne bakkechchim awwaad bee'ane; baxxam luwwim sood bee'ane.

³¹Ee bikkina Qiiriheereesanne hee'llam minaadaphphi bikkinaa Moo'aabanne yo'i kee'n bikkinaa hundinam an wi'lloommo.

³²Yaa'izee'l minaadabina wi'lloommaanniinsi loboka Siibi'm minaadabina laarummuuyyi wi'lloommo; Siibi'm beero'o, at caaffuwwi Sooqixxi dambalaqa higaa Yaazeer afeebe'e afoo woyi'n kaashshisa; ihukkaarem billi aga'n mishii woyi'n mishii hundim bi'aakko.

³³Liiranchii lobakat liiranchii hanceetaam Moo'aaphphi uulliinsi ki'aakko; woyi'n misha ciinsakkam beyyiinsim woyi'n diqaas daadoobee'isa issaammo; woyi'n diqaasa lubaa liiranchinne ililookkok hee'ooyyo.

³⁴«Haaseeboo'nnekii Eeli'aa'llekii minaadab sagara iimaa'lla'a laattamo; ixxuwwi laachchim Yaahix afeebe'e macceesamaakko; Xoo'aaranne hee'llam minaadabim macceesso'ookko; Hoornaayimaa Eglaat shiliishiiy afeebe'e macceesamaakko. Niimirii'm bu'om ihuta'n gogaakko.

³⁵An Moo'aaphphi minaadab otossitam beyyonne shokkiisakkam kitima gudissambee'isaa ixxuwwi Waa'inam aduruusa wiriissitambee'isaa issoommo; an Waa'i kaka wocaammo.

³⁶«Moo'aabannee Qiiriheereesannee hee'llam minaadab ixxuwwina yoo luwwi hundam hooggo'i bikkina gambaabiyya fuggu'uuyyi araddam wi'llishaa'nnisa ihaa wodaninnem kichche'oommo.

³⁷Ixxuwwi hundim horooree haareeddaa hogoossito'ookko; ixxuwwi angam mu'llita'a omassito'ookko; annannichchim xiddi eddechcha edde'llo'ookko.

³⁸An Moo'aaba ayyim hasoobee'i iiqammi jaalo'isa issummi bikkina Moo'aaphphi minneewwi hanennee minaadaphphi dummichchi beyyuwwannee kichchechchiinsi bagaan mulluwwi hee'ooyyo.

³⁹Moo'aaphphi minaadab kichchechchinne iiqamaa laarookko; Moo'aab sholle'aakko; gindanchannem gabalanne yoo mulli minaadab hundim gadaakko; an Waa'i kaka wocaammo» yukko.

⁴⁰Lado biddiqaa'aa aad darabamoo gaaqichchisa Moo'aaphphi hanenne kululoo minaadab waarukkisa Waa'i wocaakko.

⁴¹Beero'uwwii girbuwwii hundim amadamookko; ee ammane Moo'aaphphi gaadaan xuuchchi amadu qattam meentichchosa baddimminne u'nnantamo.

⁴²Moo'aaphphi minaadab iina boqqito'i bikkina bi'llamo; kanniinsi eehid adilla'n uulli ikka'a la'antamoyyo.

⁴³Moo'aaphphi minaadaba dambaqii qoloo barii qaashii egerookko; Waa'i kaka wocaakko.

⁴⁴Dambaqiinsi xorookkok barenne aagookko; bariinsi xophaa firookkok hundim qaashanne amadamookko; mashka'oomim Moo'aab bi'oo ammane Waa'i qoodaakko.

⁴⁵Malaayye qacaalluwwi ikko'i keen gibba'a Siihoo'n adilina beero'i hee'u Haaseeboonanne hafa siixxiteena hassamo; ihukkaarem oo beyyim shokkaalla; Moo'aaphphi tochchi uullii o'l manni ikko'i Moo'aaphphi minaadabii hee'llam duunnuwwaa hundam giir shokkiisookko.

⁴⁶Moo'aaphphi minaadabina aayye! Kaamoosh yakkam qophpha'n waa'anne otossitam minaadab bi'llo'ookko; goo'n oosii landii qeefadanta'a matto'ookko.

⁴⁷Ihukkaarem Waa'i Moo'aaphphi minaadaphpheka qeefajja dabarookko; an Waa'i kaka wocaammo.