Read Hadiyya Ermiyaas Kitaaba 50 Bible Online

Ermiyaas Kitaaba 50 - Hadiyya bible

Ermiyaas Kitaaba 50

¹Baabiloo'n bikkinaa minaadaphphi bikkinaa hiraagaanchi Ermiyaas kollinnetti ihaa Waa'i wocu sagar kane.

²«Uulli minaadabina hundinam alallaattakku'uuyyi woshsha kullehe; mare'em iimaa'llakka'atim ee woshsha la'issehe; woccehe bagaan maaxxakkotte. Oono'o, Baabiloon amadamaakko. Beel yakkam qophpha'n waa'i tuuraakko; Maarduuk yakkam qophpha'n waa'im iiqamaakko. Baabiloo'n qophpha'n waa'uwwi tuutto'ookko; shigigaa'oo misilluwwim iiqamaakko.

³«Baabiloona qasaa udma'i uulli issoo minaadab hanaa'n qarinne ki'aakko; mannii diinatii uunjaa gibookko; eekke'enne hee'ookkok siidamooyyo» yukko.

⁴Waa'i «Doollii ammanii afoohaare Isra'ee'llekii Yihuxxekii minaadab mateeyyanne ikka'a eese ixxuwwi Waa'a hasseena wi'llitu'uuyyi waattamo.

⁵Xiyoo'n beero'o afisoo googo xa'mmitamo; gooqqi xabbeena amadda'a mattamo; iinninne maqirem heer heer hidi'l sagara aaggamo; hore'em ginditamoyyo.

⁶«I minaadab bi'u gereebbisa ihaakko; allaaraanim huushisso'o; duunneewwanne jalli jallitamisa issito'o; lob duuniinsi hoffi duuna karkaadoo gereebbisa karkaaddo'o; ixxuwwi gatti beyyom xaddo'o.

⁷Gereebbi moochchanne itamoo'isam ixxuwwa siidukkok hundim hawwodukko; diina'im ‹Neese maham hawwondummoyyo; ku hawwi hundim ixxuwwanne afukkok gaassi ixxuwwi anno'i neeyyata issita'a hee'llo'i Waa'ina boqqito'i bikkinatte; ixxuwwi anno'isam Waa'ina amma'nnanta'a hee'immi hasisam hee'ukko› yito'o.

⁸«Isra'ee'l minaadaba, Baabilooniinsi gibbakka'a fillehe; uullooma fatakitakka'a mallehe; fella'a awwonsoo ambu'llisa ikkehe.

⁹An hanaa'n qarinne mat ihaakkoo minaadab Baabiloonanne gaadoo'isa ki'isoommo; ixxuwwam qassamo; ee lasagem amaddamo; ixxuwwikim xiyyi tokkosamaa beyyo huushoobee'i qoor gaadaanchi xiyyi'nnoohane.

¹⁰Baabiloo'n uulli bogamookko; boggam keenim ixxuwwina ihoo qaxa siiddo'i luwwi hundam massitamo; an Waa'i kaka wocaammo» yukko.

¹¹Waa'i «Baabiloo'n minaadaba, i minaadaba boggakka'a liirantakka'ahii lobakatam liirantakka'ahii hee'llakko'o; allaachchi biiranne daabbaroo addichchisa heellantakka'ahii soorammi faraxxisam finxiriiqqakkahii hee'llakko'o.

¹²Ihukkaarem kaba ki'nnuwwik lob beero'i lobakata tuurookko; ki'nnuwwi gaqqi uullim sholle'ookko; minaadaphphi uulluwwiinsi hundinam hoffan ihookko; wo'i bee'an ihaa udma'oomanne daba'llookko.

¹³I quunqi mashka'inne Baabiloonanne ayyim hee'eena xanooyyo; Baabiloon gindamookko. Ixxi gadaninne higoo hundam muggii baachchii amadookko.

¹⁴«Ki'nnuwwi xiyya tokkossakkam keen Baabiloona qassakkeena ixxi kululleeta kibbehe; Waa'i ihummi i illagenne baaxiilo baxxo'i bikkina ki'nnuwwika xiyya hundam Baabiloonanne tokkossehe; xiyyuwwina idiiddakkotte.

¹⁵Beero'i kululleetanne shattakku'uuyyi shuullehe; oono'o Baabiloon anga uwwaakko; gimbuwwim toroshamaakko; qashshuwwim gindamaakko; Baabiloo'n mannika baado firoommo; ki'nnuwwim baado fillehe; mulli keenonne issito'i monga ixxuwwannem issehe.

¹⁶Wixookkokaa hurbaata wixxaa'ookkokaa Baabilooniinsi bi'issehe; ee uullanne hee'oo mulli uulli manni gasso o'l gogota baddita'a ixxuwwi moolli kolli daba'llitamo; ixxuwwi uullam gibbamo» yukko.

¹⁷Waa'i «Isra'ee'l minaadab hobbichchi hollaa binnaa'u gereebbisa ikko'ookko; luxxeka moochchichchi siidukkoka hundam muransaa itoohaannisa Aasoo'l adil ixxuwwa hawwodukko; eehanniinsi lasonne hobbichchi miqe iiqansoohaannisa Baabiloo'n adil Nabukadanaxoor ixxuwwa xaamsukko.

¹⁸Ee bikkina an Isra'ee'l Waa'i gogoxxi Moollanni Aasoo'l adilluwwi adila guzumo'ummisam Nabukadanaxooraa ixxi uullaa edaa guzumo'oommo.

¹⁹Isra'ee'l minaadaba ixxuwwi uullam dabaroommo; Qarmeeloos duunannee Baasaa'n uullannee mutoo luwwa hundam ittamo; Efiree'm uullannee Gala'aaxxi uullannee mutoo hurbaaxxeka hasso'i qaxa ittamo.

²⁰Ee ammane Isra'ee'llaanniinsii Yihuxxi minaadabiinsii gattamisa issummi mannika baaxiilo an haafaammo yoommi bikkina ixxuwwanne baaxiilii hawwojjii hassakkota'nnim siidamooyyo» yukko.

²¹Waa'i «Miraataayi'mmaannonnee Faqood minaadabannee hawwo afissehe; shitakka'atim bi'issehe; an ki'nnuwwa ijaajoommoka hundam issehe; an Waa'i kaka wocaammo.

²²Uullannem o'l sagar macceesamaakko; lobakat bichchim ihaakko.

²³Uulli minaadaba fanxiisisa xaansam hee'u Baabiloon gagim xaamaakko; ee uullanne afu luwwi heer uulli minaadabina hinkido'i muggisoohane?

²⁴Baabiloona, ki gaganne qaashshitti qaashanne laqqoo'nnim amadantitto; amadantaatim moo'antittok at Waa'anne iggitti bikkinatte.

²⁵Waa'i o'l mu'uxxeka mine fooqaa'aa ixxi quunqika o'l mu'uta fissukko; kakam issukkok gogoxxi Moollanni Waa'i Baabiloo'n uullanne baxoo bax yoo bikkinatte.

²⁶Kolli hundinnem gaaddehe; hurbaat wixxu gootara hundam fooqaa'llehe; qeefajjam hurbaaxxi atooxxisa wixxaa'llehe; ma'lluwwam gatissakkoo'n uullooma bi'issehe.

²⁷Ixxuwwika gaadaano du'l beyyo massakka'a durakkam moolluwwisa massitakka'a shi'llehe; guzumo'antam amman afu bikkina Baabiloo'n minaadabina aayye!

²⁸«Qeefado'onne Baabiloonanne hee'llo'i keenii waaraanii Yerusaaleema waatto'o; ni Moollanni Waa'i ixxi mi'nneka baado Baabiloo'n uulli manniinsi miqisoo bikkina ixxuwwi Xiyoonanne woccamoka macceessehe» yukko.

²⁹Waa'i «Xiyya tokkosseena xantam keeno Baabiloonanne gaaddamisina weeshshehe; beero'oomam kibbitona; ayyim xoroobee'isa egellehe; ixxuwwi jor baxika bito miqqehe; mulli keenonne ixxuwwi baxxo'i damiga ixxuwwannem issehe; ixxuwwi Isra'ee'l keesammi Waa'anne eesenne iggito'ookko.

³⁰Ee bikkina ixxuwwik harde'i oos beero'i googguwwanne letamo; gaadaanim ee ballam beedditamo; an Waa'i kaka wocaammo.

³¹«Bolxitoo Baabiloona, an gogoxxi Moollanni Waa'i keesenne ki'oommo; keese guzumo'oommi ammanim afaakko.

³²At qolantaa ubbootto; keese bakkiisaa ki'isookkok hee'ooyyo; ki beero'uwwa giirinne shokkiisoommo; ki kululleetanne yoo luwwi hundim bi'ookko» yukko.

³³Gogoxxi Moollanni Waa'i «Isra'ee'llekii Yihuxxi minaadabii wor amadanto'ookko; qeefadda'a massito'i keen hundim qoxxissa'a amaddo'ookko; fatakiteenam hasso'oyyo.

³⁴Ihukkaarem ixxuwwa gatisaanchi malaayyaamo; ixxi summim gogoxxi Moollanna yakkamane xummam uullanne dilliisookko; Baabiloo'n uullanne hawwo eebookko» yukko.

³⁵Waa'i «Baabiloonannee Baabiloo'n minaadabannee, awwonsaanonnee qoolluwwannee bisa'i ki'ona.

³⁶Gennaan qawwuwwi ikkamisina ixxuwwik gaadaan baddita'a batbatitamisina bisa'i ixxuwwanne ki'ona.

³⁷Ixxuwwi faradonne, faraxxi gaare'ennee birinne bitaa'llo'i gaadaanonnee bisa'i ki'ona; ixxuwwi meentisa ikkona; goddaan keenonne bisa'inne xeephitakka'a ixxuwwika hora hundam boggehe.

³⁸Baabiloon shigigaa'oohanee manna machchaassoo qophpha'n waa'uwwinne wo'mmaakkoohanee ihu bikkina daajjuwwi hundim gogona.

³⁹«Ee bikkina Baabiloon udma'i uulli wengereellii shigigaa'oo ammarii hee'oo beyyi ihookko; ee'isam qaranchiinsi qaranchi afeebe'e heer heerinam manni hee'oo beyyi ihooyyo.

⁴⁰Soddomaa Gomoraa gadanonne yoo beero'uwwinne maqirem bi'isummi ammane ihukkaannisam Baabiloonannem ayyim la'mmaagge afuuraa hee'eena xanooyyo; an Waa'i kaka wocaammo.

⁴¹Oono'o, minaadab hanaa'n qarinne waaroolla; malaayyaam minaadabii dut adilluwwii uulli tochchiinsi mikmikukkuuyyi

⁴²xiyyaa bisa'aa amadaakko. Oo keen mishano laqqambee'i mogaalluwwa; faradim firiixxo ammane saggaaroo dambalaqisa; Baabiloona, ixxuwwi ki'nnuwwa qasseena gaadina gudda'a waattam mannisa ki'nnuwwi beyyo waattamuulla.

⁴³Baabiloo'n adil ka baa'yyaato macceesaa lasonne ixxek angi shiihaa calcalookko; xuuchchinne amadanto'i meentichchosam u'nnamookko.

⁴⁴«Yoordaanoos daajji tochchonne yoo doo'm woriinsi aad yoo biir uulla firoo hobbichchisa an Waa'i waaraa Baabiloo'n manni dangonnem beero'iinsi fitta'a barattamisa issoommo. Ee lasage an hasummoka doo'lloommo; eehannah iinni'nnookkok ayyette? Eese xa'mmaa iggoodu ayyette? Iinninne uullixxamoo awwonsaanchidu ayyette?

⁴⁵Eehannah kaba Waa'i Baabiloon minaadabanne sawwu luwwa macceessehe; Ixxuwwika ooso gereebbi wotallisa gosaasakka'a massakkamo; ixxuwwi mashka'inne allaachchi biir muggisoohan ihookko.

⁴⁶Baabiloo'n uulli diina'inne amadamukkisa macceesamoo ammane uulli huxe'ookko; ixxuwwi laachchim minaadaphphi lambe'enne macceesamookko» yukko.