Read Hadiyya Ermiyaas Kitaaba 49 Bible Online

Ermiyaas Kitaaba 49 - Hadiyya bible

Ermiyaas Kitaaba 49

¹Waa'i Amoo'n bikkina «Isra'eelina goo'n oos bee'ennihe? Lagaa'llam keendu bee'ennihe? Eehannah Milkoome yakkam qophpha'n waa'ina otossitam keen Gaad sullo hollita'a beero'uwwanne yo'ok mahinatte?

²Ee bikkina Amoo'n beero'i ihu Raaba'anne o'l dambaqika sagara macceesisoommi amman waarookko; oo beero'im gindamaa diih ihookko; hoffi beero'uwwim giirinne shokkookko; ee lasage Isra'ee'l oos illageen ixxuwwa boggo'i keeno dabatta'a boggamo.

³Haseeboo'n minaadaba, Aay beero'i gindamu bikkina wi'llehe; Raaba'i beero'i hegeeqqi hoffi beero'uwwi minaadab hundim sagara iimaa'llakka'a wi'llehe; Miilkoom ixxi qeessuwwinnee gassaaninnee maqirem qeefadamaa maru bikkina xiddi eddechcha edde'llakka'a ooxxi lambe'enne ekkidii kidii daba'llantakku'uuyyi wi'llehe.

⁴Hoogukkuuyyi maroo ki'nnuwwi malaayyenne bakke'llakkamok mahinatte? Ki'nnuwwi amma'nnantakkambee'i minaadaba, ‹Iinninne oramookkok ayyette? yitakka'a lobakat ki'nnuwwi amaxxanne bakke'llakko'ookko.

⁵An hundem kollinnem dambaqa eeboommo; ki'nnuwwi hundim gibbokkamo; hundim goog googinnem binnaa giboo bikkina gibbo'i keeno wixxa'ookkok hee'ooyyo.

⁶«Ihukkaarem ammaniinsi lasonne Amoo'n mannika qeefajja dabaroommo; an Waa'i kaka wocaammo» yukko.

⁷Gogoxxi Moollanni Waa'i Eedoo'm bikkina «Teemaa'n beero'i minaadab kanniinsi illageen ixxuwwina yoo qoorooma hoogga'atennihe? Soggam keendu sogitano uwwimma hooggatennihe? Ixxuwwina hee'u qooroomdu hanno afukko?

⁸Eesa'i shumo'o guzumo'oommi ammane ixxuwwanne hawwo eeboommi bikkina Daadaa'n beero'i minaadaba, laso daba'llitakka'a geellehe; baallennem maaxammehe.

⁹Manni woyi'n misha feeroo ammane woyi'n haqqichchonne hofqax misham urookko; gafannim hiimonne waaroo ammane hasuqax xale'e massookko.

¹⁰Ihukkaarem an Eesa'i shumo'o hore'oomam maxaroommo; maaxantam beyyom biir issoommo; ee bikkina kanniinsi eehid maaxantam beyyo siiddamoyyo; ixxuwwi oosii qarmannii olla'ii bi'llamo; ixxuwwim hee'llamoyyo.

¹¹Ki'nnuwwi lambe'enne yo'i adaraar ooso ullehe; an foorinne hee'llamisa issoommo; busar meenti eesenne bakke'llona.

¹²«Eehannata'e guzumo'anchi hasisoobee'i mannim guzumo'amoohan ihulas ki'nnuwwi guzumo'anchiinsi gattakkamoka lobissakkatennihe? Gattakkamoyyo; ki'nnuwwim ee guzumo'i humbulliinsi agimmi hasisookko.

¹³Booxir beero'i baddisoo udma'i ihaa gatoo'isa an i gaganne hide'aammo; minaadab hundim naac issaa urookko; summam duumamaakkoohan issitamo; gadanonne yoo hoffi beero'uwwi hundim heer heerinam gindamaa gatookko; an Waa'i kaka wocaammo» yukko.

¹⁴Mat asso Waa'iinsi macceesaammo; oohim «Eedoo'm minaadaba qassakkeena wixxi'llehe; orinam ki'llehe» yaa wocoo asse'amaanchi minaadaphphi beyyo asse'amaakko.

¹⁵«Oono'o, kaba an keese uulli minaadaphphi lambe'enne hoffiisoommo; manni lambe'ennem gadantaattoohan issoommo.

¹⁶Kinaam baallenne hee'llootti duu'n lud afeebe'em affoottok, kiikki baddissoohaannoomii ki woda'n bolxoomii keese qawwiisaakko; maha kiikka gatti beyyo gaaqichchi do'nnisa issititta'nnim an Waa'i ee iimaniinsi dilliisoommo» yoolla.

¹⁷Waa'i «Edoom muggisoohan ihookko; eekkeen higukkuuyyi moo'oo hundim muggookko; afu bichchannem maalalookko.

¹⁸Soddomii Gomorii kululleetanne yoo beero'uwwinne maqirem bi'u ammane afu bichchi ee'isam Eedoomanne afookko; la'mmaagge eekke'enne afuuraa hee'ookkok hore'em siidamooyyo.

¹⁹Hobbichchi tiiwwi ihaakkoo Yoordaanoos doo'm woriinsi firaa aad yoo gereebbi allaa'lloo beyyo waaroo'isam an dangionne waaraa Eedoo'm awwonsaano holloommo; ee lasage iittummoka doo'lloommo; iinni'nnookkok ayyette? Eese xa'mmeena iggookkodu ayyette? I illagenne uullaa uullixxamoo awwonsaanchi ayyette?

²⁰Ee bikkina Eedoo'm minaadabanne isseena sawwummokaa Teema'n beero'i minaadabanne isseena hasummokaa macceessehe; ixxuwwika ooso gereebbi wotallisa gosaasakku'uuyyi massakkamo; ixxuwwi mashka'inne moo'oo hundim muggookko.

²¹Eedoo'm ubimmik woshshi macceesamoo ammane uulli heekke'ookko; muggimmikim laachchi eekke'iinsi higaa Ertiira'i dambalaq afeebe'e macceesamookko.

²²Lado haraassaa biddiqaa'aa aad dilloo gaaqichchisa diina'i Booxiranne dillookko; ee ammane Eedoo'm gaadaan xuuchchi amadaa baddimminne u'nnantam qattam meentichchosa ikkamo» yukko.

²³«Haamaatikii Arfaad beero'ikii manni Damaasqo'i beero'ika bichcha macceesso'i bikkina muggito'o; iimii aadii heekke'oo dambalaqisa ixxuwwik wodan dambaqukko.

²⁴Damaasqo'i minaadab hajjito'o gibbeenam laso daba'llito'o; baddimmim ixxuwwanne ihukko; xuuchchi amadu meentichchosam u'nnanto'o;

²⁵Oo summaam mishisoo beero'i hinkid diihaa gatukko?

²⁶Ee ayyaamo ee beero'i harde'uwwi beero'i googguwwanne shakkamo; gaadaanim beedditamo.

²⁷Damaasqo'i beero'i qasha hundam giirinne shokkiisoommo; adil Beenihadaad adilla'n minem giirinne shokkiisoommo; an gogoxxi Moollanni Waa'i kaka wocaammo» yukko.

²⁸Baabiloo'n adil Nabukadanaxoor kaa'u bikkina Haxoor beero'i bikkinaa Qeedaar adilla'n bikkina Waa'i «Ki'llehe; Qeedaar minaadabanne gaaddehe; eelliinchi fi'l minaadabam bi'issehe.

²⁹Ixxuwwi dukkaannuwwa, fooraam diinaxxi allaachcha, du'm eddechchuwwaa mu'uttuwwa hundamii massehe; ixxuwwika gaameela'uuwwa ki'nnuwwi gagina massehe; ‹Kululleetanne dambaq ki'aakko› yita'a laattamo» yukko.

³⁰Haxoo'l minaadaba, ki'nnuwwina Waa'i «Baabiloo'n adil Nabukadanaxoor ki'nnuwwanne jor a'llancha a'llamaakkoo bikkinaa jora sawwaakkoo bikkinaa qee'llitakka'a gibbehe; xillaalli baallennem maaxammehe» yaakko.

³¹Waa'i «Ki'llehe, xufii laqqo'ii bee'eka mullam usheexxaa xumminne afuuru minaadabanne gaaddehe.

³²Ixxuwwik gaameela'uwwii diinatii qeefadamookko; ixxuwwi horoo'lleka makkaa qeddaa hogoossito'i minaadaba hundam kolli hundannem binnaa'oommo; kolli hundinnem hawwo ixxuwwanne eeboommo» yukko.

³³Ee bikkina Haxoor heer heerinam xale'i wengereelli hee'oo udma'i uulli ihaa gatookko; la'mmaagge eekke'enne afuuraa hee'oo minaadab hore'em hee'ooyyo.

³⁴Sedeeqiyaas Yihuxxi uullanne adil ihukkisam gogoxxi Moollanni Waa'i Eelaa'm uulli bikkina

³⁵«Eelaa'm uulla kaa'n malaayyaammuwwi ikkamisina issitakko'i Eelaa'm o'l malaayye iiqoommo.

³⁶Kolli hundinnem aphphisoo hafachcha Eelaamanne ki'isoommo; minaadabam beyyi hundannem binnaa'oommo; ee'isnne Eelaamiinsi yaayyanto'i manni hee'llambee'i uulli hee'ooyyo.

³⁷Eelaa'm minaadab ixxuwwika foore shiteena hassam diina'a badditamisa issoommo; ixxuwwanne afoo bichchina mashka'i ihoo malaayyaam i quunqa ixxuwwanne issoommo; beedditeebee'e orinne hollantamisa issoommo;

³⁸Ixxuwwika adilaa awwonsaanoo bi'isoommo; i adilla'n barcumam eekke'enne issoommo.

³⁹Ihukkaarem Eelaa'm minaadaphphi qeefajja dabaroommi amman waarookko; an Waa'i kaka wocaammo» yukko.